له په‌یامێكدا حكوومه‌تى هه‌رێمى كوردستان هێرشه تیرۆرستییه‌كانى دوێنێ ئێواره و شه‌وى ڕابردوو له بارسه‌لۆنا و شارۆچكه‌ى ئه‌لكانار له هه‌رێمى كه‌ته‌لۆنیاى ئیسپانیا سه‌ركۆنه ده‌كات و پشتیوانى و هاوخه‌مى له‌گه‌ڵ كه‌ته‌لۆنیا و ئیسپانیا ده‌رده‌بڕێت، ئه‌مه ده‌قه‌كه‌یه‌تى:
به توندى ئه‌و هێرشه تیرۆرستیانه سه‌ركۆنه ده‌كه‌ین كه دوێنێ ئێواره و شه‌وى ڕابردوو له بارسه‌لۆنا و شارۆچكه‌ى ئه‌لكانار له كه‌ته‌لۆنیاى ئیسپانیا كرانه خه‌ڵكى سڤیل و به‌هۆیه‌وه ژماره‌یه‌ك له هاووڵاتیان و گه‌شتیارانى وڵاتان گیانیان له ده‌ست دا و بریندار بوون.
ئێمه له هه‌رێمى كوردستان كه ئه‌زموونى تاڵمان له‌گه‌ڵ تیرۆردا هه‌یه، باشتر له ئێش و ئازارى ئه‌و هێرشانه تێده‌گه‌ین و هاوسۆز و هاوخه‌م و پشتیوانى كه‌ته‌لۆنیا و ئیسپانیا به گشتین و پرسه سه‌ره‌خۆشیى خۆمان پێشكه‌ش به كه‌سوكارى قوربانیان و گه‌ل و حكوومه‌تى كه‌ته‌لۆنیا و ئیسپانیا ده‌كه‌ین.
تا دێت له ئه‌نجامى دووباره‌بوونه‌وه‌ى هێرشه تیرۆرستییه‌كان و فراوانبوونى ڕووبه‌رى چالاكییه‌كانیان له وڵاتانى جیهانن، ئه‌و ڕاستییه خۆى دووپات ده‌كاته‌وه كه به‌ره‌ى دژه‌تیرۆرى جیهانى پێویستى به ته‌كانێكى به‌هێزتر، كارى هاوبه‌ش، هاوكارى و هه‌ماهه‌نگییه‌كى فراوانترى كۆمه‌ڵگه‌ى نێوده‌وڵه‌تییه، بۆ ئه‌وه‌ى بتوانرێت ڕێگرى له‌و تاوانانه بكرێت و ئه‌و بیره تاریكه‌ى تیرۆرستان ده‌یانه‌وێت بیسه‌پێنن، ته‌فروتووتا بكرێت.
هاوخه‌مى و پشتیوانیمان بۆ كه‌سوكارى قوربانیان و گه‌ل و حكوومه‌تى كه‌ته‌لۆنیا و ئیسپانیا دووپات ده‌كه‌ینه‌وه، هیوادارین ئه‌و تاوانه ڕه‌شانه له هیچ شوێنێك دووباره نه‌بنه‌وه.
حكوومه‌تى هه‌رێمى كوردستان
18/8/2017