لە رێورەسمی کردنەوەی شەشەمین فێستیڤالی نێوده‌وڵه‌تی فلیمی دهۆک ئیمڕۆ، بەڕێز سەفین دزەیی، وتەبێژی حکومەتی هەرێمی کوردستان، وتاری بەڕێز نێچیرڤان بارزانی، سەرۆک وەزیرانی حکومەتی هەرێم، پێشکەشکرد.
ئەمەی خوارەوە دەقی وتارەکەی سەرۆک وەزیرانی حکومەتی هەرێمە:
مێهڤان وئاماده‌بوویێن هێژا،
هونه‌رمه‌ند وسینه‌ماكارێن بڕێز،
ئێڤار باش،
هوین هه‌مى گه‌له‌ك بخێرهاتن، هیڤیدارم ده‌مه‌كێ خۆش وفه‌ستیڤاله‌كا سه‌ركه‌فتى ل باژارێ دهۆكێ ده‌رباز بكه‌ن.
ب ڕاستى ژى من ژ دڵ دڤیا كو ڤێ ئێڤارێ دگه‌ل وه یێن هێژا، به‌شدارى ڤێ بوویه‌را خۆش ببم و ژ نێزیك وه ببینم، لێ مخابن ژبه‌ر گه‌له‌ك مژویلى و پێگیرى یێن دى یێن كارى، ده‌لیڤه چێنه‌بوو و نه‌شیام به‌شدار ببم.
ڕاسته نهۆ ل ڤێرێ دگه‌ل وه نیمه، لێ پشتڕاست بن ئه‌ز بدل دگه‌ل وه‌مه‌و ژ دل هیڤیا سه‌ركه‌فتنێ ژبۆ فه‌ستیڤالێ و وه هه‌میا دخوازم. هیڤیدارم فه‌ستیڤالا ناڤنه‌ته‌وه‌یى یا فیلمان یا دهۆكێ وئه‌ڤ دیداره، ببیته گاڤه‌كا دى یا پێشڤه‌چوونا سینه‌مایا كوردى وكارسازى یا سینه‌مایێ ل هه‌رێما كوردستانێ، هه‌روه‌سا ژى تێكه‌لى یێن ناڤبه‌را سینه‌ماكارێن كوردستانێ وجیهانێ فه‌ره‌هتر وباشتر بكه‌ت.
ئاماده‌بوویێن هێژا،
ئه‌م كه‌یخۆشین كو دناڤبه‌را شه‌ڕ وقه‌یرانێن داراییدا، هوین شیان ئیسال ژى گه‌ڕا شه‌شێ یا فه‌ستیڤالا ناڤنه‌ته‌وه‌یى یا فیلمان یا دهۆكێ به‌رده‌وام بكه‌ن. بگه‌رمی بخێرهاتنا هه‌می سینه‌ماكارێن جیهانێ ویێن كورد دكه‌ین كو هه‌ر ئێك ژ وان ژ ئالیه‌كێ دنیایێ زه‌حمه‌ت كێشایه وهاتینه هه‌رێما كوردستانێ. ئه‌م شانازیێ دكه‌ین كو فه‌ستیڤالا ناڤنه‌ته‌وه‌یى یا فیلمان یا دهۆكێ ب به‌رنامه و ڕێكخستن و مێهڤانێن خۆ، بوویه ئێك ژ فه‌ستیڤالێن دیار یێن ڕۆژهه‌لاتا ناڤین.
د فه‌ستیڤالێدا وێنه‌یێن هه‌رى دیار یێن سینه‌مایا كوردی ژ هه‌موو به‌شێن كوردستانێ ودیاسپۆرایێ، هه‌روه‌سا به‌رهه‌مێن هه‌رى نوو یێن سینه‌مایا جیهانێ ژى تێنه نیشاندان. ئه‌م كهیفخۆشین كو فه‌ستیڤال بناڤێ سه‌مبۆلا سینه‌مایا كوردی (یلماز گوینه‌ی) خه‌لاتێ فیلما هه‌رى باش پێشكێش دكه‌ت.
