Skip to the content

نوێترین زانیاری

 بۆ دەستکەوتنی نوێترین زانیاری دەربارەی بارودۆخی هەرێمی کوردستان، بەردەوام سەیری ئەم پێگەیە بکە. بۆ زانیاری دەربارەی ڤایرۆسی کۆڕۆنا و چۆنیەتی خۆپاراستن لێی، سەردانی پەڕەی ڤایرۆسی کۆڕۆنا؛ بکە.

 

پوختەی بارودۆخەکە

بڵاوبوونەوەی ڤایرۆسی کۆڕۆنای نوێ (کۆڤید-١٩) بە شێوەیەکی خێرا لە گۆڕاندایە لە جیهاندا. حکومەتی هەرێمی کوردستان بە شێوەیەکی بەردەوام نوێکارییەکان بەردەست دەخات.

حکومەتی هەرێمی کوردستان بەشێوەیەکی بەردەوام چاودێری بارودۆخەکە دەکات و ئامادەکاری تەواویشی کردووە بۆ بەرەنگاربوونەوەی حاڵەتەکە. لە حاڵەتی هەستکردن بە نیشانەکان لەخۆتدا یا لە هەر کەسێکی تردا تکایە پەیوەندی بەم هێڵە گەرمەوە بکە تەنها وەزارەتی تەندروستی و رێکخراوی تەندروستی جیهانی رێگەپێدراون بۆ پشتڕاستکردنەوەی تۆمارکردنی توشبوو بە ڤایرۆسی کۆڕۆنا لە هەرێمی کوردستان.

 

حاڵەتەکان لە هەرێمی کوردستان

وەزارەتی تەندروستی بە ووردی چاودێری بوونی حاڵەتی ڤایرۆسی کۆڕۆنا دەکات.

(نوێکراوەتەوە لە کاتژمێر ١٧:٣٠، ٢٠٢٠/٠٩/١٩)

کۆڤید-١٩: پوختەیەک لەسەر هەرێمی کوردستان*

کۆی گشتی حاڵەتە پشتڕاستکراوەکان: ٤٠،٥٥٨

چاکبووەکان: ٢٥،٧٩٧

مردووەکان: ١،٤٩٥

لەزێرچارەسەردا: ١٣،٢٦٦

*ئەم داتایانە پێکهاتووە لە پوختەیەک لە ژمارەی حاڵەتەکانی ڤایرۆسی کۆرۆنا کە تۆمارکراوە لەلایەن وەزارەتی تەندروستی هەرێمی کوردستان لە رێکەوتی (٢٠٢٠/٠٣/٠١)ەوە.

*کۆڤید-١٩: ژمارەی پشکنینەکان لە هەرێمی کوردستان

 ژمارەی پشکنینی نموونەی وەرگیراو

٤١٤،٠٥٧

کۆی گشتی پشکنینی نموونەی وەرگیراو

ئەنجامی پشکنینەکان

٤٠،٥٥٨

ژمارەی حاڵەتی ئەرێنی

٣٧٣،٤٩٩

ژمارەی حاڵەتی نەرێنی

٠

ژمارەی نموونەی ژێر پشکنین

٤٠،٥٥٨

کۆی گشتنی حاڵەتە پشتڕاستکراوەکان

*ئەم خشتەیە پێکهاتووە لە ژمارەی ئەو کەسانەی کە نموونەیان لێوەرگیراوە بۆ پشکنینی توشبوون بە ڤایرۆسی کۆڕۆنا لەگەڵ ژمارەی حاڵەتە پشتڕاستکراوەکان لە هەرێمی کوردستان لەلایەن وەزارەتی تەندروستییەوە.

 

حکومەتی هەرێم چی دەکات بۆ ئامادەکردن و پاراستنی کۆمەڵگا

بۆ پاراستنی هەرێمی کوردستان لە ڤایرۆسی کۆڕۆنا، حکومەت و وەزارەتە پەیوەندیدارەکان ئەم رێکارانە دەگرنە بەر:

هاتووچۆكردنی هاووڵاتیان لە نێوان پارێزگاكانی هەرێم
  • بەڕەچاوکردنی رێکارەکانی خۆپارێزی دەسەڵات دەدرێت بە پارێزگار و سەرپەرشتیاری ئیدارە سەربەخۆکان بە مەبەستی:

    • ئاسایی کردنەوەی هاتووچۆکردن لە نێوان پارێزگا و ئیدارە سەربەخۆکان.

    • رێکخستنی هاتووچۆکردن لە نێوان ئەو پارێزگا و ئیدارە سەربەخۆیانەی کە هاوسنوورن لەگەڵ پارێزگاکانی عێراق.

    • ئاڵوگۆرکردنی هێزە ئەمنییەکانی ناو هەرێم لە نێوان پارێزگا و ئیدارە سەربەخۆکان و لە نێوان هەرێم و پارێزگاکانی عێراق.
  • لە رابردوودا راگرتنی هاتووچۆكردنی هاووڵاتیان لە نێوان گشت پارێزگاكانی هەولێر و سلێمانی و دهوك و هەڵەبجە و ئیدارە سەربەخۆكانی ڕاپەرین و گەرمیان و گشت یەکە کارگێڕییەکان و شار و شارۆچکەکانیان لە ٢٠٢٠/٠٥/٣١ کاتژمێر (١٢:٠٠)ی شەو تا ٢٠٢٠/٠٧/٠١ کاتژمێر (١٢:٠٠)ی شەو راگەیەندرابوو.

  • پەرلەمانتارانی پەرلەمانی كوردستان رێگەپێدراون بە هاتووچۆكردنی لە نێوان پارێزگاكانی هەرێمی كوردستان بە ڕەچاوكردنی رێنماییە تەندروستیەكان.

  • هاتووچۆی دیپلۆماتكارانی بیانی و هێزی هاوپەیمانان لە نێوان پارێزگا و ئیدارە سەربەخۆكان رێگەپێدراوە.
  •  هاتووچۆی دیپلۆماتكارانی بیانی و هێزی هاوپەیمانان لە نێوان پارێزگا و ئیدارە سەربەخۆكان رێگەپێدراوە.

  • هاتووچۆكردنی ئاژانس و رێكخراوەكانی (UN) و رێكخراوە نێودەوڵەتیەكان بەم شێوەیەی خوارەوە دەبێت:

    • هاتووچۆکردنی ئاژانس و رێکخراوەکانی (UN) و رێکخراوە نێودەوڵەتیەکان لە ناو هەرێم و لە نێوان هەرێم و پارێزگاکانی عێراق لە لایەن ناوەندی هاوبەشی هاماهەنگی قەیرانەکان رێکدەخرێت.
    • هاتووچۆکردنی ئاژانس و رێکخراوەکانی (UN) و رێکخراوە نێودەوڵەتیەکان لە ناو هەرێم و لە نێوان هەرێم و دەرەوەی عێراق لە لایەن فەرمانگەی پەیوەندییەکانی دەرەوە رێکدەخرێت.
  • ​​رێگەپێدانی كومپانیاكانی پەیوەندییەكان و كومپانیاكانی نەوت لە لایەن وەزارەتی ناوخۆ/بەرێوبەرایەتی گشتی دیوان دەدرێت بە هەماهەنگی لەگەڵ وەزارەتی گواستنەوە و گەیاندن و وەزارەتی سامانە سروشتیەكان.

