ئەمڕۆ 2017/6/14 قوباد تاڵەبانی جێگری سەرۆک وەزیرانی هەرێمی کوردستان، لە ئەمستەردام، لەگەڵ خاتوو ژینیان هێنس وەزیری بەرگریی هۆڵەندا کۆبوەەوە.
لە کۆبونەوەکەدا، گفتوگۆ لەبارەی پەیوەندیەکانی هەرێمی کوردستان و هۆڵەندا و چۆنیەتی پتەو کردنیان کرا، هەروەها شەڕی دژ بە تیرۆریستانی داعش و چاکسازیەکانی حکومەتی هەرێم تەوەرێکی تری کۆبونەوەکە بوون.
قوباد تاڵەبانی، وێڕای ستایش و سوپاسی حکومەتی هۆڵەندا بۆ هاوکاریەکانی لە جەنگی دژ بە داعش، دوای فراوان کردنی پەیوەندیەکانی لێ کردن و دووپاتی كردەوە گەلی کورد بە گرنگیەوە دەڕوانێتە هۆڵەندا بەتایبەتی لە شەڕی تیرۆریستان ڕۆڵێکی بەرچاویان هەبووە لە هەڵمەتی لەناو بردنیان و هاوکاری هێزی پێشمەرگەیان کردووە.
جێگری سەرۆک وەزیران ئەوەشی ڕوون کردەوە مەترسییە سەربازیەکانی داعش کەم بۆتەوە، بەڵام هێشتا ئایدۆلۆژیای توندڕەوی مەترسیەکی گەورەیە و دەبێت پلانمان هەبێت بۆ لەناوبردنی ئاسەوارەکەیان کە ئەوەش دەبێت بەهاوکاری هەموو لایەک بێت.
سەبارەت بە چاکسازیەکانی حکومەتی هەرێم ئەوەی خستەڕوو حکومەتی هەرێمی كوردستان قۆناغی زۆر باشی بڕیوە و ئیرادەیەكی بەهێزە هەیە بۆ سەركەوتن بەسەر هەموو گرفتەكان و پێشكەش كردنی خزمەتی زیاتر بە گەلی كوردستان.
دواتر وەزیری بەرگری هۆڵەندا، ستایشی گەلی کورد و هێزی پێشمەرگەی قارەمانی کرد و بە سومبولی بەرخودان و ئازایەتی وەسفی کردن و ئاماژەی بۆ ئەوە كرد هۆڵەندا بەگرنگیەوە دەڕوانێتە هەرێمی کوردستان و هەموو کات دەرگامان واڵایە بۆ پتەو کردنی پەیوەندیاکان و بەردەوامیش دەبین لە هاوکاری سەربازی تا ئەو کاتەی بەتەواوەتی داعش لە ناو دەبەرێت.