دهۆكێ نه بتنێ ب فه‌ستیڤالا خۆ یا فیلمان یا ناڤنه‌ته‌وه‌یى، لێ به‌لێ ب به‌رهه‌مێن خۆ یێن سینه‌مایى یێن هه‌ڤبه‌شێن جیهانی ژى، خۆ دایه ناسكرن. فه‌ستیڤال ژبۆ هه‌رێما كوردستانێ بوویه ده‌رییه‌ك كو ببه‌رهه‌مێن خۆ شیایه خه‌لاتێن جیهانی وه‌ربگریت، هه‌روه‌سا وه‌زاره‌تا ڕه‌وشه‌نبیری یا هه‌رێما كوردستانێ ب ڕێیا ڕێڤه‌به‌ریا هونه‌را سینه‌مایێ ل دهۆكێ شیایه بهه‌ڤپشكی دگه‌ل وه‌لاتێن وه‌ك (نه‌رویج، ئه‌لمانیا و فره‌نسا) فیلمێن سینه‌مایی ژبۆ سینه‌ماكارێن كورد به‌رهه‌م بینیت. فه‌ستیڤالا فیلمان یا دهۆكێ بڕێیا ڤان به‌رهه‌مان، شیایه ببیته نوینه‌را عیراقێ ل خه‌لاتێن ئاسیا پاسیفیك (APSA) ژى.
ئه‌م كهیفخۆشین كو ئیسال ژبۆ جارێ ئێكێ ڕێكخراوا ڕه‌خنه‌گرێن جیهانی فێپرسكی ژى بوویه پارتنه‌را فه‌ستیڤالێ و دێ خه‌لاتێ وان ژى هێته پێشكێشكرن. بگه‌رمی بخێرهاتنا دادوه‌رێن وان ژبۆ كوردستانێ دكه‌ین.
ئه‌م وه‌كى حكوومه‌تا هه‌ڕێما كوردستانێ، ئاڤاكرنا پیشه‌سازیه‌كا هه‌ڤچه‌رخ یا سینه‌مایێ، هه‌روه‌سا چێبوونا په‌یمانگه‌هێن نیشتمانى یێن سینه‌مایێ پێویست دبینین داكو ژبۆ سینه‌مایا كوردی هه‌م ببیته نه‌خشه‌ڕێیه‌كا نوو، هه‌م ژى ببیته بنگه‌هه‌كێ سیاسه‌تا مه یا كولتوورى كو تێدا سینه‌ما ببیته خودانا پاشه‌ڕۆژه‌كا گه‌ش و جهه‌كێ تایبه‌ت بگریت.
مێهڤان و ئاماده‌بوویێن هێژا،
حكوومه‌تا هه‌رێما كوردستانێ ب بها و گرنگى ل سینه‌مایێ و كارسازى یا سینه‌مایێ دنێڕیت. هه‌تا به‌رى ده‌سپێكا ساڵا 2014ێ كو گه‌له‌ك ئاریشه و قه‌یرانێن مه‌زن بسه‌ر كوردستانێدا هاتن، مه گه‌له‌ك جارا هاریكاریا سینه‌ماكارێن كوردستانێ كریه و مه پشتگیرى دایه فیلمێن وان یێن سینه‌مایى، لێ به‌لێ مخابن پشتى ڕه‌وشا گرانا كو ده‌سپێكا سالا 2014ێ بسه‌ر مه‌دا هاتى، ئه‌م نه‌شیاین وه‌ك پێویست هاریكاریا كار و پڕۆژه‌یێن سینه‌مایى بكه‌ین.
هوین هه‌مى باش ده‌زانن، بڕینا بوتچه‌یا هه‌رێما كوردستانێ، سه‌پاندنا شه‌ڕێ مه‌زنترین ڕێكخراوا تیرۆرستى ل جیهانێ "داعش" بسه‌ر كوردستانێدا، ڤێجا ئه‌نجامێن شه‌ڕى و هاتنا نێزیكى دو ملیۆن ئاواره و په‌نابه‌را ژبۆ هه‌رێما كوردستانێ، بسه‌ردا ژى كه‌فتنا به‌هایێ نه‌فتێ ل جیهانێ، ئێك لدویڤ ئێكێ، دربێن مه‌زن بوون كو ب هه‌رێما كوردستانێ كه‌فتن و باوه‌ر ناكه‌م ل هه‌مى جیهانێ چ حكوومه‌تێن دى هه‌بن، خۆ لبه‌ر ڤان هه‌مى دربا بگریت.
