سەرۆکی دەستەى گشتيى ناوچه‌ كوردستانييه‌كان لەگەڵ نوێنەرانی جوتیارانی پارێزگه‌ی کەرکووک کۆبووەوە

ڕۆژى دووشەممە ٦ـی ئایارى ٢٠٢٤، فەهمی بورهان، سەرۆکی دەستەی گشتيی ناوچە کوردستانییەکانی دەرەوەی ئیدارەی هەرێم، بە ئامادەبوونی ئەندامانی  ئەنجومەنی دەستە، لەگەڵ نوێنەرانی جوتیارانی کورد و عەرەب و تورکمان لە ناوچەکانی ساڵەیی، سەرگەڕان و یایچیی له‌ پارێزگه‌ی کەرکووک کۆبووەوە.
مەبەستی کۆبوونەوەکە تاووتوێکردنی ئەو کێشە و گرفتانە بوو کە تاکوو ئێستا ڕووبەڕووی جوتیارانی کورد لەم ناوچانە دەبنەوە، بە تایبەتى کێشەی چاندن و دروێنە و کێشەی مەڕداری، هەروەها خاوەندارێتیى زەویى کشتوکاڵی و نیشتەجێبوون.

لەلایەکی ديكه‌وه‌ ئاماژە بە چۆڵبوونی لادێی کوردنشینان کرا، بە هۆکاری نەبوونی سەقامگیری و نائاراميی ناوچەکە. سەرۆکی  دەستە ڕایگەیاند "لەپێناو چارەسەرکردنی کێشەکان، هەوڵی  جددی دەدەن  بۆ گەیاندنی ئەو گرفتانە بە لایەنی پەیوەندیدار لە هەردوو حکومەتی هەرێم و فیدرال."