سه‌فین دزه‌یی پێشوازی له بەرپرسی نوێی بەشی بازرگانی و ئابووری باڵیۆزخانەی بولگاریا لە هەرێم ده‌كات
ڕۆژی پێنجشه‌ممه ٢٧ی تشرینی یه‌كه‌می ٢٠٢٢، سه‌فین دزه‌یی، به‌رپرسی فه‌رمانگه‌ی په‌یوه‌ندییه‌كانی ده‌ره‌وه‌ی حكومه‌تی هه‌رێمی كوردستان پێشوازی له ستانیسلاڤ نۆکۆڤ، بەرپرسی نوێی بەشی بازرگانی و ئابووری باڵیۆزخانەی بولگاریا لە هەرێمی کوردستان كرد.
به‌رپرسی فه‌رمانگه پیرۆزبایی ده‌ستبه‌كاربوونی له نۆکۆڤ كرد و هیوای سه‌ركه‌وتنی له ئه‌رك و كاره نوێیه‌كه‌یدا بۆ خواست، هاوكات دووپاتی له خواستی هه‌رێمی كوردستان كرده‌وه بۆ به‌هێزتركردنی په‌یوه‌ندی و دۆستایه‌تی له‌گه‌ڵ بولگاریا و كۆمه‌ڵگای نێوده‌وڵه‌تی له‌سه‌ر بنه‌مای به‌ها و به‌رژه‌وه‌ندییه هاوبه‌شه‌كان.
له به‌شێكی تردا باس له په‌یوه‌ندییه دوولایه‌نه‌كان و پرسه هه‌نووكه‌ییه‌كان و دوایین گۆڕانكاری و دۆخی گشتیی ناوچه‌كه كرا و جه‌خت له په‌ره‌پێدانی زیاتری په‌یوه‌ندی و هه‌ماهه‌نگییه‌كان له بواری بازرگانی، گەشتیاری، کشتوکاڵ و کەلتووریدا كرایه‌وه.