  • ئاڵوگۆڕی هێزە ئەمنیەكانی ناو هەرێم لە نێوان پارێزگا و ئیدارە سەربەخۆكان تەنها لە رۆژانی (شەممە و چوارشەممە)ی هەموو پانزدە رۆژ جارێك ئەنجام دەدرێت و دەبێت نوسراوی پشتگیری وەزارەتی ناوخۆیان پێ بێت و پێویستە بەر لە (٤٨) كاتژمێر لە دەست پێ كردنی پرۆسەی ئالۆگوركردنیان ناوەكان ئاراستەیی وەزارەتی ناوخۆ بكرێت.
هاتووچۆکردن لە نێوان هەرێمی كوردستان و پارێزگاكانی تری عێراق
  • بەڕەچاوکردنی رێکارەکانی خۆپارێزی دەسەڵات دەدرێت بە پارێزگار و سەرپەرشتیاری ئیدارە سەربەخۆکان بە مەبەستی رێکخستنی هاتووچۆکردن لە نێوان ئەو پارێزگا و ئیدارە سەربەخۆیانەی کە هاوسنوورن لەگەڵ پارێزگاکانی عێراق.

  • بەمەبەستی پشتگیری کردنی جوتیاران و خاوەن کێڵگە پەلەوەریەکان ئاسانکاری تەواو دەکرێت بۆ ناردنی بەرهەمی کشتوکاڵی و پەلەوەری بۆ پارێزگاکانی عێراق.

  • پەرلەمانتارانی كوردستان لە پەرلەمانی بەغدا و پەرلەمانتارانی عێراق كە نیشتەجێی هەرێمی كوردستان رێگەپێدراون بە هاتووچۆكردنی نێوان هەرێمی كوردستان و پارێزگاكانی عێراق بە ڕەچاوكردنی رێنماییە تەندروستییەكان.
  • ئەو هاووڵاتیانەی لە پارێزگاكاتی عێراق یان ناوچە كوردستانیەكانی دەرەوەی ئیدارەی هەرێم دەگەرێنەوە، چ هاووڵاتی سیڤیل بن یان سەر بە هێزە ئەمنییەكان بن دەبێت لەسەر ئەركی خۆیان بۆ ماوەی (٤٨) كاتژمێر كەرەنتین بكرێن تا دەرچوونی دەرئەنجامی پشكنینی ڤایرۆسی كۆرۆنا كە تێچووی پشكنینەكە لە ئەستۆی خۆیان دەبێت و دەبێت لە ماڵەوە خۆی كەرەنتین بكات، یان بڕوانامەی تووش نەبوونیان لەگەڵدا بێت كە پێش (٢٤) كاتژمێر لە هاتنیان بۆ هەرێمی كوردستان دەرچووبێت و دەبێت لە ماڵەوە خۆی كەرەنتین بكات.

  • ئاڵوگوری ئەو هێزە ئەمنیانەی كە لە پارێزگاكانی عێراق ئەرك دەبینن و دانیشتوی هەرێمن بەم میكانیزمەی خوارەوە دەبێت:
    • ناردنی لیستی ناوەكان بۆ نوێنەرایەتی حكومەتی هەرێم لە بەغدا بەر لە (٤٨) كاتژمێر لە دەست پێكردنی پروسەی گوڕینیان.
    • نوێنەرایەتی حكومەتی هەرێم ناوەكان رەوانەی وەزارەتی ناوخۆی هەرێمی كوردستان دەكات بە مەبەستی رێكخستنی میكانیزمی ئاڵوگوڕكردنیان.
  • لە رابردوودا راگرتنی هاتن و چوون لە نێوان هەرێمی كوردستان و پارێزگاكانی تری عێراق لە نێوان ٢٠٢٠/٠٣/١٤ تا ٢٠٢٠/٠٧/٢٣ بە چەند هەنگاوێک راگەیەندرابوو.
راگرتنی هاتووچۆ لە سەرتاسەری هەرێمی کوردستان
  • دەسەڵات دەدرێت بە پارێزگار و سەپەرشتیاری ئیدارە سەربەخۆكان بۆ راگەیاندنی قەدەغەی هاتووچۆی تەواو یان سنوردار بە پێی پێویست.

  • دەسەڵات دەدرێت بە پارێزگا و سەرپەرشتیاری ئیدارە سەربەخۆکان بە مەبەستی رێگەپێدان بە کردنەوەی ئەو شوێنە خزمەتگوزارییانەی کە پێویستن بۆ هاووڵاتیان و داخستنی ئەو شوێنانەی کە سەرپێچی دەکەن.

  • لە رابردوودا ماوەی راگرتنی هاتووچۆ لە ناو هەر دوو شاری هەولێر و سلێمانی سەرەتا بۆ ماوەی (٤٨) كاتژمێر راگەیاندرا کە لە كاتژمێر (١٢:٠٠)ی شەوی ٢٠٢٠/٠٣/١٣ تاکو کاتژمێر (١٢:٠٠)ی شەوی ٢٠٢٠/٠٣/١٥ هەروەها بۆ ماوەی (٧٢) کاتژمێر درێژکرایەوە. دواتر لە تەواوی پارێزگاكانی هەولێر و سلێمانی و دهۆك و هەڵەبجە و ئیدارە سەربەخۆكانی ڕاپەرین و گەرمیان و گشت یەكە كارگێرییەكانيان لە كاتژمێر (١٢:٠٠)ی شەوی ٢٠٢٠/٠٣/١٨ تا ٢٠٢٠/٠٥/١٠ و لە ٢٠٢٠/٠٦/٠١ کاتژمێر (٠٦:٠٠)ی ئێوارە تا ٢٠٢٠/٠٦/٠٣ کاتژمێر (٠٦:٠٠)ی ئێوارە راگەیاندرا لە بەچەند قۆناخێک.

  • رێگە دەدرێت بە هاتووچۆكردنی ئۆتۆمبێلی هێزە ئەمنییەكان و تیمە تەندروستییەكان و ئۆتۆمبێلی ئەمبولانس ئەوانەی لە ئەركی فەرمیدان.
  • هاتووچۆكردنی ئاژانس و رێكخراوەكانی (UN)، هاوپەیمانان و هاتووچۆی بازرگانی لەنێوان پارێزگاكان و ئیدارە سەربەخۆكان ریگە پێدراوە.

  • ئەو خێزانانەی كە لە ناو هەرێمی كوردستان بەهۆی قەدەغەی هاتووچۆ لەیەك دابڕاون، لەكاتژمێر (١٢:٠٠)ى شەوی رۆژی ٢٠٢٠/٠٤/١٠ بۆ ماوەی (٢٤) كاتژمێر رێگایان پێ دەدرێت بگەرێنەوە ماڵەكانی خویان لە نێوان پارێزگا و ئیدارە سەربەخۆكان، بە مەرجێك كارتی زانیاری ئەو پارێزگایەیان هەبێت كە بۆی دەچن و لە بازگەكان پێویستە پێیان بێت. ئەم پرۆسەیە بە هەماهەنگی لە نێوان ژووری ئۆپەراسیۆنەكانی پارێزگا و ئیدارە سەربەخۆكان و وەزارەتی ناوخۆ ئەنجام دەدرێت.

