سەرۆکی دەستەی گشتیی ناوچە کوردستانییەکان و بریکاری وەزارەتی بازرگانی و پیشەسازی جەختیان لە کاری پێکەوەیی لە ناوچە کوردستانییەکان کردەوە
ئەمڕۆ دووشەممە ١١ی ئابی ٢٠٢٥، فەهمی بورهان سەرۆکی دەستەی گشتیی ناوچە کوردستانییەکانی دەرەوەی ئیدارەی هەرێم، پێشوازی لە عەلی عوسمان، بریکاری وەزارەتی بازرگانی و پیشەسازیی حکومەتی هەرێمی کوردستان کرد.
فەهمی بورهان تیشکی خستە سەر ڕەوشی ئێستا و کێشەکانی ناوچە کوردستانییەکان. هەروەها بۆ زیاتر ڕەخساندنی دەرفەتی کار و خزمەتکردنی خەڵکی ناوچەکە، داوای لە بریکاری وەزارەتی بازرگانی و پیشەسازی کرد، وەکوو وەزارەت لە کارەکانیاندا بە هەماهەنگی لەگەڵ دەستە، گرنگییەکی تایبەت بە ناوچە کوردستانییەکان بدەن.
بریکاری وەزارەتی بازرگانی و پیشەسازی خزمەتکردنی خەڵکی ناوچە کوردستانییەکانی بە ئەرکی وەزارەت زانی و هەردوولا بڕیاریان دا بە هەماهەنگی و پێکەوەیی، کارەکانیان لە تەواوی ناوچەکەدا بەرەو پێش ببەن.