سەرۆکى نوێنەرایەتيى حکومەتى هەرێم له به‌غدا له‌گه‌ڵ باڵيۆزى ئه‌رمه‌نستان له عێراق کۆبووه‌وه
ڕۆژى یەکشەممە ٢٢ی حوزەیرانی ٢٠٢٥، فارس عیسا، سەرۆکى نوێنەرایەتيى حکومەتى هەرێمى کوردستان لە بەغدا، سەردانى باڵيۆزخانەى کۆمارى ئەرمەنستانى لە بەغدا کرد و لەلایەن ڕوبین سوغۆیان، باڵيۆزى ئەو وڵاتەوە پێشوازی لێ کرا.
لە دیداره‌كه‌دا دوایین پەرەسەندنەکانى بارودۆخى ئێستا، بە تایبەتى کاردانەوەکانى شەڕى ئیسرائیل و ئێران، لەسەر ناوچەکە و چۆنیيەتيى دوورخستنەوەى وڵاتان و گەلانى ناوچەکە لە تارمایيی شەڕەکە تاووتوێ کران.
هەروەها باس له پتەوکردنى پەیوەندییەکانى عێراق و ئەرمەنستان کرا، بەتایبەتى په‌يوه‌ندييه‌كانى ئه‌و وڵاته لەگەڵ هەرێمى کوردستان لە بوارەکانى ئابوورى، وەبەرهێنان و گەشتوگوزار.