  • لێژنەیەك بە سەرۆكایەتی قائیمقامی قەزاكان و ئەندامێتی نوێنەرانی پۆلیس و ئاسایش پێك دێت بۆ پێدانی رێگەپێدان لە حاڵەتی زۆر پێویست.

  • رێگەپێدانی كۆمپانیا نەوتییەكان بە هەماهەنگی لەگەڵ وەزارەتی سامانە سروشتییەكان دەبێت، و كۆمپانیاى پەیوەندییەكان و رێگەپێدانە تایبەتەكان بە هەماهەنگی لەگەل لایەنە پەیوەندیدارەكان دەبێت، و ئەو رێگەپێدانانە تەنها لەلایەن (وەزارەتی ناوخۆ/ بەرێوەبەرایەتی گشتی دیوان) دەدرێت.

  • هاتووچۆ لە نێوان پارێزگاكان و ئیدارە سەربەخۆكان بە هەموو شێوەیەك ڕادەگیرێت، و لە حاڵەتی زۆر پێویست تەنها بە ڕەزامەندی ژووری ئۆپەراسیۆنەكانی پارێزگا و ئیدارە سەربەخۆكان دەبێت. هەر كەسێك سەر بە هێزە ئەمنییەكانی ڕاسپێردراو بە جێبەجێ كردنی رێكارەكانی ئاماژەپێکراو كەمتەرخەمی بنوێنێت لە جێبەجێ كردنی یان پێشێلی بكات، ئەگەر لە ئەركدا نەبێت بە (١٠) ڕۆژ زیندانی سزا دەدرێت بە پێی ماددەی (٤٧ و ٤٨) لە یاساى سزادانی هێزەكانی ئاسایشی ناوخۆ ژمارە (١٣)ی ساڵی ٢٠٠٨.

  • هەر لێژنەیەك رێگەپێدانێك بدات بەبێ ئەوەی پێویست بێت، ئەگەر ئەندامەكەی لەسەر ڕاژەی هێزەكانی ئاسایشی ناوخۆ بێت بە هەمان بڕگەی سەرەوە سزا دەدرێت، و ئەگەر لەسەر ڕاژەی شارستانی بێت بە سزای سەرنج ڕاكێشان و دوورخستنەوە لە پۆستەكەی سزا دەدرێت.

  • هیچ فەرمانبەر، ئەفسەر، یان كارمەندێك كە لە پارێزگاكانی تری عێراق خزمەت دەكەن رێگایان پێ نادرێت بگەرێنەوە هەرێمی كوردستان تا ٢٠٢٠/٠٤/٠١، ئەگەر دانیشتووی هەرێمی كوردستانیش بن.

  • بەڕێوەبەرانی گشتی كارەبا لە پارێزگا و ئیدارە سەربەخۆكان دەبنە ئەندام لە ژووری ئۆپەراسیۆنەكان بەمەبەستی هەماهەنگی و رێكخستنی بابەتی هاتووچۆی تیمەكانی كارەبا و گەیاندنی سووتەمەنی بە وێستگەكانی بەرهەمهێنانی كارەبا لە هەرێم.

  • پێویستە هاووڵاتیان لە ماڵەكانی خۆیان بمێننەوە تا تیمە تەندروستییەكان بتوانن كاری خۆیان ئەنجام بدەن و بۆ هەر حاڵەتێكی گومانلێكراو پەیوەندی بە هێڵی گەرمی (١٢٢) بكرێت و پێویستە ئەو هاووڵاتیە لە جێگای خۆی بمێنێتەوە تا تیمە تەندروستییەكان بە هانایەوە دەچن.

ئاگادارکردنەوەی هاووڵاتیان
  • حکومەتی هەرێمی کوردستان هاوولاتیان دڵنیا دەکاتەوە لە وەرگرتنی دوایین زانیارییەکان بە شێوەیەکی بەردەوام و رۆژانە لە رێگای دامودەزگای حکومی پەیوەندیدار و بە یارمەتی ڕاگەیاندنەکان.
  • هەر كەس و لایەنێك لە رێگای سوشیال میدیا و دەزگاكانی ڕاگەیاندن لێدوان دژی رێكارەكانی خۆپاراستن لە ڤایروسی كۆرۆنا بدات لە رێگای داواكاری گشتی رێكاری یاسایی بەرامبەر دەگیرێتەبەر.

  • شوفێری ئوتومبیلەكان بە هەموو جورەكانیەوە (تایبەت ، بارهەڵگر ، كرێ) لە كاتی هەبوونی سەرنشین لە گەڵیاندا پێویستە شوفێر و سەرنشین پابەندبن بە بەستنی دەمامك بە پێچەوانەوە بە بڕی (٥٠،٠٠٠) پەنجا هەزار دینار بۆ هەر حالەتێك شوفێر وەك پێبژاردن دەدات.
  • هەموو شوێنە گشتیەكان وەكو )ماركێت ، ریستورانت و شوێنە بازرگانیەكان) نابێت رێگە بدەن بە چوونەژوورەوەی هاوڵاتیان بۆ شوێنەكانیان بە بێ بەستنی دەمامك ، بە پێچەوانەوە ئەو شوێنە دادەخرێت بۆ ماوەی (١٠) رۆژ و خاوەنەكەی بڕی (١،٠٠٠،٠٠٠) یەك ملیون دینار پێبژاردن دەدات.

  • هۆڵەكانی وەرزش و و لەش جوانى مەڵەوانگەكان و هوڵی بۆنەكان و ئاهەنگەكان بە داخراوی دەمێننەوە، و پرسە و سەرقەبران رێگەپێدراو نیە و هەر كەسێك سەرپێچی بكات بە بڕی (٣،٠٠٠،٠٠٠) سێ ملیون دینار پێبژاردنی لێ وەردەگیرێت.

  • هەر گردبوونەوەیەك لە دەرەوەی شوێن و باڵەخانەكانی حكومی و كەرتی تایبەت بە بێ بەستنی دەمامك و ڕەچاوكردنی مەودا كە لە (١.٥) مەتر كەمتر نەبێت بڕی (١٠،٠٠٠) دە هەزار دینار هەر كەسێك پێبژاردن دەدات.

  • پێویستە دامەزراوەكانی كەرتی تایبەت فەرمانبەر و كرێكارەكانی پابەند بكات بە بەستنی دەمامك و جێبەجێ كردنی رێنماییەكانی خۆپارێزی لەو دامەزراوەيە، بە پێچەوانەوە بە بڕی (١٥٠،٠٠٠) سەد و پەنجا هەزار دینار بۆ هەر حالەتێك خاوەنی ئەو دامەزراوە پێبژاردن دەدرێت.
  • پێویستە هۆكارەكانی گواستنەوە رێنماییەكانی وەزارەتی گواستنەوە و گەیاندن و وەزارەتی تەندرۆستی جێبەجێ بكەن بە پێچەوانەوە بە بڕی (١٠٠،٠٠٠) سەد هەزار دینار بۆ هەر حالەتێك پێبژاردنی لێ وەردەگیرێت.

