ئەكادیمیای كوردی لە ڕێوڕەسمێكی شایستەدا پلەی ئەندامێتیی شكۆمەندی بە " دارا عەتار " بەخشی

هەولێر، هەرێمی کوردستان، عێراق (GOV.KRD)- ڕۆژی چوارشەممە 9/3/2022، ئەكادیمیای كوردی، بەلەبەر چاوگرتنی بەرهەم و خزمەتەكانی لە ڕێوڕەسمێكی شایستەدا پلەی ئەندامێتیی شكۆمەندی بە نووسەر و وەرگێڕ (دارا عەتار ) بەخشی .
مەراسیمەكە بە ئامادەبوونی ئەندامانی ئەنجومەنی ئەكادیمیای كوردی و چەندین مامۆستای زانكۆ و كەسانی ڕۆشنبیر و نووسەر بەڕێوەچوو.
سەرەتا د. ڕەشاد میران، جێگری سەرۆكی ئەكادیمیای كوردی، باسی وێستگە گرینگەكانی ژیان و بەرهەم و كار و چاڵاكییەكانی مامۆستا دارا عەتاری كرد.
دواتر د. عەبدولفەتاح بۆتانی، سەرۆكی ئەكادیمیای كوردی و مامۆستا خوسرەو جاف، نووسەر ئەدیب بیرەوەری و یادگارییەكانی خۆیان لەگەڵ مامۆستا دارا گێڕایەوە.
پاشان مامۆستا دارا عەتار، چەند وشەیەكی پێشكەشكرد و سوپاسی ئەكادیمیای كوردی كرد بۆ ڕێكخستنی ئەم مەراسیمە و دواتر باسی كۆی ئەزموون و چاڵاكی و بەرهەكانی خۆیی كرد.
لە كۆتاییدا لەلایەن پ.د. عەبدولفەتاح بۆتانی، سەرۆكی ئەكادیمیای كوردی بڕوانامەی ئەندامێتیی شكۆمەند بە نووسەر بەخشرا.

 

 

ـ دارا كاكەحەمە ئەمین عەتار.

ـ لە بنەماڵەی عەتارەكانی شاری سلێمانی، لە رۆژى ٥ى مانگى هەشتى ساڵی ١٩٤١ لە گەڕەكی دەرگەزێن لەناو شارى سلێمانى لە دایك بووە.

ـ قۆناغەکانى خوێندنى سەرەتایی و ناوەندی و دواناوەندی لە شاری سلێمانی تەواو کردووە.

لەو قۆناغانەدا بە پێی تەمەن و توانا بەشدارى لە چالاکییە پەروەردەیی و سیاسییەکان کردووە، لەوانەش (یەکێتى قوتابیانى کوردستان) و دەرکردن و بڵاوکردنەوەى (بڵاوکراوەى قوتابخانەى ناوەندى (سانەوى سلێمانى) لە شارى سلێمانى.

ـ ساڵی ١٩٦١ بەمەبەستی تەواوكردنی خوێندن چووەتە بریتانیا و لە شاری لەندەن گیرساوەتەوە.

ـ یەکەم نامەى سەرکردایەتى شۆڕشی ئەیلوول لەبارەى دەستپێکردنى شۆڕش بۆ ئەوروپا لە ڕێگەى ئەوەوە نێردراوە بۆ د. کەمال فوئاد نوێنەرى پارتى دیموکراتى کوردستان لە ئەڵمانیا.

ـ بڕوانامەى دبلۆمى باڵاى لە سەنتەرى پەیمانگەى لەندەن ـ زانکۆی لەندەن بۆ کاروبارى نێودەوڵەتى وەرگرتووە. 

ـ لە ساڵى ١٩٦٢وە ئەندامی دەستەی بەڕێوەبەرى لقى ئینگلستانى كۆمەڵەی خوێندكارانی كورد بووە لە ئەوروپا، دواتر بووەتە سکرتێری لقى ئینگلستان و ئەندامى لیژى بەڕێوەبردنى گشتیی کۆمەڵەى خوێندکارانى کورد لە ئەوروپا.

ـ لە ساڵى ١٩٦٤وە تا ئێستا لە وڵاتانى ئەوروپا، ئەمریکا، ئەفریقا و ئاسیا بەشدارى زۆربەى کۆنگرە و کۆنفرانسەکانى تایبەت بە کورد و کوردستان دەکات.

ـ ساڵی ١٩٦٩ بۆتە سەرنووسەری ژمارە ١٣ى گۆڤاری كوردستان، ئۆرگانی كۆمەڵەی خوێندكارانی كورد لە ئەوروپا بە زمانى ئینگلیزى.

ـ لە ساڵى ١٩٦٨ بە گواستنەوەى ناوى رێکخراوى (CAK) لە ئەمریکا کە د. شەفیق قەزاز دایمەزراندبوو، بە هاندانى (تۆفیق وەهبی) ڕێکخراوى (CAK)ى لە لەندەن دروستکرد و بڵاوکراوەیەکى زمانحاڵى ڕێکخراوەکەى دەرکردووە و بە ڕاوێژى تۆفیق وەهبی ناوی لێنراوە (Kurdica).

