سەنتەرێ زانكۆیا دهۆك بۆ پشكنین و ڤەكۆلینێن كۆرۆنایێ هاته ڤەکرن
هەولێر، هەرێمی کوردستان، عێراق (GOV.KRD)- سەنتەرێ زانكۆیا دهۆك بۆ پشكنین و ڤەكۆلینێن كۆرۆنایێ و نەخۆشیێن ڤەگر ل سەرۆكاتیا زانكۆیا دهۆك ژلایێ د. ئارام محمد قادر وەزیرێ خاندنا بلند و ڤەکۆلینێن زانستى و د. سامان بەرزنجى وەزیرێ ساخلەمیێ و سەرۆكێ زانكۆیا دهۆك ڤه هاته ڤەكرن.
وەزیرێ خاندنا بلند و ڤەكۆلینێن زانستى د. ئارام محمد قادر د كۆنفرانسەكێ رۆژنامەڤانى دا گۆت ڤەكرنا ڤى سەنتەرى پشكداریەكا گرنگه بۆ كەرتێ ساخلەمى یێ ڤێ دەڤەرێ كو هەر ژ دەستپێكا پەیدابونا ڤى ڤایرۆسى خاندنا بلند رۆلەكێ باش هەبویه و ب هەماهەنگى دگەل وەزارەتا ساخلەمى ئەڤ خزمەته پێشكێشى وەلاتیان هاتینه كرن.
وەزیرێ ساخلەمیێ د.سامان بەرزنجى دەستخۆشى ل زانكۆیا دهۆك كر و سوپاسیا وەزیرێ خاندنا بلند كر و رۆلێ وەزارەتا خاندنا بلند گرنگ هەلسەنگاندو گۆت مه كارێ هەڤپشك گەلەكێ زووره ب تایبەت د بیاڤێ ساخلەمى دا.
د. جاسم محمد عەبدو مامۆستایێ زانكۆیا دهۆك و سەپەرشتێ تاقیگەهێن كۆرۆنایێ ل پارێزگەها دهۆكێ دیاركر كو كارێ ڤى سەنتەرى ئەنجامدانا ڤەكۆلینایه ل دۆر كەیسێن كۆرۆنایێ و ئەو ڤاكسینێن دهێنه دانان، ئەڤ سەنتەره دێ ژلایێ بۆردەكێ مامۆستایێن بسپۆر ڤه هێته برێڤەبرن، هەروەسا گۆت قوتابیێن ماستەر و دكتۆرایێ ژى ڤەكۆلینێن خۆ یێن دڤى بیاڤى دا دێ ل ڤى سەنتەرى ئەنجام دەن.
دڤێ سەرەدانا خۆدا بۆ زانكۆیا دهۆك وەزیرێ خاندنا بلند و ڤەكۆلینێن زانستى سەرەدانا یەكەو بەشێن كارگێرى یێن زانكۆیا دهۆك كر و ژ نێزیك ل دۆر ب رێڤەچونا كارى ل زانكۆیێ ئاگەهدار بوو.