  • پێویستە دانیشتووانی هەرێمی كوردستان ڕەچاوی رێكارەكانی خۆپاراستن بكەن بە تایبەتی بەكارهێنانی دەمامك و پەیرەو كردنی مەوادی (١.٥) مەتر لە نێوانیان.
رێوڕەسمە ئاینییەکان و بۆنەکان
  • بەردەوام بوونی قەدەغەكردنی گشت بۆنەكان (پرسەی ماتەمینی، ئاهەنگ و بۆنە كومەڵایەتیەكان).

  • دەسەڵات دەدرێت بە پارێزگار و سەرپەرشتیاری ئیدارە سەربەخۆکان بۆ رێکخستنی ئەنجام دانی نوێژی هەینی و فەرزەکانی تری نوێژکردن بە پێی رێنماییەکانی وەزارەتی ئەوقاف و کاروباری ئایینی و وەزارەتی تەندروستی.

  • لە رابردوودا گشت شوێنە ئایينيەكان و پەرستگاكان داخرابوون.

رێکخستنی ئەو شوێنانەی بۆ خزمەتی هاووڵاتیان رێگەپێدراون
  • هۆڵەكانی وەرزش و لەشجوانی و مەلەوانگەكان و پەیمانگاکان و خولەکانی زمان و بەهێزکردن بە داخراوی دەمێنێتەوە تا ٢٠٢٠/٠٩/٠١.
  • ەسەڵات دەدرێت بە پارێزگار و سەرپەرشتیاری ئیدارە سەربەخۆکان بۆ کردنەوەی ریستۆرانت و کافی و شوێنە گەشتیارییەکان بە مەرجی بەستنی دەمامک و پەیڕەوکردنی رێکارەکانی خۆپارێزی و گست رێنماییەکانی قەزارەتی تەندروستی.

  • لەبەر ئەوەی نۆرینگەی یاریدەدەری پزیشكی بوونە یەكێك لە ئەگەرە سەرەكییەكانی بڵاوبوونەوەی ڤایرۆسی كۆرۆنا لە رێگای پێدانی چارەسەری هەڵە بەو نەخۆشانەی كە نیشانەی كۆرۆنایان هەیە ، پێویستە لەسەر پارێزگار و سەرپەرشتیاری ئیدارە سەربەخۆكان لە ماوەی (٤٨) كاتژمێر هەڵسەنگاندنی بارودۆخەكە بكەن سەبارەت بەو نۆرینگانەی كە بوونەتە هۆكار بۆ بڵاوبوونەوەی ڤایرۆسی كۆرۆنا بۆ ئەوەی بریاری كۆتایی لەسەر بدرێت.
  • پێویستە هاووڵاتیان و خاوەن فروشگاكان و شوێنە خزمەت گوزارییەكان دەمامك بەكار بهێنن.

  • هەموو ئەو شوێنانەی کە ڕەزامەندی کارکردنییان پێدراوە و کراوە دەبن پێویستە تەواوی مەرجە تەندروستییەکان جێ بەجێ بکەن لە بەستنی دەمامک و دەستکێش و دروست نەکردنی قەرەباڵغی، و پێویستە لە هەر شوێنێك مەودای نێوان دوو كەس لە (١.٥) مەتر كەمتر نەبێت.

  • لە رابردوودا گشت ماركێتەكان، نانەواخانەكان، و ئەو شوێنانەی بۆ خزمەتی هاوڵاتیان رێگەپێدراون لە نێوان (١١:٠٠)ی شەو تا (٠٦:٠٠)ی بەیانی دادەخرێن، جگە لە دەرمانخانەی ئیشكگر كراوە دەبێت، و پێویستە پارێزگار و سەرپەرشتیاری ئیدارە سەربەخۆكان بابەتی رێگەپێدان بە كردنەوەی ماركێتەكان و نانەواخانەكان و ئەو شوێنانەی بۆ خزمەتی هاوڵاتیان پێویستن رێكبخەنەوە بە شێوەیەك كاریگەری نەبێت لەسەر بریاری ڕاگرتنی هاتووچۆ.
جموجوڵ و هاوردەكردنی بازرگانی لە دەروازە سنوورییەکان و فڕۆکەخانەکان
  • هاتنەوەی هاووڵاتیانی عێراقی لە دەروازەی سنوری ئیبراهیم خلیل ئاسایی دەبێت و بۆ کەسانی بیانی پێویستی بە رەزامەندی وەزارەتی ناوخۆ دەبێت، و گەشتکردنی هاووڵاتیانی عێراقی بۆ وڵاتی تورکیا تەنها بۆ چارەسەرکردنی نەخۆشی و بازرگانی و خوێندن دەبێت. ئەوانەی نشینگەی وڵاتانی بیانیان هەیە، و گەشت کردنی  کەسانی بیانی لە دەروازەی سنووری ئیبراهیم خلیل بۆ دەرەوەی وڵات ئاسایی دەبێت.
  • دەروازە سنورییەكانی (پەروێزخان، سەرزێری، سەیران بەن، كێلێ ، تەوێلە، پشتە و شوشمێ) بە ڕووی گەشتیاران بە داخراوی دەمێننەوە و تەنها بۆ ئالۆگوری بازرگانی كراوە دەبن.
  • دەروازە سنورییەكانی (باشماخ، حاجی ئومەران) كراوە دەبێت بە ڕووی ئەو هاوڵاتی هەرێمی كوردستان كە لە وڵاتی ئێران گیریان خواردووە و دەیانەوێت بگەرێنەوە.
  • ئالۆگوری بازرگانی بە پێی ئەو رێنماییانەی كە پێشووتر بڕیاریان لەسەر دراوە بەردەوام دەبێت و رێگا دەدرێت باری بازرگانی یان سووتەمەنی لە دەروازە سنورییەكان بێنە هەرێمی كوردستان و بگات بە شوێنی مەبەست بە شوفێری بیانی، بە مەرجێك لە دەروازەی سنوری لەسەر ئەركی خۆیان پشكنینی كۆرۆنایان بۆ ئەنجام بدرێت و ئەگەر شوێنی مەبەست پارێزگاكانی عێراق بوو ئەوا رێگەپێدراوە، بەڵام ئەگەر گەرانەوەی شوفێرەكە بۆ هەرێمی كوردستان لە (٥) پێنج رۆژ تێپەربوو ئەوا دووبارە لە خاڵی پشكنینی نێوان هەرێمی كوردستان و پارێزگاكانی عێراق پشكنینی ڤایرۆسی كۆرۆنایان بۆ دەكرێت لەسەر ئەركی خۆیان و رێگا نادرێت بێنە ناو هەرێمی كوردستان تا دەرئەنجامی پشكنین دەرنەچێت.
  • هەر دوو فرۆكەخانەی نیودەولەتی (هەولێر و سلێمانی) بەردەوام دەبن لە رێكخستنی ئەو گەشتە نائاساییانەی كە ئێستا بەردەوامن و رێگا دەدرێت بە گەرانەوەی ئەو هاوڵاتیانەی هەرێم كە لە دەرەوەی وەڵات گیریان خواردووە و گەرانەوەی هاوڵاتیانی بیانی بۆ وڵاتیان بەو گەشتانە بە بێ رەزامەندی پێشوەخت.
  • هەر دوو فرۆكەخانەی نیودەولەتی (هەولێر و سلێمانی) ئامادە سازی تەواو دەكەن بۆ ئاسایی كردن و پێشوازی كردنی گەشتە ئاسمانيە نێودەوڵەتیەكان تا رێكەوتی ٢٠٢٠/٠٨/٠١.
  • لێژنەیەك پێك دێت بە سەرۆكایەتی نوێنەری وەزارەتی ناوخۆ و ئەندامێتی نوێنەرانی وەزارەتی گواستنەوە و گەیاندن و وەزارەتی تەندروستی و فەرمانگەی پەیوەندیەكانی دەرەوە بە مەبەستی دانانی میكانیزمی پێویست بو دەست پێكردنی گەشتە ئاساییەكان لە هەر دوو فرۆكەخانەی نیودەولەتی (هەولێر و سلێمانی).
دەوامی دامودەزگا فەرمییەکانی هەرێمی کوردستان
  • سەرۆكی فەرمانگەكانی حكومەتی هەرێمی كوردستان سەرپشك دەكرێن بە مەبەستی دەست نیشان كردنی رێژەی پێویست بۆ دەوام كردنی فەرمانبەران و رەچاوكردنی سیستەمی نورە (مناوبە) بە شێوەیەك كارتێكردن نەكات لە خاوبوونەوە یان كەمتەرخەمی لەو خزمەتگوزارییانەی كە پێشكەش بە هاوڵاتیان دەكرێت.
  • لیژنەیەك پێك دێت بە سەرۆكایەتی نوێنەری وەزارەتی ناوخۆ و ئەندامێتی نوێنەرانى وەزارەتی تەندروستی و فەرمانگەی هەماهەنگی و بەدواداچوون لە سەرۆكایەتی ئەنجومەنی وەزیران بە مەبەستی سەردانی كردنی وەزارەتەكان و دەستە نەبەستراوەكان بە وەزارەت بە مەبەستی بەدواداچوونی جێبەجێ كردنی رێنماییەكانی وەزارەتی تەندروستی لەو شوێنانە و وەرگرتنی رێكاری یاسایی بەرامبەر سەرپێچی كاران.