ـ لە ساڵى ١٩٨٣ بە هاوکارى چەند کوردێک لەوانەش: (شەفیق قەزاز ـ هاوار کاکە زیادى کۆیی ـ سیامەند بەننا ـ شێرکۆ عابید ـ هۆشیار عابید) مەڵبەندى ڕۆشنبیری کوردى لە لەندەن دامەزراندووەو چەندان بڵاوکراوەى لە خزمەتى مێژوو و وشەى کوردى بڵاوکردۆتەوە.

 

ـ لە ساڵى ١٩٨٣ سندوقى (Kurdish Trustکۆمەکییەکان بۆ کوردستان)ى دامەزراندووە و بەهۆیەوە هاوکارى ماددى کۆکردۆتەوە بۆ کڕینى باڵەخانەى مەڵبەندى ڕۆشنبیری کورد لە لەندەن.

ـ لە ساڵى ١٩٨٤ هاوکارى دوکتۆر نەجمەدین کەریم دەکات بۆ دامەزراندنى پەیمانگەى کوردى لە واشنتن.

ـ لەماوەیەدا چەند گۆڤارێکى دیکەى بە زمانەکانى عەرەبی و ئینگلیزى لە چوارچێوەى ڕێکخراوە کوردییەکان دەرکردووە لەوانەش: گۆڤارى (١١ى ئەیلوول) و (راپەڕین). 

ـ تا ساڵی ١٩٨٤ لە خزمەت مامۆستای كورد (تۆفیق وەهبی)دا بووە و لەگەڵ ئەودا زۆر بابەتی زمانەوانی و ئەدەبی كوردی تاوتوێ كردووە. 

ـ ساڵی ١٩٦٧ تا ١٩٧٠ لە بریتانیا نوێنەری فەرمی رێبەری كورد مەلامستەفای بارزانی نەمرو شۆڕشی ئەیلوول بووە، لە ساڵى ١٩٧١ بە هەمان ئەرکى نوێنەرایەتى دەگوازرێتەوە بۆ بیروت.

ـ دەستنیشانکراوى شۆڕشی کورد بووە دواى ڕێککەوتننامە ١١ى ئازارى ١٩٧٠ بۆ سکرتێری دووەمى دیپلۆماسی لە وەزارەتى دەرەوەى عێراق. 

ـ لە ساڵى ٢٠٠٥ دواى پێکهێنانى کابینەى تازەى حکومەتى عێراقیش بۆ باڵیۆزى عێراق لە لەندەن دەستنیشانکراوە.

ـ لە سەرەتاى حەفتاكانی سەدەی ڕابردووەوە تا ساڵی ١٩٩٩ وەك ڕاوێژکار لەگەڵ چەند شازادەیەکى بنەماڵەی شاهانەی سعودیە كاری كردووە، لەوانەش شازادە (خالد بن عبدالله ـ فیصل بن فهد و سەلمان بن عبدالعزیز) شاى ئێستاى سعودیە. 

ـ دوای گەیشتنی بە ئەوروپا، حەزی بە ئارشیڤی كورد كردووەو هەرچییەكی لەو چوارچێوەیەدا دەستی كەوتووە كۆی كردۆتەوەو پاراستویەتى و ئێستا خاوەنى ئارشیڤخانەیەکى کتێب و بەڵگەنامە و نەخشەو وێنەی تایبەتە بە کورد و کوردستان.

ـ یەکێک لە دەگمەنترین ئەو بەڵگەنامانەى لەو ئارشیڤخانەیەدا هەیە، ٣٣ دۆسیە و ٢٧٠٠ لاپەڕەیە لە حەوت بەرگدا تایبەت بە (بارزانى و جوڵانەوەى بارزانییەکان). هەروەها نەخشەیەکى کوردستان کە مێژووەکەى بۆ ساڵى ١٧٩٤ دەگەڕێتەوە. 

ـ تا ئێستا ئەم کتێبانەى بە چاپ گەیاندووە:

١ـ بژاردەیەکى ئەنتۆلۆژی ئارشیڤى کورد لە ئەوروپا بە زمانەکانى کوردى ـ عەرەبی ـ ئینگلیزى.

٢ـ ئەحمەد خواجە چی دیوە ـ هەڵسەنگاندن بۆ کتێبی (چیم دی).

٣ـ خەباتى کورد لە پێناوى ناسنامەکەیدا ـ دەقى وتارەکانى کۆنگرەى ناسنامەى کورد و مافى مرۆڤی کورد لە ساڵى ١٩٨٩ لە پاریس

٤ـ کەسایەتییە ناودارەکانى کورد لە ڕاپۆرتەکانى نوێنەرى سامى بریتانیدا بۆ حکومەتەکەى. 

هەروەها ئەم کتێبانەشی ئامادەن بۆ چاپکردن:

١ـ بیرەوەرییەکانى دارا عەتار

٢ـ ئەلبوونى بنەماڵەى عەتار

 

ـ راوێژکارى پێشکەوتووى جەنابی (مەسعود بارزانى) سەرۆکى پارتى دیموکراتى کوردستانە.

ـ ساڵی ١٩٨٣ لە شارى لەندەن ژیانی هاوسەرگیری لەگەڵ خاتوو (ڕیم عەبدولقادر بابان) پێكهێناوەو دوو كوڕی بەناوەكانی (میران ـ ئازاد) هەیە.

ـ لە شاری هەولێر نیشتەجێیە..