سەفین دزەیی پێشوازی لە کونسوڵی گشتیی شانشینی بەریتانیا لە هەرێم كرد
![](/media/17088/fi0m7ibxkaa1spy.jpg?anchor=center&mode=crop&width=1200&height=630&rnd=133143607080000000)
ڕۆژی چوارشەممە، ٣٠ی تشرینی دووەمی ٢٠٢٢، سەفین دزەیی، بەرپرسی فەرمانگەی پەیوەندییەکانی دەرەوەی حکومەتی هەرێمی کوردستان پێشوازی لە دەیڤد هەنت، کونسوڵی گشتیی شانشینی بەریتانیا لە هەرێمی کوردستان کرد بەبۆنەی تەواوکردنی ئەرک و کارەکانی لە هەرێمی کوردستان.
لە دیدارەکە، باس لە دوایین پێشهاتە سیاسییەکانی ناوچەکە و ئاستی پەیوەندییە دوولایەنەکان کرا و جەخت لە پێشکەوتنی زیاتر کرایەوە لە سەرجەم بوارەکاندا.
بەرپرسی فەرمانگە خزمەت و بەشدارییەکانی کونسوڵی گشتیی بەریتانیای بەرز نرخاند کە لە پێناو پەرەپێدانی هەماهەنگییەکان لەو ماوەیەدا ئەنجامیداوە، هاوکات تیشکی خستەسەر پەیوەندی لەمێژینە و دۆستانەی نێوان هەرێمی کوردستان و شانشینی بەریتانیا، هیوای سەرکەوتنی لە ئەرکەکانی داهاتوودا بۆ خواست.
لە بەرامبەردا، کونسوڵی گشتیی بەریتانیا سوپاسی حکومەتی هەرێمی کوردستان و فەرمانگەی پەیوەندییەکانی دەرەوە و سەرجەم دامودەزگاکانی دیكهی حکومەتی هەرێمی کرد بۆ پاڵپشتیکردن لە کارەکانیدا. هاوکات خۆشحاڵی خۆی بە مانەوە و سەقامگیری لە هەرێم و دۆستایەتی و پێشوازی گەرمی گەلی کوردستان و کلتوور و پێکەوەژیانی ئاشتییانە دەربڕی.