  • پێویستە لە فەرمانگەكانی حكومەتی هەرێمی كوردستان رەچاوی رێكارەكانی خۆپاراستن بكرێت و دەمامك بەكار بهێنرێت و هەر فەرمانبەرێك یان كارمەندێكی هێزەكانی ئاسایشی ناوخۆ یان پێشمەرگە یان ئاسایش پابەند نەبێت بە پێی یاسا بەركارەكان سزا دەدرێت.

  • فەرمانگەی تەکنەلۆجیای زانیاری لە ئەنجومەنی وەزیران لەگەڵ دامودەزگاکانی حکومەتی هەرێمی کوردستان هەماهەنگی دەکات بەمەبەستی کارئاسانی لە جێبەجێکردن و راییکردنی مامەڵەی هاووڵاتییان بە شێوەی ئەلیکترۆنی.

  • لە رابردوودا ماوەی راگرتنی دەوامی فەرمی لە سەرجەم وەزارەت و فەرمانگە و دامەزراوەکانی ھەرێمی کوردستان جگە لە ھێزەکانی پێشمەرگە، ئاسایش و ئاسایشی ناوخۆ و دامەزراوەکانی تەندروستی، لە رێکەوتی ٢٠٢٠/٠٣/١٢ تاوەکو رێکەوتی ٢٠٢٠/٠٥/١٠ و دواتر لە لە ٢٠٢٠/٠٥/٣١ کاتژمێر (١٢:٠٠)ی شەو تا ٢٠٢٠/٠٦/٠٦ کاتژمێر (١٢:٠٠)ی شەو جگە لە وەزیرەكان و ستافی نوسینگەكانيان راگەیەندرابوو.

  • كەمكردنەوەی دەوامی فەرمی لە فەرمانگەكانی حكومەت لە كاتژمێر ٨:٠٠ بەیانی تا ١:٠٠ پاش نیوەڕۆ لە رێکەوتی ٢٠٢٠/٠٣/١ تاکو ٢٠٢٠/٠٣/١٠.

  • سیستەمی پەنجەمۆر لە گشت فەرمانگەكان ڕادەوەستێت و هاتن و چوونی فەرمانبەران لە تۆمارێكی تایبەت تۆمار دەكرێت لە رێکەوتی ٢٠٢٠/٠٣/٠١ تاکو ٢٠٢٠/٠٣/١٠.

  • گشت وەزارەتەكان و فەرمانگەكانی نەبەستراو بە وەزارەت سەرپشك دەكرێن بە كەمكردنەوەی پابەندبوونی فەرمانبەران بە دەوامی فەرمی تەنیا بۆ ئەو ستافانەی كە پێویستە بۆ راپەراندنی كاروباری فەرمانگەكانیان.

  • داوا لە گشت هاوڵاتیانی خۆشەویستی هەرێمی كوردستان دەكەین سەردانی فەرمانگەكانی حكومەت نەكەن ئەگەر لە حاڵەت و كاری زۆر پێویست نەبێت (لە رێکەوتی٢٠٢٠/٠٣/٠١ تاکو ٢٠٢٠/٠٣/١٠).

  • ڕاگرتنی بەڕێوەبردنی مامەڵەی گشت هاووڵاتیان و بیانییەکان لە بەڕێوەبەرایەتیەکانی گشتی (هاتووچۆ و ڕەگەزنامە) و بەڕێوەبەرایەتییەکانی هاتووچۆ و پاسپۆرت و ڕەگەزنامە و نشینگە لە گشت پارێزگا و ئیدارە سەربەخۆکان تا ٢٠٢٠/٠٣/١٤.

 

گەشتکردنی هاووڵاتیان لە هەرێمی کوردستان
  • ەو كەسانەی كە دەگەڕێنەوە بۆ هەرێمی كوردستان و بەڵێننامە پڕدەكەنەوە كە لە ماڵەوە یان لە ژووری هوتێل خۆیان كەرەنتین بكەن، ئەگەر پێگیر نەبن بەو بەڵێننامەیە بە بڕی (١،٠٠٠،٠٠٠) یەك ملیون دینار پێبژاردن دەدەن، و ئەگەر پشكنینیان پوزەتیڤ دەرچوو و كەسی تریان تووش كرد ئەوا سەرجەم تێچووی چارەسەری ئەو كەسانە لەسەر ئەركی ئەوان دەبێت، زێدەباری ئەو رێكاره یاساییانەی كە بەرامبەریان دەگیرێنەبەر بە پێی هەر دوو ماددەی (٣٦٨-٣٦٩) لە یاسای سزادانی عێراقی ژمارە ١١١ ساڵی ١٩٦٩ی هەموارکراو.
  • هاتووچۆی هاووڵاتیانی عێراقی و بیانی لە نێوان هەرێمی كوردستان و وڵاتی توركیا ئاسایی دەبێت بە پەیرەو كردنی گشت رێنماییە تەندروستیەكان جگە لە هەڵگرانی پاسپورتی ئێرانی.

