دەستەی گشتیی ناوچە کوردستانییەکانی دەرەوەی ئیدارەی هەرێم: دەستبردن بۆ گۆڕینی ناسنامە و دیمۆگرافیای کەرکووک و تەواوی ناوچە کوردستانییەکان قبووڵکراو نیە
ڕۆژی چوارشەممە، ٢٦ی تشرینی دووەمی ٢٠٢٥، وەزارەتی پلاندانانی عێراق دەرئەنجامی سەرژمێریی گشتیی عێراقی ڕاگەیاند، وەک لای هەموو لایەک ڕوونە، بڕیاری هاوبەشی هەردوو وەزارەتی پلاندانانی حکومەتی عێراقی فیدراڵ و حکومەتی هەرێمی کوردستان وابوو، سەرژمێریی ساڵی ١٩٥٧ بکرێتە بنەمای سەرژمێرییەکە لە کەرکووک و ناوچە کوردستانییەکان؛ لەو بارەیەشەوە ئەنجومەنی وەزیرانی عێراق لە کۆبوونەوەی ئاساییی خۆی لە ٥-١١-٢٠٢٤، بڕیاریدا پێش ڕاگەیاندنی دەرئەنجامەکانی سەرژمێریی گشتی، تەواوی ئەو هاووڵاتییانەی لەبەر هەر هۆکارێک ئێستا لە کەرکووک نیشتەجێن و لە خواروو و ناوەڕاستی عێراقەوە هاتوون و بەشێک نین لەسەرژمێریی ساڵی ١٩٥٧، دۆسییەکانیان بۆ ناوچەکانی خۆیان بگەڕێندرێتەوە؛ بـەڵام بەداخەوە هیچ جۆرە پابەندبوونێک بەم بڕیارەوە دیار نیە و ئێمەش ئەمە بە مەترسییەکی جددی لەسەر ئەو ناوچانە دەبینین و پێچەوانەی بنەما گشتییەکانی مادەی ١٤٠ی دەستوورە.
بێگومان ئەم پێشهاتە نیگەرانییەکانی ئێمەی کرد بە ڕاستی، ئەگەر ڕوونکردنەوەی پێویست و بڕوا پێکراو لە لایەن بەغداوە نەدرێت بە حکومەتی هەرێم، ململانێ دەستوورییەکانی ئێمە دەگوازێتەوە بۆ قۆناغێکی دژوارتر.
لای هەموو لایەک ڕوونە، هەر جۆرە دەستبردنێک بۆ گۆڕینی ناسنامە و دیمۆگرافیای شاری کەرکووک و خانەقین و شەنگال و تەواوی ناوچە کوردستانییەکان، قبوڵ کراو نیە و پێویستە لە دەرەوەی ململانێکان لە هەرێمی کوردستان، حکومەت و کۆی لایەنە سیاسییەکان ئەم دۆخە بەجددی وەربگرن و کاری بنچینەییمان پاراستنی ناسنامەی کوردستانیبوونی کەرکووک و تەواوی ناوچە کێشە لەسەرەکانی تـر بێت.