بەرپرسی فەرمانگەی پەیوەندییەکانی دەرەوە لەگەڵ باڵیۆزی یۆنان لە عێراق کۆبووەوە
ڕۆژى سێشەممە ١٥ى نيسانى ٢٠٢٥، سەفین موحسین دزەیی، بەرپرسی فەرمانگەی پەیوەندییەکانی دەرەوە، لەگەڵ جۆرجۆس ئەلمانۆس، باڵیۆزی یۆنان لە عێراق و نیکۆلا ستێرجیولا، کونسولی یۆنان لە هەرێم کۆبووەوە.
لەمیانی دیدارەکەدا گفتووگۆیان لەسەر پەرەپێدانی پەیوەندییەکانی هەرێمی کوردستان و یۆنان کرد، بە تایبەتی لە بواری ئابووری و کشتوکاڵ. بۆ ئەم مەبەستەش هەردوولا پێشنیاری سازدانی کۆڕبەندێکی ئابووريی هەرێمی کوردستان و یۆنانیان کرد.
لە تەوەرێکی دیکەی دیدارەکە، باسی دۆخی گشتيی ناوچەکە و ڕۆژهەڵاتی ناوەڕاست و ڕەوشی هەنووکەیی کرا، بە تایبەتی گۆڕانکارییەکانی ئەم دواییەی سووریا.
باڵيۆزى يۆنان خۆشحاڵيی خۆی به سەردانەکەی بۆ هەرێمی کوردستان دەربڕی و ستایشی ئەو سەقامگیریيەی کرد کە لە هەرێمی کوردستان هەیە، بە تایبەتی سەبارەت بە کریستیانەکانی هەرێمی کوردستان، وە پاڵپشتيی وڵاتەکەی بۆ هاوکاریکردن و پتەوکردنی پەیوەندییەکان دووپات کردەوە، هەروەها هیوای خواست کە پەیوەندییەکانیان لەگەڵ هەرێمی کوردستان فراوانتر بکەن.