  • ئەو هاوڵاتیانەی هەرێمی كوردستان كە قوتابین لە زانكو و پەیمانگەكانی ئێران، یان نەخۆشن و پێویستيان بە سەردانی پزیشك هەیە لە وڵاتی ئێران، و بۆ حاڵەتەكانی بەیەك گەیاندنی خێزان، لە رێگای سیستەمی رێگەپێدانی ئەلیكترونی دەتوانن داواكاری پێشكەش بكەن بۆ گەشت كردن بۆ ئەو وڵاتە.
  • ئەو كەسە بیانیانەی كە وەك ماموستا لە قوتابخانە و پەیمانگا و زانكوكانی هەرێمی كوردستان كار دەكەن رێگایان پێ دەدرێت بگەرێنەوە هەرێمی كوردستان بە مەرجێك نشینگەی هەرێمی كوردستانیان هەبێت و وەزارەتی پەیوەندیدار پشتگیریان بكات.

  • پرۆژەكانی وەبەرهێنان و كارگەكان كە پێویستیان بە شارەزایی ئێرانی هەیە بۆ بەردەوام بوونی پرۆژەكانیان داواكارییەكانیان بە پشتگیری لایەنی پەیوەندیدار و نوسراوی پارێزگا یان ئیدارە سەربەخۆكان ئاراستەی وەزارەتی ناوخۆ/بەرێوەبەرایەتی گشتی دیوان دەكرێت بە مەبەستی رێگەپێدان ، و پێویستە لە كاتی هاتنیان گشت رێكارە تەندروستیەكان جێبەجێ بكرێت و لەسەر ئەركی خۆیان پشكنینی ڤایرۆسی كۆرۆنایان بۆ ئەنجام بدرێت و لە شوێنی كاركردنیان لە پرۆژەكان یان لە ژووری هوتێل خۆی كەرەنتین بكات بۆ ئەو ماوەیەی كە وەزارەتی تەندروستی دەست نیشانی كردووە.​​

  • ئەو هاووڵاتيە عیراقی و بیانیانەی كە لە رێگای دەروازە سنورییە رێگەپێدراوەكان بۆ هاتنی گەشتیاران و هەر دوو فرۆكەخانەی نێودەوڵەتی هەولێر و سلێمانی دەگەرێنەوە هەرێمی كوردستان لەسەر ئەركی خۆيان پشكنینی كۆرۆنایان بۆ دەكرێت و بەلێننامەی لێ وەردەگیرێت كە لە ماڵی خۆی یان لە ژووری هوتێل خۆی كەرەنتین بكات بۆ ئەو ماوەیەی كە وەزارەتی تەندروستی دەست نیشانی كردووە.
  • هەردوو فرۆكەخانەی نیودەولەتی (هەولێر و سلێمانی) بەردەوام دەبن لە رێكخستنی ئەو گەشتە نائاساییانەی كە ئێستا بەردەوامن و رێگا دەدرێت بە گەرانەوەی ئەو هاوڵاتیانەی هەرێم كە لە دەرەوەی وەڵات گیریان خواردووە و گەرانەوەی هاوڵاتیانی بیانی بۆ وڵاتیان بەو گەشتانە بە بێ رەزامەندی پێشوەخت.

  • وەبەرهێنەرانی بیانی و بازرگانان و فەرمانبەرانی بیانی بانكەكان رێگەیان پێ دەدرێت بگەرێنەوە هەرێمی كوردستان بە بە مەرجێك نشینگەی هەرێمی كوردستانیان هەبێت و وەزارەتی پەیوەندیدار پشتگیریان بكات.

  • ئەو هاووڵاتیانەی هەڵگری پاسپۆرتی عێراقین کە لە دەرەوەی هەرێمی کوردستانن و بە هۆی ئەو گەشتانە دەگەڕێنەوە کە لە لایەن فەرمانگەی پەیوەندییەکانی دەرەوە رێک دەخرێن لە هەر دوو فرۆكەخانەی نێودەوڵەتی هەولێر و سلێمانی و ئەوانەی لە دەروازە سنورییەكانی (ابراهیم خلیل و حاجی ئومەران و باشماخ) دەگەرێنەوە بە پێی رێنماییەکان لە سەر ئەرکی خۆیان کەرەنتین دەکرێن جگە لە:
    • قوتابیان کە بۆ مەبەستی خوێندن لە دەرەوە بوون.
    • نەخۆشەکان کە پاڵپشتی نەخۆشخانەکانیان هەیە و بۆ مەبەستی وەرگرتنی چارەسەری گەشتیان لە ماوەی دوو مانگی رابردوودا کردبیت.
  • ئەو هاووڵاتیە بیانیانەی كە بە پێی رێنماییەکان دیاری كراوە لە رێگای فرۆكەخانەكانی هەرێم یان دەروازەى سنوری ابراهیم خلیل دەگەرێنەوە هەرێمی كوردستان لەسەر ئەركی خۆیان كەرەنتین دەكرێن.

  • ئەو عێراقی و بیانیانەی كە لەم وڵاتانەی خوارەوە دێنە هەرێمی كوردستان لە كاتی گەیشتنیان بۆ دەروازە سنورییەكانی هەرێمی كوردستان ئەگەر (٣٠) رۆژ پێش گەشتنیان لەو وڵاتانە بووبن ئەوا دوای پشكنینی سەرەتایی، پێویستە ببرێن بۆ كەرەنتینەكان تا تێپەربوونی ئەو ماوەیەی كە وەزارەتی تەندروستی دەستنیشانى كردووە:

بەلجیكا

هنگاریا

كرواتیا

قبرص

دانیمارك

ئەستونیا

ئەلمانیا

فەرەنسا

یۆنان

ئەلبانیا

لیتوانیا

لۆكسەمبورگ

مالتا

هۆڵەندا

چیك

پۆلەندا

پۆرتوگال

رۆمانیا

سلۆڤاكیا

سلۆفینیا

فینلاند

سویسرا

ئیسپانیا

سوید

بۆسنیا و هەرزەگۆڤینا

بەریتانیا

ئێرلەندا

سكوتلندا

نەرویج

سربیا

مۆنتینیگرۆ

بولگاریا

نەمسا

 

