سەفین دزەیى پێشوازیى لە باڵیۆزى بەنگلادیش لە عێراق کرد
![](/media/20508/sasa.jpg?anchor=center&mode=crop&width=1200&height=630&rnd=133312872570000000)
ڕۆژی چوارشەممە، ١٤ی حوزەیرانی ٢٠٢٣، سەفین دزەیی، بەرپرسى فەرمانگەی پەیوەندییەکانی دەرەوە، پێشوازیی لە محەمەد فەزلول بارى، باڵیۆزى بەنگلادیش لە عێراق کرد.
لە دیدارەکەدا بەرپرسی فەرمانگە پوختەیەکى لەسەر دوایین پێشهاتەکان و بارودۆخى ناوخۆ و پەیوەندیەکانى هەولێر و بەغدا و ڕوانگەى حکومەتى هەرێم بۆ پرسە هەنووکەییەکان بۆ باڵیۆز ڕوون کردەوە و هاوکات بابەتى پەرەپێدانى پەیوەندیی دوولایەنە بەتایبەت لە بابەتى برەودان بە پەیوەندیى بازرگانى و ئابوورى تەوەرەیەکى دیکەى کۆبوونەوەکە بوو.
باڵیۆز فەزلول، ڕایگەیاند "وڵاتەکەى نیازى پتەوکردنى پەیوەندی هەیە لەگەڵ عێراق و هەرێمى کوردستان، بە تایبەت لە بوارى ئابوورى و بازرگانى" و بۆ ئەم مەبەستەش ئاماژەى بەوە دا "بڕیارە لە داهاتوویەکى نزیک شاندێکى بازرگانى سەردانى عێراق و هەرێمى کوردستان بکەن و چەند کۆبوونەوەیەک بکەن لەگەڵ لایەنە پەیوەندیدارەکانى حکومەتى هەرێم بە مەبەستى هاندانى بازرگان و وەبەرهێنەرانى هەردوو لایەنى بەنگلادیش و هەرێمى کوردستان بۆ زیاتر لەیەک نزیکبوونەوە و دۆزینەوەى دەرفەتى هاوبەش لە بوارەکانى ئابوورى و بازرگانى".
باڵیۆز سوپاس و پێزانینى بۆ حکومەتى هەرێمى کوردستان و فەرمانگەى پەیوەندییەکانى دەرەوە دەربڕى بۆ هاوکارى و هەماهەنگیی بەردەوام و هاوکاریکردنى هاووڵاتییانى بەنگلادیشى لە جێبەجێکردنى کارەکانیان.
بەرپرسی فەرمانگە ئامادەیی و پشتگیریى فەرمانگە و دامەزراوەکانی حکومەتى هەرێمى دووپات کردەوە لە پشتگیریکردنى ئەم جۆرە هەنگاوانە و ئامادەیی بۆ هەر جۆرە هاوکاری و هەماهەنگییەک دەربڕى.