مەراسیمی ڕێزلێنان لە ژمارەیەک ڕێنماییکاری پەروەردەیی بەرێوە چوو

ڕۆژى یەکشەممە ۲۱ــی ٤ــی ۲۰۲٤، ئالان حەمەسەعید ساڵح، وەزیری پەروەردەی حکومەتی هەرێمی کوردستان، بە ئامادەبوونی سەرۆکی یەکێتيی مامۆستایانی کوردستان، و ژمارەیەک لە بەرپرسانی پەروەردەیی، بەشداری لە مەراسیمی ڕێزلێنان بۆ ژمارەیەک توێژەر و ڕێنماییکاری پەروەردەیی کرد.

مەراسیمەکە لەلایەن یەکێتيی مامۆستایانی کوردستان و کۆمەڵەی کۆمەڵناسان و دەروونناسانی کوردستان بۆ ژمارەیەک ڕێنماییکاری پەروەردەیی ڕێك خرابوو، کە لە ماوەی ڕابردوودا (١٠٠) سمیناریان لە ناوەندەکانی خوێندن پێشکەش کردبوو.

وەزیری پەروەردە تیشکی خستە سەر ڕۆڵی ڕێنماییکارانی پەروەردەیی و سوپاسی کردن، کە ڕۆڵێکی بەرچاویان لە هۆشیارکردنەوەی قوتابیيان و گەنجان بينيوه‌، هەروەها سوپاسی یەکێتيی مامۆستایانی کوردستان و کۆمەڵەی کۆمەڵناسان و دەروونناسانی کوردستانی کرد، بۆ ڕێکخستنی ئەو مەراسیمە و ڕێزلێنان لەو ڕێنماییکارانەی کە بەشداربوونە لە پرۆژەی ئەنجامدانی (سەت سمینار) لە ناوەندەکانی خوێندن.

ئالان حه‌مه‌سه‌عيد ئاماژەی بەوە دا کە وەزارەتی پەروەردە بەگرنگییەوە دەڕوانێتە ڕۆڵی ڕێنماییکارانی پەروەردەیی، بۆ ئەم مەبەستە ڕێز و سوپاسی تایبەتی پێشکەش بەو ڕێنماییکارانە کرد کە بەشداربوون لە ئەنجامدانی (سەت سمینار) بۆ هۆشیارکردنەوەی قوتابییان و گەنجان.