سەفین دزەیى پێشوازیی لە باڵیۆزى یەکێتیی ئەورووپا لە عێراق کرد
![](/media/19770/347382956_162703830075000_60784465413637186_n.jpg?anchor=center&mode=crop&width=1200&height=630&rnd=133287905260000000)
ڕۆژی سێشەممە، ١٦ی ئایاری ٢٠٢٣، سەفین دزەیی، بەرپرسى فەرمانگەی پەیوەندییەکانی دەرەوەی حکومەتی هەرێمى کوردستان پێشوازیی لە ڤیلى ڤاریۆلا، باڵیۆزى یەکێتىی ئەورووپا لە عێراق و تۆرکید بیۆگ، بەرپرسی نووسینگەى یەکێتىی ئەورووپا لە هەرێم و شاندى یاوەرى کرد.
بەرپرسی پەیوەندییەکانی دەرەوە پوختەیەکی لەسەر ڕەوشی هەرێمی کوردستان لە ڕووی سیاسی و ئابووری و سەروەریی یاسا پێشکەش کرد و تیشکى خستە سەر چەند پرسێکی هەنووکەیی و پەیوەندییەکانى نێوان هەولێر و بەغدا.
باڵیۆزی یەکێتیی ئەورووپا خۆشحاڵیی خۆى دەربڕى بە سەردانی بۆ هەرێمى کوردستان و ئاماژەى بەوە دا کە یەکێتیی ئەورووپا بەردەوام دەبێت لە هاوکارىکردنى ئاوارە و پەنابەران لە ڕێگەى ئاژانسەکانیان.
لە تەوەرەیەکى دیکەى کۆبوونەوەکە باس لە هەڵبژاردنەکانى داهاتووى هەرێمى کوردستان و ئامادەکارییەکان کرا.
دواتر بیروڕا ئاڵوگۆڕ کرا لەربارەی پرسی کۆچى نایاسایی و ڕێگریکردن لە بازرگانیکردن بە مرۆڤ.