  • ئەم بڕیارەی سەرەوە دیپلوماتكارەكان و شاندە فەرمییە بیانییەكان ناگرێتەوە و لە دەروازە سنورییەكان بە رێزەوە پێشوازیان لێ دەكرێت و پشكنینی سەرەتایيان بۆ دەكرێت بەلام پێویستە بڕوانامەی تەندروستی (Medical Clearance ) یان پێبێت كە هەڵگری ڤایرۆسی كۆرۆنا نین.
  • داوا لە هاووڵاتیانی كوردستان دەكەین كە نیشتەجێ وڵاتانی ئەوروپان کە نەگەڕێنەوە بۆ هەرێمی كوردستان بۆ جەژنی نەورۆز، لە بەر ئەوەی هەموو جۆرە ئاهەنگ و گردبوونەوەیەک لە نەورۆز ڕاگیراوە.
کەرەنتینە کردنی بەرکەوتووی توشبووی ڤایرۆسی کۆرۆنا
  • هەر كەسێك بەركەوتەی كەسێكی تووشبوی ڤایرۆسی كۆرۆنا بێت، دەبێت كەرەنتین بكرێت بۆ ئەو ماوەیەی كە وەزارەتی تەندروستی دەستنیشانی كردووە.
رێکخستنی کاروباری وەرزی کشتوکاڵ لە هەرێمی کوردستان
  • بەرێوەبەرانی گشتی كشتوكاڵ لە پارێزگا و ئیدارە سەربەخۆكان دەبنە ئەندام لە ژووری ئۆپەراسیۆنەكان بە مەبەستی هەماهەنگی و رێكخستنی كاروباری وەرزی كشتوكاڵ لە هەرێم.
دیاری کردنی دوامۆڵەت بۆ گەڕانەوەی هاووڵاتیانی هەرێمی كوردستان كە لە كۆماری ئیسلامی ئێرانن
  • دواوادە بۆ گەرانەوەی هاوڵاتیان بۆ هەرێمی كوردستان كاتژمێر (١٢:٠٠)ی شەوی ٢٠٢٠/٠٣/١٦ دەبێت و دوای ئەو بەروارە گشت دەروازە سنورییەكان بە ڕووی گەشتیاران دادەخرێن و تەنها بە ڕووی جمۆجوڵی بازرگانی كراوە دەبێت لە دەروازە سنورییەكانی (پەروێزخان ، حاجی ئومەران، ابراهیم خلیل و باشماخ) بەو مەرجانەی كە پێشتر بڕیاری لەسەر دراوە.
خۆناساندنی ئەو هاووڵاتیانەی کە بەرێگەی نایاسایی گەڕاونەتەوە لە ئێران
  • پێویستە ئەو هاووڵاتیانەی كە بە رێگای نایاسایی لە ئێران گەڕاونەتەوە بە زووترین كات خۆیان بە تیمە تەندروستیەكان بناسێنن، بە پێچەوانەوە سەرەڕای ئەوەی كە دەبرێن بۆ كەرەنتین بە پێی یاسا رادەستی دادگا دەكرێن بە تۆمەتی بە ئەنقەست بڵاوكردنەوەی نەخۆشی و گەرانەوە بە رێگای نایاسایی.
کەوتنە حاڵەتی ئامادەباشی بۆ هەریەکە لە ژووری ئۆپەراسیۆنەکان، تیمە تەندروستییەکان، و هێزە ئەمنییەکان
  • پێویستە ژووری ئۆپەراسیۆنەكانی هەر دوو پارێزگای هەولێر و سلێمانی و تەواوی تیمە تەندروستییەكان و هێزە ئەمنیەكان بكەونە حاڵەتی ئامادەباشی بەمەبەستی جێبەجێ كردنی تەواوی رێنماییەکان.
راگرتنی هێڵەکانی گواستنەوەی گشتی لە نێوان شارەکان
  • راگرتنی هاتووچۆی هێڵەکانی گواستنەوەی گشتی (پاس ­– مینی پاس) لە نێوان شارەکان و ناوخۆی شارەکان لە رێکەوتی ٢٠٢٠/٠٣/١٣ تاوەکو ٢٠٢٠/٠٤/٠١.
هاتووچۆ لە نێوان قەزاكانی هەر دوو پارێزگای هەولێر و سلێمانی
  • راگرتنی هاتووچۆ لە نێوان قەزاكانی هەر دوو پارێزگای هەولێر و سلێمانی بۆ ماوەی (٧٢) كاتژمێر و لە کاتژمێر (١٢:٠٠)ی شەوی ٢٠٢٠/٠٣/١٦ دەست پێ دەكات.
داخستنی ئەو شوێنە گەشتیارییانەی کە دەبنە هۆی دروستکردنی گردبوونەوە
  • پێویستە دەستەی گەشت و گوزار ئەو شوێنە گەشتیارانە و هاوینە هەوارانە دابخات كە دەبنە هۆكارى گردبوونەوەی گەشتیاران و دروست بوونی جەنجاڵی.
راگرتنی گشت چالاكییە وەرزشییەكان
  • راگرتنی گشت چالاكییە وەرزشییەكان تا ٢٠٢٠/٠٤/٠١، جگە لە خولی نایابی عێراق كە هەندێك لە یارییەكانى لە هەرێم ئەنجام دەدرێت و پێویستە یارییەكان بە بێ هاندەر بەڕێوەبچێت.
رێكخستنەوەی بازاڕەكان
  • دەسەڵات دەدرێت بە پارێزگاكان بۆ رێكخستنەوەی بازاڕەكان بە تایبەتی بازاڕە ميللیەكان و رێگرتن لە دروست بوونی قەڵەبالغی.
راگرتنی گەشتی ئاسمانی
  • راگرتنی گەشتی ئاسمانی لە هەر دوو فرۆكەخانەی هەولێر و سلێمانی لەگەل فڕۆكەخانەكانی بەغدا و بەسرا لە ٢٠٢٠/٠٣/١٤ تا ٢٠٢٠/٠٣/٢٨، جگە لە دیپلۆماتكاران، شاندە فەرمییەكان، گەشتەكانی رێكخراوی UN، و هاوپەیمانان.
  • ڕاگرتنی گەشتەكانی هێڵی ئاسمانی (اجنحة الشام) بۆ فڕۆكەخانەكانی هەرێمی كوردستان و تەنها رێگا بە (٢) گەشت دەدرێت بۆ گەڕانەوەی هاووڵاتیانی سوری بۆ سوریا.
پابەندبوونی هاووڵاتیانی ناوچە كوردستانیەكانی دەرەوەی ئیدارەی هەرێم بەرێنماییەکانی
  • داوا لە هاووڵاتیانی ناوچە كوردستانیەكانی دەرەوەی ئیدارەی هەرێم دەكەین كە پابەند بن بە هەموو رێنمایی و رێكارەكانی حكومەتی هەرێمی كوردستان بە مەبەستی خۆپاراستن لە ڤایرۆسی كۆرۆنا.
چاودێری پزیشکی لە هەموو خاڵەکانی هاتنە ناوەوەی هەرێم
  • هەموو گەشتیارێک کە دێتە هەرێمی کوردستان لە رێگای ئاسمانییەوە یاخود زەمینییەوە دەپشکنرێن لەلایەن تیمی پزیشکییەوە.
  • هەرکەسێک لە پشکنینەکان دەرنەچێت رێگای پینادرێت بێتە ناو هەرێمی کوردستان و دەخرێتە ژێر چاودێری تەندروستی بۆ پاراستنی گشتی.
  • قەدەغەكردنی هاتنە ژوورەوە لە رێگای دەروازە سنوورییەكانی هەرێمی كوردستان بۆ ئەو كەسە بیانیانەی كە لە رێكەوتی ٢٠٢٠/١٤/٠١ بە دواوە سەردانی وڵاتی چینیان كردوە.
  • قەدەغەكردنی هاتنە ژوورەوە لە رێگای دەروازە سنوورییەكانی هەرێمی كوردستان بۆ ئەوكەسە بیانیانەی كە لە رێكەوتی ٢٠٢٠/٠٢/٠٥ بە دواوە سەردانی وڵاتی ئێرانیان كردووە.
  • ئەو هاوڵاتییە عێراقییانەی كە لە وڵاتی ئێران دەگەرێنەوە لە رێگای دەروازە سنوورییەكانی هەرێمی كوردستان پێویستە لە خاڵە سنوورییەكان جیابكرێنەوە و پشكنینی ووردیان بۆ بكرێت لە لایەن تیمە پزیشكییەكانی وەزارەتی تەندروستی، بە مەبەستی دڵنیابوون لە تووش نەبوونیان بە ڤایروسی كورۆنا.
  • راگرتنی گەشتی هاووڵاتیانی هەرێمی كوردستان و عێراق لە رێگای دەروازە سنوورییەكانی هەرێمی كوردستان بۆ وڵاتی ئێران تا كاتێكی دیاری نەكراو.
  • راگرتنی گەشتی ئاسمانی لە نیوان هەر دوو فرۆكەخانەی نیودەوڵەتی هەولێر و سلێمانی و كۆماری ئیسلامی ئێران تا ماوەیەكی دیاری نەكراو.
  • بە مەبەستی رێگەگرتن لە بڵاوبوونەوەی ڤایرۆسی کۆڕۆنا لە هەرێمی کوردستان، وەزارەتی ناوخۆ بڕیاریدا بە پێنەدانی ڤیزا بە هەڵگرانی پاسپۆرتی ئەو وڵاتانەی خوارەوە و قەدەغەکردنی گەشت کردنی هەڵگرانی پاسپۆرتی عێراقی لە رێگای خاڵە سنورییەکانی هەرێمی کوردستانیش بۆ ئەو وڵاتانە:
    • چین
    • ئێران
    • ئیتاڵیا
    • ژاپۆن
    • کۆریای باشور
    • تایلەند
    • سەنگاپورە
    • کوەیت
    • بەحرەین

