جێگری سەرۆكی ئەنجومەنی وەزیران ڕایگەیاند: سەرباری هەموو گرفت و تەگەرەکان، حكومەت بەردەوام دەبێت لە پلان و پڕۆسە چاكسازیەكان، و ئەركی ئێمە باشكردنی بژێوی خەڵكە.

ئەمڕۆ 21/9 قوباد تاڵەبانی جێگری سەرۆكی ئەنجومەنی وەزیران بەیاوەری مامۆستا جەلال بریكاری وەزیری ناوخۆ و نەوزاد هادی پاڕێزگاری هەولێر، سەردانی قەزای كۆیەی كرد و لەلایەن بەپرسانی ئیداری قەزاكە پێشوازی گەرمیان لێ كرا.

لەو سەردانەدا جێگری سەرۆكی ئەنجومەنی وەزیران زنجیرەیەک کۆبونەوەی لەگەڵ قایمقامی كۆیە و بەڕێوبەری ناحیەکانی سنوری کۆیە و سەرۆكی دادگای كۆیە و بەڕێوبەرە گشتیەکان و ئەفسەرو پلەدارەكان ئەنجامدا.

قوباد تاڵەبانی وێڕای پیرۆزبایی دەستبەكاربونی قایمقامی قەزاكە سەركەوت رەسول، ستایشی كار وچالاكییەكانی كرد لە پێناو خزمەتكردنی خەڵكی دەڤەرەكە بەگشتی و ڕێگری کردن لە دیاردەی زیادەرەوی سەر زەوی وزار بەتایبەت ، هەروەها پشتگیری حكومەتی بۆ دووپاتكردووە لە جێبەجێكردنی ئەركەكەی.

لەبارەی کارو چالاکیەلانی حکومەتەوە ووتی "سەرباری هەموو گرفت و تەگەرەكانی بەردەم كارو وچالاكییەكانی حكومەت و دامودەزگاكانی، هەر بەردوام بوین و دەبین لە پێناو خزمەتكردنی خەڵكی كوردستان و دروشم و ئەركمان باش كردنی بژێوی خەڵكە".

دواتر بەڕێز جێگری سەرۆك وەزیران سەردانی بینای شارەوانی كۆیەی كرد و لەگەڵ بەڕێوبەر و بەرپرسانی شارەوانی كۆبویەوە، و بەووردی گوێبیستی لە داواكاری و گرفت و كارو چالاكییەكانیان بوو.

جێگری سەرۆكی ئەنجومەنی وەزیران ووتیشی "هەموو كات دادگا پاڵنەرێكی باش و تەواوكەری بزوێنەری حكومەت بووە، و بەبێ دادگا و یاسا هیچ كات ناتوانرێت هاوسەنگی و دادپەروەری لەناو كۆمەڵگادا بەرپا بكرێت، بەتایبەت لەمكاتەدا كە رووبەرووی كۆمەڵێك قەیران بوین، بۆیە دەبێت زۆر وریایانە مامەڵە لەگەڵ دۆخەكە بكەین و به یاسا ڕێگر بین لەهەر لادانێك".

قوباد تاڵەبانی لەو كۆبونەوەیە ڕایگەیاند "لەنیگەرانیەكانی موچەخۆران تێدەگەین و مافی خۆیانە نیگەران بن بەرامبەر حكومەتەكەیان و نەدانی شایستە داراییەكانیان، بەڵام دڵنیایان دەکەینەوە کە پلانمان ئەوەیە دەرباز بین و ژیانی خەڵكی كوردستان ئاسایی بێتەوە لەرووی ئابورییەوە وسیاسیشەوە."

بەڵێنی ئەوەشی دا كە بە پێی توانا پێداویستی و گرفتەكانی دەڤەرەكە چارسەر دەكەن.

دواتر بەشداری کرد لە مەڕاسیمی تیروپشکی دابەش کردنی زەوی نیشتەجێبوون بەسەر  175 هاوڵاتی شاری كۆیە.

هەر لەو سەردانەیدا بۆ قەزای كۆیە، سەردانی كەمپی ئاوارەكانی كرد و لەنزیكەوە گوێبیستی داواكاری و كەمووكوڕییەكانی ئاوارەكانی ناو كەمپەكە بوو، ئەوانیش خۆشحاڵی خۆیان دەربری بۆ ئەو سەردانە.

دواتر سەردانی دوو پڕۆژەی خزمەتگوزاری كرد و ستایشی بەڵێندەرەكانی كرد لەبەر جێبەێكردنی پڕۆژەكان بەستانداردێكی باش. وتیشی "خۆشحاڵم سەرباری قەیرانی دارایی و هەموو گرفتەكان كە پڕۆژەو وخزمەتگوزارییەكان بەردەوام دەبن".