سەفین دزەیی لەگەڵ باڵیۆزی یەکێتیی ئەورووپا لە عێراق کۆبووەوە
ڕۆژى سێشەممە ٢٣ى ته‌مموزى ٢٠٢٤, لە دیدارێکى نێوان سەفین موحسین دزەیی, بەرپرسى فەرمانگەی پەیوەندییەکانى دەرەوەى حکومەت، لەگەڵ تۆماس سەیلەر, باڵیۆزی یەکێتیی ئەورووپا لە عێراق و بەرپرسی ئۆفیسى یەکێتیى ئەوروپا لە هەرێم، باس لە دوایین پێشهاتەکانى هەڵبژاردنى پەرلەمانی کوردستان و پەیوەندییەکانی نێوان هەولێر و بەغدا کرا.
لە کۆبوونەوەکەدا, بابەتی پەنابەری تاووتوێ کرا و تیشک خرایە سەر گرنگیی ڕۆڵی هەرێمی کوردستان لە کاتی شەڕی داعش, کە بۆ یەکەم جار بوو هەرێمی کوردستان ژمارەیەکى زۆر ئاوارە و پەنابەرى له‌و شێوه‌يه لە خۆ بگرێت و تا ڕادەیەکی زۆر باش پێداویستییە سەرەکییەکانى وه‌ك قوتابخانە، شوێنی حەوانەوە, نۆڕینگە و خۆراکيان بۆ دابین بکات. سەبارەت بە گەڕانەوەشیان, هەردوو لا کۆک بوون له‌سه‌ر گه‌ڕاندنه‌وه‌یان بە سەلامەتی و شکۆوە بۆ زێدەکانیان.
بابەتی هەڵبژاردنى پەرلەمانى کوردستانیش یەکێک بوو لە تەوەرەکانی تری کۆبوونەوەکە, باڵیۆزى یەکێتیی ئەورووپا لە عێراق پشتگیریی خۆی بۆ پرۆسەی هەڵبژاردنى پەرلەمانى کوردستان دەربری و بە پرۆسەیەکی دیموکراسی وەسف کرد, هه‌روه‌ها سه‌فين دزه‌يی ئاماژەى بەوە کرد کە "هەرێمی کوردستان هەمیشە لەگەڵ پرۆسەی هەڵبژاردن و سیاسەتی شەفافانە بووە, هەر لە دوای ڕاپەڕینەوە، کە یەکەم هەڵبژاردن کرا لە ساڵی ١٩٩٢, هەرێمی کوردستان تا ئێستاش پابەندە بە پرۆسەی هەلبژاردن" و بە پرۆسەیەکی دیموکراسی و گرنگ ناوی برد.
له كۆتايیى كۆبوونه‌وه‌كه‌دا, باڵیۆزى یەکێتیی ئەورووپا خۆشحاڵیی خۆی دەربڕی کە ئەمە جاری سێیەمە سەردانی هەرێمی کوردستان دەکات و لەنزیکەوە چاوی بە بەرپرسانى هەرێم دەکەوێت.
