ئێواره‌ی ئەمڕۆ دووشەممە 18 شوباتی 2019 به‌ڕێز قوباد تاڵه‌بانی جێگری سەرۆك وەزیرانی هەرێمی كوردستان، لەگەڵ كونسوڵی گشتی هۆڵەندا و ژمارەیەك كەسایەتیی ئەكادیمی ئەو وڵاتە و چەند وەزیر و بەرپرسێكی حكوومی و وەبەرهێنی ناوخۆییدا، تاوتوێی پەرەپێدانی كەرتی كشتوكاڵی كرد.
لە كۆبوونەوەكەدا گفتوگۆ لەسەر چۆنییەتیی پەرەپێدانی كەرتی كشتوكاڵ لە هه‌رێمی كوردستان كرا و له‌مباره‌یه‌وه كونسوڵی گشتیی هۆڵەندا خواستی وڵاتەكەی بۆ پەرەپێدانی كاری هاوبەش لەگەڵ هەرێمی كوردستان خستەڕوو بەتایبەت لەبواری گواستنەوەی شارەزایی و ئەزموونی هۆڵەندا و سوود بینین لە كێڵگە كشتوكاڵییەكانی هەرێم.
هەر لە كۆبونەوەكەدا مامۆستایانی زانكۆكانی هۆڵەندا چۆنییەتیی مامەڵەكردنی تەندروستیان لەگەڵ كەرتی كشتوكاڵ خستەڕوو بەتایبەت ئیدارەدانی زانستیانەی سامانی ئاو كە پایەی سەرەكیی كشتوكاڵكردنە.
لای خۆیه‌وه به‌ڕێز جێگری سەرۆك وەزیران ئاشكرای كرد كه بڕیاریان ئەوەیە بۆ داهاتوو كەرتی كشتوكاڵ بخەنە كاره لەپێشینەكانیان لەپێناو پاراستنی ئاسایشی خۆراك و نەتەوەیی، ڕەخساندنی هەلی كار و كۆتاییهێنان بەپشت بەستن بەیەك سەرچاوەی داهات كە سامانی سروشتییە.