هەڵمەتی بەرفراوانی نیشتمانی کوتان دژی نەخۆشیی سورێژە لە هەرێمی کوردستان بەڕێوە چوو
ڕۆژی پێنجشەممە ۲٥ـی نیسانی ۲۰۲٤، ئالان حەمەسەعید ساڵح، وەزیری پەروەردە، بەئامادەبوونی د. صالح مهدی، وەزیری تەندروستیی عێراق، و د. سامان بەرزنجی، وەزیری تەندروستیی حکومەتی هەرێمی کوردستان، و ئومێد خۆشناو، پارێزگاری هەولێر و بەشێک لە بەرپرسانی تەندروستی و پەروەردە، لە چوارچێوەی گرتنەبەری ڕێوشوێنەكانی پاراستنی تەندروستیی هاووڵاتییان و لەپێناو بەرگرتن لە مەترسییەکانی تووشبوون بە نەخۆشی سورێژە، لە قوتابخانەى (شەهید بەهرام)ـی بنەڕەتی له سەنتەری شاری هەولێر، هەڵمەتی نیشتمانیی كوتان دژی نەخۆشیی سورێژە بۆ منداڵانی باخچەی منداڵان و قوتابییانی قۆناغەکانی یەكەم تاكو شەشەمی بنەڕەتی بەڕێوە چوو. هاوکات، قوتابخانە حکومی و ناحکومییەکانی سەرجەم هەرێمی کورستان دەگرێتەوە.
جێی باسە هەڵمەتەکە لەلایەن وەزارەتی تەندروستیی هەرێم بە هاوبەشی وەزارەتی تەندروستیی عێراق و ڕێكخراوی تەندروستیی جیهانی WHO و ڕێكخراوی یونیسێف بەڕێوە دەچێت، بۆ ئەم مەبەستە چەندین تیم لە کارمەندانی تەندروستی لە هەرێمی کوردستان لە قوتابخانە و باخچەکانی منداڵان لە حکومی و ناحکومی بەردەوام دەبێت، ئەم هەڵمەتە ماوەی دە ڕۆژ دەخایەنێت.
وەزیری پەروەردە، لەگوتەیەکیدا، سوپاسی هاوکاری و هەماهەنگیی وەزارەتی تەندروستیی عێراق و هەرێمی کوردستانی کرد، بۆ ڕێکخستنی ئەم هەڵمەتە و دەستخۆشی لە سەرجەم کارمەندانی تەندروستی کرد.