ئەو هاووڵاتیە عێراقییانەی کە لە دوای رێکەوتی (٢٠٢٠/٠١/٠١) سەردانی ئەو وڵاتانەی سەرەوەیان کردوە لە کاتی گەڕانەوەیان پشکنینی سەرەتاییان بۆ دەکرێت و دواتر رەوانەی کەرەنتین (حجر صحی) دەکرێن بۆ ئەو ماوەیەی کە لە لایەن وەزارەتی تەندروستی دەستنیشان کراوە، وە ئەو هاووڵاتییە بیانیانەی کە لە دوای رێکەوتی (٢٠٢٠/٠١/٠١) سەردانی ئەو وڵاتانەیان کردوە رێگایان پێ نادرێت بێنە هەرێمی کوردستان.

ئەو هاووڵاتیانەی کە لە پارێزگاکانی تری عێراق سەردانی هەرێمی کوردستان دەکەن پشکنینی تەندروستییان بۆ دەکرێت لە بازگەکاندا.

ئەو بیانییانەی كە نیشینگەیان هەیە لەهەرێم رێگایان پێ دەدرێت بێنە هەرێمی كوردستان بە مەرجێك لە دوای (٢٠٢٠/٠١/٠١) سەردانی ئەو وڵاتانەی لەسەرەوە ئاماژەیان پێکراوە نەكردبێت.

سەنتەری تەرخانکراو
  • چەند سەنتەرێکی تەندروستی تەرخانکراو ئامادەکراون لە هەموو پارێزگاکانی هەرێمی کوردستان، بۆ دەستنیشانکردن و چارەسەرکردنی حاڵەتی توشبوو بە ڤایرۆسی کۆڕۆنا و پێشکەشکردنی چاودێری پێویست.
داخستنی قوتابخانەو زانکۆکان
  • حکومەتی هەرێمی کوردستان پشووی رەسمی راگەیاند بۆ هەموو قوتابخانە و باخچەی ساوایانی حکومی و نا حکومی لە ٢٦ شوبات تاکو ١٠ مارس.
  • زانکۆ حکومی و ناحکومییەکان لە ٢٩ شوبات تاکو ١٠ مارس پشووی رەسمی دەبێت.
  • هەموو قوتابخانە و زانکۆکان بە داخراوی دەمێننەوە لە پشووی بەهارە کە بریتییە لە ١٠ تاکو ٢٣ مارس و لە ٢٤ مارس دەست بە دەوامکردن دەکرێتەوە.
  • هەردوو وەزارەتی پەروەردە و وەزارەتی خوێندنی باڵا و توێژینەوەی زانستی خشتەیەک ئامادە دەکەن بۆ قەرەبووکردنەوەی خوێندنی فەوتاوی قوتابیان.
دابینکردنی بودجە بۆ پارێزگاکان
  • وەزارەتی دارایی و ئابوری بودجەیەکی تایبەتی تەرخانکردووە بۆ پارێزگاکان کە لە نزیکەوە لەگەڵ وەزارەتی تەندروستی و وەزارەتی ناوخۆ کاردەکەن.
بەردەستکردنی کەلوپەل و خۆراک
  • حکومەتی هەرێمی کوردستان دڵنیایی بەردەستبوونی کەلوپەل و خۆراک دەدات لە بازاڕەکانی هەرێمی کوردستان.
  • حکومەتی هەرێمی کوردستان رێگە دەگرێت لە گرانکردنی نرخی کاڵاکان و رێوشوێنی تایبەت دەگیرێتە بەر بەرامبەر ئەو کەسانەی سوودی نایاسایی لە دۆخەکە وەردەگرن.
راگرتنی رێوڕەسمە ئاینییەکان
  • لەپێناوی خۆپارێزیی، بڕیاردرا سەرجەم رێورەسمە ئاینییەکان لە (مزگەوت، كڵێسا، و پەرستگاکان) بە گوتاری هەینی مزگەوتەکانیشەوە، لە سەرتاسەری هەرێمی کوردستان هەتا کاتێکی نادیار رابگیرێت.
چاودێری تەندروستی لە کەمپەکانی ئاوارە و پەنابەران
  • پێویستە لایەنە پەیوەندارەکانی حکومەتی هەرێمی کوردستان هەموو رێکارە تەندروستییەکان لە کەمپەکانی ئاوارە و پەنابەران بگرنەبەر. بۆ ئەم مەبەستەش هەماهەنگی لە گەڵ رێکخراوە نێودەوڵەتییە پەیوەندیدارەکان بکرێت.
کەمکردنەوەی بارگرانی سەر شوێنەبازرگانییەکان
  • ئەنجومەنی وەزیران بڕیاریدا بە راسپاردنی وەزیرە پەیوەندیدارەکان بە جێبەجێکردنی رێکاری یاسایی پێویست لە رێگەی چاوخشاندنەوە بە کرێ و باجی داهاتی ئەو شوێنە بازرگانییانەی کە بە هۆی رێکارەکانی خۆپارێزی لە فایرۆسی کۆرۆنا زیانیان بەرکەوتووە، و بە ئاراستەی کەمکردنەوەیان بە جۆرێک رەچاوی زیانە داراییەکانیان بکرێت. بۆ ئەم مەبەستەش وەزارەتە پەیوەندارەکان رێنمایی پێویست بۆ ئاسانکاری جێبەجێکردنی ئەم بڕیارە دەردەکەن.