د په‌یامه‌كێدا جڤاتا وه‌زیران یا هه‌رێما كوردستانێ، جه‌ژنا چارشه‌مبوا سۆر یا خوشك و برایێن ئێزدى پیرۆز كر، ئه‌ڤه ده‌قا وێیه:
ب گه‌رمى جه‌ژنا چارشه‌مبوا سۆر ل خوشك برایێن ئێزدى ل كوردستانێ و ل هه‌ر ده‌ره‌كا جیهانێ بن پیرۆز دكه‌ین، هیڤیدارین جه‌ژنه‌كا خۆش و ئارام ده‌رباز بكه‌ن. د ده‌مه‌كێدا كو ئه‌م ڤێ جه‌ژنێ پیرۆز دكه‌ین، ئه‌م جاره‌كا دى هه‌مى وان خوشك و برایێن مه یێن ئێزدى ب بیر تینین، یێن كو وه‌كى هه‌مى پێكهاتێن دى یێن نه‌ته‌وه‌یى و ئۆلى ل كوردستانێ، ژ ئه‌نجاما تاوان و كارێن تیرۆرستى و هۆڤانه یێن داعشێ، بوونه قوربانى.
هیڤیدارین خوشك و برایێن مه یێن ئێزدى كو هه‌تا نهۆ ژى د كه‌مپێن ئاواره‌ییێدانه، جه‌ژن و هه‌لكه‌فتنێن خۆ یێن بهێن، سه‌فراز و ئازاد ڤه‌گه‌ڕیابنه سه‌ر مال و ده‌ڤه‌رێن خوه یێن ئازاد و ئاڤه‌دانكرى و هه‌مى كوردستانى پێكڤه جه‌ژن و هه‌لكه‌فتنێن خوه یێن بهێن، ب سایا سه‌ركه‌فتن و ئازادى یا ئێكجارى و نه‌مانا تیرۆرێ پیرۆز بكه‌ن.
د ڤێ جه‌ژنێدا ئه‌م جاره‌كا دى هه‌مى خوشك و برایێن ئێزدى پشتڕاست دكه‌ین كو هه‌تا مرۆڤه‌كێ ئێزدى د ده‌ستێ تیرۆرستێن داعشێدا مابیت، ئه‌م دێ هه‌مى هه‌ول و كارینێن خوه ژبۆ ئازادكرنا وان ب كار ئینین، هه‌روه‌سا هه‌ولێن حكوومه‌تێ ژبۆ ناساندنا كه‌یسا ئێزدییان وه‌ك جینۆساید ل سه‌ر ئاستا ناڤنه‌ته‌ویى و ئازادكردنا ده‌ڤه‌رێن مایى یێن ئێزدییان ل سه‌ر ده‌ستێ پێشمه‌رگێن قه‌هره‌مان و ئاڤه‌دانكرن و ڤه‌گه‌ڕاندنا ژیانێ ژبۆ ده‌ڤه‌رێن وان، دێ به‌رده‌وام بن.
جاره‌كا دى جه‌ژنا چارشه‌مبوا سۆر ل هه‌مى ئێزدییان پیرۆز بیت، هه‌ر سال ب خێر و خۆشى.
جڤاتا وه‌زیران یا هه‌رێما كوردستانێ
18/4/2017