وه‌زیری ڕۆشنبیری و لاوان نوێنه‌رایه‌تی حكومه‌تی هه‌رێمی كوردستان له مۆسكۆ به‌سه‌رده‌كاته‌وه
رۆژی پێنجشەممە ١٢ی تشرینی یەکەمی ٢٠٢٣، حه‌مه‌ی حه‌مه‌سه‌عید، وه‌زیری ڕۆشنبیری ولاوانی حكومه‌تی هه‌رێمی كوردستان، له یه‌كه‌م ڕۆژی چالاكییه‌كانی له مۆسكۆ، سه‌ردانی نوێنه‌رایه‌تی حكومه‌تی هه‌رێمی كوردستانی له مۆسكۆ كرد و له لایه‌ن د.دانەر ئەبوبەکر مستەفا، نوێنه‌ری حكومه‌تی هه‌رێمی كوردستان له ڕووسیا پێشوازی لێ كرا.
له دیدارێكدا، وه‌زیری ڕۆشنبیری و لاوان سوپاسی نوێنه‌رایه‌تی حكومه‌تی هه‌رێمی کوردستانی له مۆسكۆ کرد، كه بوونەتە پشتیوان و هاوكاری درووستكردنی پردی په‌یوه‌ندی كلتووری نێوان هه‌رێمی كوردستان و ڕووسیا.
له چوارچێوه‌ی سه‌ردانه‌كه‌یدا بۆ نوێنه‌رایه‌تی حكومه‌تی هه‌رێم، له مه‌راسیمێكی ڕێزلێناندا لەگەڵ گرووپێكی هونه‌ری كچانی ڕووسیا کۆبووەوە، کە لەساڵی 2014 وە گروپێکی هەڵپەڕکێی کوردیان پێکهێناوە و هەر هەمان ساڵ لە ئاهەنگی نەورۆز لە مۆسکۆ چەند تابلۆیەکی هەڵپەڕکێیان نمایش کردووە.
دواتر حه‌مه‌ی حه‌مه‌سه‌عید، گوێی له ڕا و سه‌رنجی سه‌رپه‌رشتیار و ڕاهێنه‌ری گرووپی هەڵپەڕکێ و سەما جیهانییەکانی مۆسكۆ گرت و له‌و چوارچێوه‌یه‌دا، لیلیا میرۆنۆڤە، سه‌رپه‌رشتیاری گروپی هەڵپەڕکێ و سەما جیهانییەکانی پێشنیازی كرد، له‌و چالاكییه هونه‌رییانه‌ی له هه‌رێمی كوردستان به‌ڕێوه‌ده‌چن، ده‌رفه‌تی به‌شداریكردنیان پێ بدرێت.
ئاماژه‌ی به‌وه‌شدا، كورد كلتوورێكی ده‌وڵه‌مه‌ندی له سه‌ما و هه‌ڵپه‌ڕكێ هه‌یه و ده‌كرێت زیاتر كار بكرێت بۆ ناساندنی و هیوای خواست ناوه‌ندێكی كوردناسی له مۆسكۆ بكرێته‌وه بۆ زیاتر ئاشناكردنی كلتوور و هونه‌ری كوردی به گه‌لان.
له به‌رامبه‌ردا، وه‌زیری ڕۆشنبیری و لاوان، وێڕای ده‌ستخۆشی له چالاكییه‌كانی گرووپه‌كه، خه‌ڵاتی ڕێزلێنان و دیاری به‌خشییه سه‌رپه‌رشتیار و ڕاهێنه‌ری گرووپه‌كه و هیوای به‌رده‌وامی و سه‌ركه‌وتنی بۆ خواستن.
سه‌باره‌ت به داواكاری وپێشنیازه‌كانیان، وه‌زیری ڕۆشنبیری و لاوان به‌ڵێنی پێدان، له‌مه‌ودوا له‌و چالاكییه هونه‌ری و كلتووریانه‌ی ڕه‌هه‌ندی نێوده‌وڵه‌تییان هه‌یه، ده‌رفه‌تی زیاتر ده‌ڕه‌خسێنرێت بۆ میوانداریكردنی گرووپی هەڵپەڕکێ و سەما جیهانییەکانی مۆسكۆ و ئاماده‌یی وه‌زاره‌تی بۆ هه‌ماهه‌نگی و هاوكاری زیاتریان ده‌ربڕی.
رۆژی چوارشه‌ممه ١١ـی تشرینی یه‌كه‌می 2023، حه‌مه‌ی حه‌مه‌سه‌عید، وه‌زیری ڕۆشنبیری و لاوانی حكومه‌تی هه‌رێمی كوردستان و شاندێکی یاوەری به مه‌به‌ستی ئاماده‌بوون له فێستیڤاڵی نێوده‌وڵه‌تی فیلمی كوردی، به سه‌ردانێك گه‌یشته مۆسكۆی پایته‌ختی ڕووسیای فیدڕاڵ.
هه‌ریه‌ك له ئازا حه‌سیب قه‌ره‌داخی، ڕاوێژكاری وه‌زاره‌ت، نامق هه‌ورامی، به‌ڕێوبه‌ری ڕاگه‌یاندن و په‌یوه‌ندییه‌كان، د. موحسین ئه‌دیب، به‌ڕێوبه‌ری گشتیی ڕۆشنبیری و هونه‌ری سلێمانی و شاخەوان مستەفا بەڕێوەبەری سینەمای هەولێر، له سه‌ردانه‌كه‌دا یاوه‌ری وه‌زیری ڕۆشنبیری و لاوانن.
بڕیاره ئێواره‌ی ئه‌مڕۆ پێنجشه‌ممه به ئاماده‌بوونی وه‌زیری ڕۆشنبیری و لاوانی حكومه‌تی هه‌رێمی كوردستان، سێیەم وەشانی فێستیڤاڵی نێودەوڵەتی فیلمی کوردی مۆسکۆ به سپۆنسه‌ر و پشتیوانی وه‌زاره‌تی ڕۆشنبیری و لاوان ده‌ستپێبكات و تا (23 ی تشرینی یه‌كه‌م/ ئۆكتۆبه‌ری 2023) به‌رده‌وام بێت.
لە ساڵی 2020 ـه‌وە فێستیڤاڵی نێودەوڵەتی فیلمی کوردی مۆسکۆ لە رووسیا بەڕێوەدەچێت، وەشانی یه‌كه‌م و دووەمی فێستیڤاڵی نێودەوڵەتی فیلمی کوردی مۆسکۆ، وەزارەتی رۆشنبیری و لاوانی حکومەتی هەرێمی کوردستان سپۆنسەری فێستیڤاڵەکە بوو
