د. ڕۆژین كەمال: ده‌سته‌ی متمانه‌به‌خشین دەتوانێت سیاسەتی پرۆگرامەکانی خوێندن یەکبخاتەوە
هەولێر، هەرێمی کوردستان (GOV.KRD)- ده‌سته‌ی متمانه‌به‌خشین به دامه‌زراوه‌كان و پرۆگرامه‌كانی په‌روه‌رده و خوێندنی باڵا لە هەرێمی کوردستان، یه‌كێكه له‌و ده‌سته سه‌ربه‌خۆیانه‌ی كه هه‌ڵسه‌نگاندنی ساڵانه بۆ پڕۆگرامه‌كانی خوێندنی باڵا و په‌روه‌رده ده‌كات.
د. ڕۆژین كەمال محەمەد ئەمین، مامۆستا و توێژەر لە دەستەی كوردستانی بۆ دیراساتی ستراتیجی و توێژینەوەی زانستی، هاوبەڕێوەبەری تۆڕی نەهرەینی بەریتانی لە زانكۆی (USL)، ئاماژە بەوە دەکات کە بۆردێكی لەو شێوەیە هاوكار دەبێت بۆئەوەی بتوانێت هەموو سیاسەتەكان یەكبخاته‌وه، تا بتوانرێت كار بۆ ئامانجێك بكرێت، ماندووبوونەكان یەكخرێنەوە و گونجاندی تێدا بكرێت.
له‌باره‌ی مه‌به‌ست و ئامانجی درووستبوونی ده‌سته‌ی متمانه‌به‌خشین د. ڕۆژین كەمال محەمەد ئەمین گوتی" ده‌سته‌ی متمانه‌به‌خشین به دامه‌زراوه‌كان و پرۆگرامه‌كانی په‌روه‌رده و خوێندنی بۆردێكی سەربەخۆیە، كەسایەتیی واتایی و كارگێڕی و یاسایی خۆی هەیە، ئامانج لە دروستبوونی ئه‌و ده‌سته‌یه هەڵسەنگاندنی ساڵانەیە بۆ پڕۆگرامەكانی خوێندنی باڵا و پەروەردە بەمەبەستی خزمەتكردنی یەكخستنی سیستەمی پڕۆگرامەكان و بەرزكردنەوەی كوالیتی و هاوتاكردنیان لەگەڵ پڕۆگرامە نێودەوڵەتییەكان."
د. ڕۆژین ئاماژە بەوەش دەکات کە هەر سیستەمێكی خوێندن یان جگە لە خوێندن (پەروەردەیی یان ناپەروەردەیی) بۆ ئەوەی پێشكەوتن بەخۆیەوە ببینێت و كوالیتی بەرزبكاتەوە، زۆر گرنگە ميكانيزمێكی هەڵسەنگاندنی هەبێت، لە زانكۆ بەناوبانگە جیهانییەكان و پڕۆگرامە پەروەردەییەكان بەشێوەیەكی خۆبەخشانە ئەم هەڵسەنگاندنە تێكەڵ بە سیستەمی خۆیان دەكەن بۆ سەلماندنی پرۆگرامەكانیان.
بە گوتەی ئەو مامۆستایەی زانکۆ، بوونی بۆردێك بۆ ئەوەی سەرپەرشتیی ئەم گۆڕانكارییانە بكات، گرنگیی زۆری هەیە تا پڕۆگرامەكان ئامادەیی خۆیان نیشانبدەن بۆ كرانەوە بۆ بوونی لایەنێكی دەرەكی، بە مەبەستی هەڵسەنگاندن. لە لایەكی دیكه‌وه خۆڕێكخستنەوه و بەدواداچوونێكی خودییە بۆ ئەوەی بزانرێت ئەو ئامانجەی دەزگاكه دایناوە پێكاویەتی یان نا، تا چەند كاریگەری هەبووە، تا بەپێی ئەوە گۆڕانكاری بكات.
