دانیشتووانی گوندی ڕەشكین لە هەولێر بە پێدانی چەند پارچە زەوییەك قەرەبوو كرانەوە
پرۆسەی بەڕێوەچوونی تیروپشك بۆ قەرەبووكردنەوەی گوندی ڕەشكین بە پێدانی مافکەوتەی ژمارەی زەوی لە شاری هەولێر بەڕێوەچوو و ساسان عەونی، وەزیری شارەوانی گەشتو گوزار رایگەیاند، لەسەر ڕاسپاردەی جەنابی سەرۆكی حكومەت، دانیشتووانی ڕەشكین لە باشترین شوێنی شاری هەولێر قەرەبوو كرانەوە و شوێنەكەش دەكرێتە شەقامی دووساید و پارك و ناوچەیی سەوزایی و بەناوی "ڕەشكین"ەوە دەكرێن.
رۆژی پێنجشەممە ١٨ی ئایاری ٢٠٢٣، بە ئامادەبوونی ساسان عەونی، وەزیری شارەوانی و گەشتوگوزار و دادوەری داواکاری گشتی و سەرۆكی شارەوانیی هەولێر و قائیمقامی ناوەندی هەولێر و لیژنەی قەرەبوووكردنەوە و دانیشتووانی گوندی ڕەشكین لە سەرۆكایەتیی شارەوانیی هەولێر، پرۆسەی تیروپشك بە پێدانی چەند پارچە زەوییەك بۆ قەرەبووكردنەوەی هەر خاوەن مافێکی گوندی ڕەشكین بەڕێوەچوو و هەر هەمان رۆژ سەنەدی زەوییەكانیان وەرگرت.
وەزیری شارەوانی و گەشتوگوزار ڕایگەیاند: ''مافی دانیشتووانی ڕەشكین زۆر بە زیادەوە حسابی بۆ كراوە و لە شوێنە زۆر باشەكانی شاری هەولێر زەویەکەیان وەردەگرن.''
ساسان عەونی ئاماژەشی بەوەدا کە ڕەشكین كەوتووەتە ناوچەی قەدەغەكراوی فڕۆكەخانەی نێودەوڵەتی هەولێر و لە ماستەرپلاندا سەوزاییە بۆیە ئەو دامەزراوانەی ئەوێ لەوێ لادەچن و لە شوێنەكەشی شەقامی دووساید بەناوی شەقامی ڕەشكین دروست دەكرێت و دەكرێتە پارك و ناوچەی سەوزایی و بە هەمان شێوە بەناوی "ڕەشكین" دەكرێن، ئەمەش بۆ ئەوەیە ناوی ڕەشكین بمێنێتەوە.
ساسان عەونی، راشیگەیاند:''لەسەر ڕاسپاردەی جەنابی كاك مەسرور بارزانی، سەرۆكی حكومەتی هەرێمی كوردستان بۆ ئەوەی دانیشتووانی ڕەكشین، مافیان نەفەوتێت و بە زیادەوەش مافیان پێبدرێت، لە نزیكترین و باشترین شوێنەكانی شاری هەولێر بۆ قەرەبووكردنەوەی دانیشتووانی ڕەشكین، لە كەرتی٣٢ی پارك و ناوچەی تێرمیناڵ لە هەولێر زەوییان بۆ تەرخانکراوە، بۆیە لەسەر ڕاسپاردەی جەنابی سەرۆكی حكومەت گرنگترین زەویی شاری هەولێر بۆ دانیشتووانی ڕەشكین كردە قەرەبوو و شوێنی نیشتەجێ بوون، بۆیە بە زیادەوە قەرەبووی دانیشتووانی ڕەشكین کراوەتەوە.''
وەزیری شارەوانی و گەشتوگوزار گوتیشی:''ئەوەی حەز دەكات لە ٣٢ی پارك دەست بە دروستكردنی خانووەكەی بكات، ئەمڕۆ سەنەد وەردەگرێت و بە هەمان شێوە لە تێرمیناڵیش سەنەد وەردەگرن و یەكسەر ڕێپێدانیش وەردەگرن و هەر كەسێكیش ناڕازییە یان پێیوایە مافی وەك پێویست نەدراوە، تاوەكوو یەك هەفتە، لیژنەی قەرەبووكردنەوە سكاڵاكان وەردەگرێت.''
