سەفین دزەیى پێشوازى لە باڵیۆزى سلۆڤینیا کرد

ڕۆژی چوارشەممە، ١٠ی کانوونی یەکەمی ٢٠٢٥، سەفین موحسین دزەیی، بەرپرسی فەرمانگەی پەیوەندییەکانی دەرەوە، پێشوازی لە گۆرازد ڕێنج، باڵیۆزى نانیشتەجێی سلۆڤینیا لە عێراق و شاندى یاوەرى کرد.

لە کۆبوونەوەکەدا، بەرپرسی فەرمانگە خۆشحاڵى خۆى لە بارەى سەردانى باڵیۆز بۆ هەرێمى کوردستان دەربڕى و هیواى خواست کە ئەم سەردانە ببێتە هۆى زیاتر پتەوبوونى پەیوەندیی نێوان هەرێمى کوردستان و وڵاتى سلۆڤینیا.

لەلایەن خۆیەوە باڵیۆزی سلۆڤینیا، سوپاسی ئەو پێشوازیەى کرد و ئاماژەى بەوەدا کە بۆ یەکەم جارە سەردانى هەرێمى کوردستان دەکات و سەرسامى خۆى لە بەرامبەر ئەو گەشەسەندنەى لە شارى هەولێر بەدى دەکرێت دەربڕى؛ هاوکات ئامانجى سەردانەکەى خستە ڕوو کە مەبەستیانە پەرە بە پەیوەندییەکانیان بدەن لەگەڵ عێراق و هەرێمى کوردستان. هەروەها ئاماژەى بەوەدا کە شاندێکى ڕێکخراوى خێرخوازى ITFى سلۆڤینى یاوەریانە کە لە بوارى مرۆیی کار دەکات، بە تایبەت بۆ کاروبارى هەڵگرتنەوەى مین و تەقەمەنى، بۆ ئەم مەبەستەش ئاماژەى بە پڕۆژەکانى ڕێکخراوى ناوبراو بۆ ساڵى داهاتوو لە هەرێمى کوردستان کرد.

لە تەوەرێکى دیکەى کۆبوونەوەکەدا، ڕەوشى ناوخۆى هەرێمى کوردستان و عێراق و هەنگاوەکانى پێکهێنانى حکومەتى عێراق، دواى ئەنجامدانى هەڵبژاردنەکان باسی لێوەکرا.

لە کۆتاییی دیدارەکەدا، هەردوولا بیروڕایان لە بارەى بەرەوپێشبردنى پەیوەندییەکان لە بوارەکانى ئابوورى و خوێندن و سوود وەرگرتن لە ئەزموونى ووڵاتى سلۆڤینیا ئاڵوگۆڕ کرد.