بە بۆنەی هاتنی شاندی باڵای بازرگانیی ئەڵمانی، کونسوڵگەریی گشتیی ئەڵمانیا لە هەرێم ڕێوڕەسمێکی ڕێکخست
ڕۆژی چوارشەممە، ٤ی شوباتی ٢٠٢٦، بە ئامادەبوونی سەفین موحسین دزەیی بەرپرسی فەرمانگەی پەیوەندییەکانی دەرەوە و ژمارەیەک لە وەزیر و دیپلۆمات و پیاوانی کار، کونسوڵگەریی گشتیی ئەڵمانیا لە هەرێم، بە بۆنەی هاتنی شاندی باڵای بازرگانیی ئەڵمانی، ڕێوڕەسمێکی ڕێکخست.
لە دەسپێکدا بەرپرسی پەیوەندییەکانی دەرەوە، وتارێکی پێشکەش کرد و بەخێرهاتنی لە شاندی بازرگانی ئەڵمانیا کرد. ئاماژەی بە پەیوەندیی دۆستانەی پتەوی نێوان ئەڵمانیا و هەرێمی کوردستان کرد و گوتی: "هیوادارین ئەم بۆنە و سەردانە دەرفەتێک بێت بۆ زیاتر پێشخستنی پەیوەندییە ئابووری و بازرگانییەکان؛ هەماهەنگیی نێوان ژوورە بازرگانییەکانی نێوان هەردوولا فراوانتر ببێت".
دواتر کونسوڵی گشتیی ئەڵمانیا ئالبرێشت ڤۆن ڤیتکە، سوپاسی ئامادەبووان و کۆمپانیاکانی ئەڵمانیای کرد لە بۆنەکە و ئاماژەی دا بە گرنگیی ڕۆڵی کۆمپانیاکانی ئەڵمانی و هەرێمی کوردستان، بۆ گەشەپێدانی ئابووریی هەرێمی کوردستان.
لە کۆتاییدا، خاتوو دۆرسیا شوتز جێگری بەڕێوەبەری گشتی لە وەزارەتی فیدڕاڵی ئابووری و وزەی ئەڵمانیا، ئاماژەیدا بە دەرفەتەکانی بازرگانیکردن لەنێوان کۆمپانیاکانی هەرێمی کوردستان و ئەڵمانیا، لە بواری کشتوکاڵ و خۆراک و تەکنۆلۆژیا.
