بەرپرسی پەیوەندییەکانی دەرەوەی حکومەتی هەرێم سوپاسی حکومەتی کۆریا و کونسوڵگەرییان لە هەرێم دەکات بۆ پێشکەشکردنی هاوکاری پزیشکی بۆ هەرێمی کوردستان
![](/media/2968/minister-safeen-dizayee-thanks-korea-s-government.jpeg?anchor=center&mode=crop&width=1200&height=630&rnd=132423354080000000)
ڕۆژی شەممە ١٥ی ئابی ٢٠٢٠، بەڕێز سەفین دزەیی، بەرپرسی پەیوەندییەکانی دەرەوەی حکومەتی هەرێمی کوردستان سوپاسی هەریەک لە حکومەتی کۆریای باشوور و بەڕێز چۆی کوانگ ژین کونسوڵی گشتییان لە هەرێمی کوردستان و ئەوانەش کە بەشداربوون بۆ پێشکەشکردنی هاوکاری و پێداویستی پزیشکی بۆ هەرێمی کوردستان لە ڕووبەڕووبوونەوەی پەتای ڤایرۆسی کۆڕۆنادا.
هاوکات بەڕێز سەفین دزەیی سوپاسی یارمەتی و هەوڵە بەردەوامەکانی کونسوڵگەری کۆریا لە هەرێم کرد بۆ دۆستایەتیی بەردەوامیان لەگەڵ حکومەت و گەلی کوردستاندا، ووتی "پەیوەندییەکی پتەو و دۆستایەتییەکی بەهێز هەرێمی کوردستان و کۆریا بەیەکەوە دەبەستێتەوە، هیوادارین ئەم پەیوەندییانە زیاتر بەرەوپێشبچێت لە سەرجەم ئاست و بوارەکاندا."
لە مەڕاسیمێکدا کە لە فڕۆکەخانەی نێودەوڵەتی هەولێر لە ١٢ی ئابدا بەڕێوەچوو بە ئامادەبوونی د. سامان بەرزنجی وەزیری تەندروستی حکومەتی هەرێم و ستافی فەرمانگەی پەیوەندییەکانی دەرەوە و ستافی کونسوڵگەری کۆریا لە هەولێر، کونسوڵی گشتی هاوکارییەکانی حکومەتی کۆریا کە بریتی بوو لە بڕی ٤٠٠ هەزار دۆلار کیتی پشکنینی ڤایرۆسی کۆڕۆنای نوێی پێشکەشی هەرێمی کوردستان کرد.