پاشنیوەڕۆی ئەمڕۆ چوارشەممە 5-10-2016 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە خاتوو ستیفان ولیامز جێگری باڵیۆزی ئەمەریكا لە عێراق و شاندێكی یاوەری كرد.
لە دیدارێكدا خاتوو ولیامز خۆشحاڵیی خۆی بە سەردانی هەرێمی كوردستان و پەرەسەندنە ئەرێنییەكانی گۆڕەپانی سیاسی و سەربازی لە عێراق دەربڕی و سەردانەكانی ئەم دواییانەی بەڕێزان سەرۆك و سەرۆك وەزیرانی هەرێمی كوردستان بۆ بەغدا و دەستپێكردنەوەی گفتوگۆ و دانوستان لەسەر كێشە هەڵواسراوەكانی نیوان هەولێر و بەغدای، بەرز نرخاند، هەروەها پەیوەندییە دووقۆڵییەكانی نێوان هەرێمی كوردستان و ئەمەریكا و تۆكمەكردنى زیاتریان لە هەموو بوارەكاندا، دووپات كردەوە.
لە بەشێكی دیكەی قسەكانیدا بەڕێزیان ستایشی نەبەردیی پێشمەرگەی لە شكاندنی ئەفسانەی تیرۆر و بەرگریكرن لە هەموو پێكهاتەكانی كوردستان كرد و ڕۆڵی خەڵك و حكوومەتی هەرێمی كوردستانی لە هاوكاریكردنی ئاوارە و پەنابەرانی دەستی تیرۆر بە كاریگەر و مرۆڤانە له قه‌ڵه‌م دا.
لای خۆیەوە بەڕێز سەرۆك وەزیرانی هەرێمی كوردستان سوپاسی ئەو سەردانە و هاوكارییەكانی ئەمەریكای كرد كە هەر لە سەرەتای شەڕ و هەڕەشەی تیرۆرستانی داعشەوە بۆ سەر هەرێمی كوردستان، پێشكەشی هەرێمی كردووە و هیوای بەردەوامیی هاوكارییەكانی لەڕووی سەربازی و مرۆییەوە خواست. جەختیشی لەسەر ئاساییكردنەوەی پەیوەندییەكانی نێوان هەولێر و بەغدا و چارەسەركردنی كێشە هەڵواسراوەكان بە ڕێگەی دیالۆگ و لێكگەیشتن، كردەوە.
هه‌روه‌ها لەبارەی شەڕی دژی تیرۆرستانی داعشه‌وه، بەڕێزیان هەماهەنگیی نێوان هەولێر و بەغدا و هاوپەیمانانی بۆ ڕووبەڕووبوونەوەی تیرۆر و ڕزگاركردنەوەی شاری مووسڵ و دانانی پلانێكی هەمەلایەنە بۆ قۆناغی دوای ئازادكرنەكە و كاری هاوبەش و تێڕوانینی هاوبەش بۆ ئایندەی ناوچەكە له هه‌موو ڕوویه‌كه‌وه، دووپات كردەوە.
تاوتوێكردنی دوا پێشهاتە سیاسی و سەربازییەكانی ناوچەكە و ئاڵوگۆڕكردنی بیروبۆچوون لەسەر چەند بابەتێكی پەیوەندیدار، لایەنێكی دیكەی دیدارەكە بوو.