هەولێر، هەرێمی کوردستان، عێراق (GOV.KRD)- رۆژی 2021/7/7،  بێگەرد تاڵەبانی وەزیری کشتوکاڵ و سەرچاوەکانی ئاو، لە هەولێر سه‌ردانی پڕۆژەی جوتیارێکی نموونەیی كرد كه‌ تایبه‌ت بوو به‌ بەرهەمهێنانی ترێ ، کە یەکێکە لە پڕۆژە گرنگەکانی بەرهەمهێنانی میوەی ترێ کە نزیکەی 80 جۆری جیاواز  بەرهەم دەهێنێت .

ئامانجی  ئەم سه‌ردانه‌  هاندان و پاڵپشتی ئەم پڕۆژەیە و دڵنیاییدانه‌ به خەڵکی کوردستان، کە پشت بە تایبەتمەندی بەکارهێنان و کڕینەوەی بەرهەمەکانی ناوخۆ ببەستن، کە فاکتەرێکی گرنگی تەندروستی و ئاسایشی خۆراکمانە و پاڵپشتییەکی بەهێزی جوتیاران و بەرهەمی خۆماڵییە.

لەئێستادا یەکێک لە بەرنامە گرنگ و ستراتیژیەکانی  وەزارەتی کشتوکاڵ و سەرچاوەکانی ئاو،  کارکردنە بۆ ساغکردنەوە و به‌ بازاڕکردنی بەرهەمی خۆماڵی جوتیاران لە ناوخۆ بۆ دەرەوەی هەرێمی کوردستان لەپێناو بەهێز کردنی سێکتەری کشتوکاڵ وەک بنەمایەکی بەهێزی ئابووری هەرێمی کوردستان.