سه‌باره‌ت به كوالیتیی پڕۆگرامه‌كان و كاركردن بۆ باشتركردنی له‌ڕێگه‌ی سیاسه‌تێكی یه‌كگرتوو، د.ڕۆژین كەمال، راشیگه‌یاند:"لە ئێستادا جۆرێك لە تێكەڵی و سەرلێشێوان لە جۆری پڕۆگرامەكانی خوێندن هەیە، جۆرێك لە ئاراستەی جیاواز هاتووەتە كوردستان، خۆی ئەمە باشە و جۆرێكە لە گۆڕانكاری، لەم قۆناغە ئەم جۆرە سەرلێشێوانە ئاساییە، بەڵام پێویستە كۆنترۆڵ بكرێت. بۆیە بۆردێكی لەم شێوەیە هاوكار دەبێت بۆئەوەی بتوانێت هەموو سیاسەتەكان یەكبخاته‌وه تا بتوانرێت كار بۆ ئامانجێك بكرێت، ماندووبوونەكان یەكخرێنەوە و گونجاندی تێدا بكرێت.''
چه‌ند ئاستێك هه‌ن له ڕێگه‌یانه‌وه پێوه‌ره‌كانیان پێ داده‌ندرێت، ئاستێكیان پێداویستیی مرۆڤایەتییە، ئاستێكی تر پێداویستیی ناوخۆییە. د.رۆژین دەڵێت، ئەمە وادەكات پڕۆگرامەكانی ئێمە جیا بێت لە وڵاتی تر و لەهەمان كاتدا دانەبڕاو بین لە جیهانی دەرەوە. ئەو پێوەرانەی لەسەر ئاستی جیهانی باس دەكرێن، بوونی ڕوونی و بیركردنەوەی پەرەپێدانی بەردەوام و بوونی كوالیتیی بەرز، یان بوونی كاریگەری، ئێستا لە ئەكادیمیای پێشكەوتوو یان پڕۆگرامەكانی خوێندنی باڵا، ناگوترێت زانست لەپێناوی زانست، بەڵكو دەگوترێت زانست لەپێناوی كۆمەڵگه. بۆ نموونە لە وڵاتی بەریتانیا هەڵسەنگاندن لەسەر ئەو پێوەرە دەكەن تاچەند دەرچووەكانیان خزمەتی كۆمەڵگە دەكەن، توێژینەوەكانیان تاچەند كاریگەری هەبووە و سوودی بووە و كێشەكانی كۆمەڵگە چارەسەر دەكات، ئەمە بەدەر لە كتێبخانەكان كە كتێبی تێدا هەڵگیراوە، ئەوان كاریگەریی زیندوویان دەوێت، بۆیە كاریگەریی پڕۆژەكانیان دەپێون، ئەم پێوانە لەسەر بنەمای چەند پێوەرێكی سەرەكی و توێژینەوەیەك دەكرێت، پێوەرەكانیش لەسەر ئاستی ناوخۆ پێویستە بیریان لێ بكرێنەوە و پڕۆگرامەكانیش لەسەر بنه‌مای ئەمە هەڵسەنگاندنیان بۆ بكرێت.
ئەو مامۆستایەی زانکۆ دەڵێت:"بۆردی متمانه‌به‌خشین بەدەر لەوەی هاوكار دەبێت لە بەرزكردنەوەی كوالیتیی خوێندن و هەڵسەنگاندن و دیاریكردنی كێشەكان و هەلەكان بۆ پێشخستن، یەكێك لە سوودە هەرە سەرەكییەكانی هاوكاری لە ئاڵوگۆڕدایە، بۆنموونە ئەو پڕۆگرامانەی لەنێوان زانكۆ تایبه‌ت و حكومییەكاندا هەیە، بەپێی ئەو كەیسانەی هه‌یه، كاتێك قوتابیەك بیەوێت لە زانكۆیەكی تایبه‌ت بچێت بۆ یەكێكی دیكە كێشەی لە نەخوێندنی هەندێک بابه‌ت دەبێت كە لەشوێنی خۆی خوێندوویەتی، بەڵام لەسەر ئاستی دەرەوە بۆنموونە لەگەڵ وڵاتێكی وەكوو ئەمریكا و كەنەدا ئەم شێوازی متمانەبەخشینە ببەسترێتەوە بە سیستەمێكی متمانەبەخشینی نێودەوڵەتی، ئەوكاتە قوتابییەك لە زانكۆی خۆمان دەرچووە وەكو ئەوە وابێت لە زانكۆیەكی ئەمریكا دەرچووبێت و هەمان بڕوانامەی هەبێت، لەبەر ئەوەی ئەو پێڕۆگرامە لەلایەن ئەو بۆردەوە متمانەپێكراوە."
فه‌رمانگه‌ی میدیا و زانیاری
٦ی کانوونی دووەمی ٢٠٢٣