جێگرى بەرپرسى فەرمانگەی پەیوەندییەکانی دەرەوە پێشوازی لە کونسولی گشتیی کۆریای باشور لە هەرێم کرد
![](/media/26062/1.jpg?anchor=center&mode=crop&width=1200&height=630&rnd=133576451460000000)
ڕۆژی یەکشەممە ١٤ــی نیسانی ٢٠٢٤، دابان شەدەڵە، جێگرى بەرپرسى فەرمانگەی پەیوەندییەکانی دەرەوە، پێشوازی لە کونسولى گشتیی کۆریا لە هەرێم کرد.
لە سەرەتاى دیدارەکەدا، جێگرى بەرپرسى فەرمانگە، بەخێرهاتنی کونسولى گشتى کرد و خۆشحاڵیى خۆى بە سەردانى جەنابیان دەربڕی، ئامادەییی فەرمانگەى پەیوەندییەکانى دەرەوەی بۆ هاوکارى و هەماهەنگیى پێویست نیشان دا، بۆ پتەوتر کردنى پەیوەندییەکان، بە تایبەتى لە بوارەکانى ئابوورى و کولتوورى و خوێندنى باڵا.
تەوەرێکى دیکەی کۆبوونەوەکە بریتى بوو لە باسکردنی کردنەوەى خولى ڕاهێنان بۆ کارمەندانى حکومەتى هەرێمى کوردستان لە چەندین بوارى جیاواز و سوودوەرگرتن لە ئەزموونى کۆریا، وەک یەک لە ئەزموونە سەرکەوتووەکانى ناوچەکە.
لاى خۆیەوە کونسولى گشتیى کۆریا خۆشحاڵیى خۆى بە ڕێکخستنى ئەم دیدارە دەربڕی و سوپاسى هاوکارى و هەماهەنگیى بەردەوامى فەرمانگەى پەیوەندییەکانى دەرەوەى کرد لەگەڵ کونسولگەرى، وە ئامادەییى کونسولگەرى نیشان دا بۆ پێشکەشکردنى هاوکاریى پێویست لەم بارەیەوە.
لە تەوەرێکى دیکەى کۆبوونەوەکەدا هەردوولا باسیان لە بارودۆخى ناوچەکە و پەیوەندییەکانى نێوان هەولێر و بەغدا کرد.