ب خۆڕاگریا پێشمه‌رگێن قه‌هره‌مان و هێزێن ناڤخۆ و گه‌لێ كوردستانێ بگشتى، مه ئه‌ڤ هه‌مى دژوارى و ئه‌ڤ هه‌مى قه‌یرانه ده‌رباز كرن. نهۆ كو ئه‌م جاره‌كا دى به‌ره‌ڤ پێش گاڤا دهاڤێژن و ئه‌م دخوازین جاره‌كا دى وه‌ك به‌رێ ده‌ست ب ئاڤاكرن و پێشڤه‌برنا هه‌رێما كوردستانێ د هه‌مى وارادا بكه‌ین، بێگومان ژیانا كولتوورى و هونه‌ر و سینه‌ما ژى، دێ ئێك ژ وان ئالیا بیت یێن كو ئه‌م دخوازین د قۆناغێن داهاتیدا گرنگییا پێویست بده‌ینێ.
ئه‌م باش گرنگیا سینه‌مایێ و ڕۆلێ وێ ل جیهانێ دزانین، هه‌روه‌سا ئه‌م گه‌له‌ك باش دزانین كو سه‌رپێهاتى و دیرۆكا گه‌لێ كوردستانێ، ژبۆ كار و به‌رهه‌مێن سینه‌مایێ گه‌له‌ك و گه‌له‌كا ده‌وله‌مه‌نده و د ژیانا گه‌لێ مه یا چۆییدا ب هزاران چیرۆك و سه‌رپێهاتى هه‌نه كو دشێن ببنه بابه‌ت و ناڤه‌ڕۆكێن گه‌له‌ك كارێن سینه‌مایى یێن سه‌ركه‌فتى ل سه‌ر ئاستێ هه‌مى جیهانێ.
نه هه‌ر بتنێ دیرۆك و سه‌رپێهاتى یێن مه و داستان و شۆڕش و سه‌رهلدانێن گه‌لێ كوردستانێ یێن ژبۆنا ئازادیێ، نه هه‌ر بتنێ قه‌هره‌مانى یێن پێشمه‌رگا و چیرۆك و سه‌رهاتى یێن ئاشقانه یێن ناڤدارێن ئه‌ڤیندارا د دیرۆك و ئه‌ده‌بیاتا كوردستانێدا، لێ به‌لێ كوردستان ب خۆ ژى وه‌ك جهـ و جوگرافیا، دشێت ئێك ژ باشترین لۆكه‌یشنا بیت ژبۆ گه‌له‌ك كار و به‌رهه‌مێن سینه‌مایى، نه بتنێ یێن كوردستانێ، لێ به‌لێ یێن جیهانێ ژى.
ڤێجا ل ئالیێ دى، عیشق و ئه‌ڤینا مه‌زن یا سینه‌ماكارێن كورد ژبۆ كارێ خۆ، دلسۆزى و خه‌ونێن وان یێن مه‌زن یێن ژبۆ پێشڤه‌برنا سینه‌مایا كوردى، ئه‌و ژى پالده‌ره‌كه كو هیڤى یێن پێشكه‌فتنێ و پاشه‌ڕۆژه‌كا ڕۆن یا سینه‌مایا كوردى گه‌شتر دكه‌ن و مه ژى هان دده‌ن كو ئه‌م گه‌رموگوڕتر پشته‌ڤانیا سینه‌مایێ و كارێن سینه‌مایى یێن كوردى بكه‌ین.
دخوازم وه هه‌میا پشتڕاست بكه‌م كو قۆناغا بهێت ل كوردستانێ دێ قۆناغا گرنگیدانه‌كا تایبه‌ت بیت ب پێشڤه‌برنا ژیانا كولتوورى و هونه‌رى. حكوومه‌تا هه‌رێما كوردستانێ دێ هه‌مى هه‌ولا ده‌ت داكو لدویڤ پێچێبوون و ئیمكانێن كو هه‌نه، كێماسى یێن ژ نه‌چارى هه‌یاما پترى چار سالێن چوویى د هه‌مى وارێن ژیانێدا چێبووى، ڕاستڤه بكه‌ت.
