هەولێر، هەرێمی کوردستان، عێراق (GOV.KRD)- به‌ ئاماده‌بوونی د. خانزاد ئه‌حمه‌د ئه‌مینداری گشتی ئه‌نجوومه‌نی باڵای كاروباری خانمان و نوێنه‌رانی ئاژانسی UNDP و لایه‌نه‌ په‌یوه‌ندیداره‌كان، كۆبوونه‌وه‌یه‌كى ڕاوێژكاری بۆ پێداچوونه‌وه‌و پشتگیریكردنى یه‌كسانى و دادپه‌روه‌رى جێنده‌ریى له‌ یاساو ڕێساكانى هه‌رێمى كوردستاندا، به‌ڕێوه‌چوو. 

  ئه‌م كۆبوونه‌وه‌یه‌ رۆژی دووشه‌ممه‌ 12ی ته‌مموزی 2021 ، له‌لایه‌ن ئه‌نجوومه‌نى باڵاى كاروبارى خانمان- حكومه‌تی هه‌رێمى كوردستان،  به‌هاوكارى پرۆگرامى گه‌شه‌پێدانى نه‌ته‌وه‌ یه‌كگرتووه‌كان  UNDP ئه‌نجامدرا،  به‌ئامانجی پێشكه‌شكردنى كورته‌یه‌كى به‌رایى كه‌ وه‌سفی پاشخان و بناغه‌ى لۆژیكى و چوارچێوه‌ى هه‌ڵسه‌نگاندن و ڕێبازى په‌ره‌پێدانى ڕاپۆرته‌ هه‌رێمییه‌كان ده‌كات، وێڕای پێشكه‌شكردنى ئه‌نجامه‌كانى ئه‌م لێكۆڵینه‌وه‌یه،‌ په‌یوه‌ست به‌ هه‌رێمى كوردستان. 

  ئاژانسی UNDP بەهاوکارى UN Women، UNFPA، و ESCWA، هه‌ستاوه‌ بەئەنجامدانى لێکۆڵینەوەیەکى هەرێمى لەسەر بابەتى یەکسانى جێندەریى و یاسا به‌مه‌به‌ستی پێشکەشکردنى هەڵسەنگاندنێکى تێروتەسەل بۆ ئەو یاساو پەیڕەوانەى کاردەکەنە سەر یەکسانى جێندەریی و پارێزگاریکردنیان دژى توندوتیژى لەسەر بنەماى جێندەریى لە رۆژهه‌ڵاتی ناوه‌ڕاستدا. 
ئەم لێکۆڵینەوەیە سەرەتا لە 2018 بڵاوکرایەوەو لە ساڵی 2021 دووبارە پێداچوونەوەى بۆ کرا.