ڕوونکردنەوەی بەڕێوەبەرایەتیی کاروباری ئێزدییان لەبارەی هێرشکردنەسەر مزگەوتێکی شنگال
دوای ڕووداوی هێرشەکەی سەر مزگەوتێکی شنگال لە ئێوارەی ڕۆژی پێنجشەممە ٢٧ـی نیسانی ٢٠٢٣، بەڕێوەبەرایەتیی گشتیی کاروباری ئێزدییان ڕوونکردنەوەیەکی بڵاوکردووەتەوە و دەڵێت، سووکایەتی بەر هەر ئایینێک شەرمەزار دەکەین و ئەوانەی دەبنە هۆکاری تێدانی ئارامیی هەرێمی کوردستان، سزا بدرێن.
ئەمە دەقی ڕوونکردنەوەکەیە:
ئەڤە دەمەکی درێژە دەڤەرا شنگال رۆژانە تووشی روودانێن نەخوازراو دبت، دیارە کو هەر کارەکی تێکدەرانە ل وێ دەڤەرێ ژبەر نەبونا رەوشا ئارامیێ یە و دیسان هەبونا هێزێن نەیاسایی هەموو کنارێن ژیانێ ئالۆزکرینە و ئەڤ چەندە ژی ژ ئەگەرێ سیاسەتا نەدروستە ژئالیێ حکومەتا عراڤێ ڤە.
ئەم ل رێڤەبەریا گشتی هەر جۆرە سڤکاتیەکێ ب هەر ئاینەکی بت شەرمەزار دکەین و داخوازێ دکەین هەر کەسێ ببتە ئەگەرێ لاوازکرن و تێکدانا رەوشا ئاراما هەرێما کوردستانێ ب گەهتە سزایێ خۆ یێ عادلانە.
هەموو جاران ئەم داکۆکیێ ل خۆ پێشاندانێن ئاشتیانە دکەین، لێ بێرێزی کرن ب هەر پیرۆزیەکێ نە ژرەوشتێ تاکێ ئێزدی یە، لەوا ئێزدی ڤان جۆرە کاران ناکەن و هێرش نەهاتیە کرن چونکی ئەڤە چەندین سالان پشتی نەمانا داعش هەموو جهێن پیرۆز ییێن ئاینێن دەڤەرێ ژئالیێ ئێزدیان ڤە هاتینە پاراستن.
ئەم دووپات دکەین تاکە چاسەریا ڤێ رەوشا ئالۆز جێبەجێکرنا رێکەفتنا هەولێر و بەغدایە.
دهەمان دەمدا ئەم هەر پۆستەکی د سۆشیال میدیا دا بەلاڤ بویی هەولا تێکدانێ یە و جەواشەکاریە بۆ لاوازکرنا ئاشتەوایا کۆمەلایەتی و سەقامگێریا دەڤەرێ و ڤێ چەندێ ئەم ب تووندی شەرمەزار دکەین.
جارەکادی داخوازێ ژ هەموو لایەکی دکەین کو هندەک تێکدەر هەنە دخوازن دەرزەکێ بێخنە وی دیوارێ کوردستانێ ئاڤاکری بۆ هندێ هەموو پێکهات ب مافێن خۆ شادببن و ئەم ل وێ باوەریێ نە کو خەلکێ مە ئی هوشیاری ڤان پلانێن نەحەزایە.
راگەهاندنا رێڤەبەریا گشتی یا کاروبارێن ئێزدیان
٢٨-٤-٢٠٢٣