یادی شەهیدانی ڕاپەڕینی ١٩٨٧ی ھەڵەبجە و ھەورامان و شارەزوور بەرز ڕاگیرا

هەولێر، هەرێمی کوردستان، عێراق (GOV.KRD)-  بۆ زیندوو ڕاگرتنی یادی ڕاپەڕینی ساڵی ١٩٨٧ی ھەڵەبجە و ھەورامان و شارەزوور، ڕێوڕەسمێک لە گۆڕستانی شەهیدانی هەڵەبجە ڕێکخرا. 
ڕێوڕەسمەکە بە چاودێریی پارێزگاری ھەڵەبجە و بەڕێوەبەرایەتی گشتی کاروباری شەھیدان و ئەنفالکراوانی ھەڵەبجە ڕێکخرابوو، تێیدا کەسوکاری شەهیدان و  قوربانیانی ڕاپەڕینەکە و نوێنەرانی حکومی و حزبی ناوچەکە بەشدار بوون.
دەستپێکی مەراسیمەکە بە ساتێك وەستان بۆ ڕێزگرتن لە شەھیدانی ڕاپەڕینی 13 ی ئایار ده‌ستی پێ کرد ، پاشان وتاری بەخێرھاتن لەلایەن کامەران مستەفا  بەڕێوەبەری گشتی شەھیدان و ئەنفالکراوانی ھەڵەبجە بە وەکالەت، پێشکەش کرا.
هه‌ر له‌ مه‌راسیمه‌كه‌دا  بەشێك لە بەشداربووانی ڕاپه‌ڕینه‌كه‌ بیرەوەری خۆیان گێڕایه‌وه‌ و لە کۆتاییشدا تاجەگوڵینەی ڕێز و وەفا لە بەردەم ناو و گڵكۆی شەھیدەکان  دانرا .