ڕه‌وشا گران و دژوارا چار سالێن چوویى، باندۆره‌كا نه‌رێنى، نه هه‌ر بتنێ ل كولتوور، هونه‌ر و سینه‌مایێ، لێ به‌لێ ل هه‌مى وارێن ژیانێ كربوو. ئه‌م دێ هه‌مى هه‌ولا ده‌ین هێدى هێدى و گاڤ ب گاڤ ئه‌نجامێن نه‌رێنى یێن ڕه‌وشا چوویى، سه‌راست بكه‌ین.
بتایبه‌تى ژبۆ پشتگیرى و ئالیكاریا سینه‌مایێ، ئه‌م دێ گه‌له‌ك هه‌وجه‌ى دیتن و نێڕین و به‌رنامه و پڕۆژه‌یێن وه بین. چاڤێ مه لێ یه كو هوین ب دیتن و نێڕین و پێشنیار و پڕۆژه‌یێن خۆ، ژبۆ پرۆگرامه‌كێ ئالیكارى و پشته‌ڤانیا سینه‌مایێ ل هه‌رێما كوردستانێ، هاریكاریا مه بكه‌ن.
هون دشێن ب ڕێیا وه‌زاره‌تا ڕه‌وشه‌نبیرى و ده‌زگه‌هـ و سازى یێن دى یێن هونه‌رى و كولتوورى ل هه‌رێما كوردستانێ، دیتن و نێڕینێن خۆ بگه‌هینن و دڤى بابه‌تیدا ببنه هاریكار. ئه‌م بتایبه‌تى ژى دخوازین كه‌رتێ تایبه‌ت ل كوردستانێ هان بده‌ین كو ببنه به‌شه‌كێ ئه‌كتیڤ یێ هاریكارى و پشته‌ڤانیا سینه‌مایێ. ئه‌م دخوازین و دێ هاریكار بین داكو كه‌رته‌كێ بهێز یێ سینه‌مایێ و به‌رهه‌مئینانا سینه‌مایى ل هه‌رێما كوردستانێ ئاڤا ببیت.
جاره‌كا دى بخێرهاتنه‌كا گه‌ر‌ما وه هه‌میا دكه‌م، هیڤیا سه‌ركه‌فتنێ ژبۆ فه‌ستیڤالێ و وه هه‌میا دخوازم. هیڤیدارم ڤان چه‌ند ڕۆژا ل باژێرێ جوانێ دهۆكێ، ده‌م و گاڤێن خۆش ده‌رباز بكه‌ن وفیلمێن باش وسه‌ركه‌فتى بێنه پێشكه‌شكرن. دوباره بخێرهاتنه‌كا تایبه‌ت یا مێهڤان وسینه‌ماكارێن بیانى و یێن كورد ژى دكه‌م یێن كو زه‌حمه‌ت كێشاى و ژ ده‌رڤه هاتى.
ب هیڤیا كو فه‌ستیڤالا ناڤنه‌ته‌وه‌یى یا فیلمان یا دهۆكێ و ئه‌ڤ دیداره، هه‌ماهه‌نگى و هاریكاریا ناڤبه‌را سینه‌ماكارێن كوردستانێ و جیهانێ زێده‌تر و فه‌ره‌هتر بكه‌ت و ئه‌م كارێن هه‌ڤبه‌شێن سینه‌ماكارێن كوردستانێ و جیهانێ لسه‌ر په‌رده‌یێن سینه‌مایێ ل سالۆنێن ناڤدارێن سینه‌مایێ ل جیهانێ ببین.
لدیماهیێ، سوپاسیا ڕێكخه‌رێن فه‌ستیڤالێ دكه‌م، دیسا وان پشتڕاست دكه‌م كو دێ لسه‌ر پشته‌ڤانیا فه‌ستیڤالا ناڤنه‌ته‌وه‌یى یا فیلمان یا دهۆكێ به‌رده‌وام بین، هه‌روه‌ك چه‌وا مه پشته‌ڤانى و ئالیكاریا فه‌ستیڤالا ناڤنه‌ته‌وه‌یى یا فیلمان یا سلێمانیێ یا ده‌هى ڤێ هه‌یڤێ و گه‌له‌ك كار و چالاكى یێن دى یێن كولتوورى و هونه‌رى كریه.
گه‌له‌ك سپاس وده‌مه‌كێ خۆش.