سەرۆکی دیوانی ئەنجومەنی وەزیران سەردانی زانکۆی سلێمانی كرد

ڕۆژی چوارشەممە 31ـی تەمموزی 2024، د. ئومێد سەباح، سەرۆکی دیوانی ئەنجومەنی وەزیران، سەردانی زانکۆی سلێمانی کرد، لەلایەن د. کۆسار محەمەد، سەرۆکی زانکۆ و ستافی ئەنجومەنی زانکۆی سلێمانی و مامۆستایانی زانکۆکە پێشوازی لێ کرا.

لە کۆبوونەوەکەدا کە د. ئارام محەمەد، وەزیری خوێندنی باڵا و توێژینەوەی زانستی حکومەتی هەرێم، عەتا محەمەد، بەرپرسی نوسینگەی جێگری سەرۆکی حکومەتی هەرێم و د. هەڤاڵ ئەبوبەکر، پارێزگاری سلێمانی ئامادەی بوون، بیروڕا لەبارەی ڕەوشی خوێندنی باڵا، لە سنووری پارێزگه‌ی سلێمانی و زانکۆکە و بەرەوپێشبردنی زانکۆ و ئەم کەرتە و هەنگاوی جددی و زانستی بۆ ڕەنگدانەوەی ئەم زانکۆیانە لە هەرێم و سوودبینین لە زانکۆکان، وەک سەرچاوەیەکی مرۆیی بۆ ئاییندەی هەرێم و بەرزبوونەوەی ئاستی توانای زانستيی زانکۆ و مامۆستایان و قوتابیيان و خوێندکاران و پێداویستییەکانی زانکۆکە ئاڵوگۆڕ کران.

هەر لە دیدارەکەدا پاڵپشتيی حکومەتی هەرێم بۆ کەرتی خوێندنی باڵا و توێژینەوەی زانستی و زانکۆکان دووپات کرایەوە و ئامادەیی نیشان درا بۆ هەر پلان و بەرنامەیەک کە ببێتە هۆی پێشخستنی ئەم کەرتە و زانکۆکە.

هەر لە درێژەی کۆبوونەوەکەدا باس لە کێشە و گرفتەکانی زانکۆ کرا و باس لە ڕێکارەکانی چارەسەریان کرا، هەروەها باس لە ڕۆلی زانکۆی سلێمانی کرا و تیشک خرایە سەر بەرەوپێشبردنی ئاستی زانستيی زانکۆی سلێمانی و زانکۆکانی هەرێم لە بواری توێژینەوەی زانستی.