بەدواداچوون بۆ گرانی نرخی کارەبای ستییەکان دەکرێت

رۆژی ۳۰ی تەممووزی ۲۰۲۳ ، کەمال محەمەد ساڵح، وەزیری کارەبای حکومەتی هەرێمی کوردستان بۆ لە نزیک ئاگادار بوونی کێشە و گرفتی هاووڵاتییان و هاوبەشانی کارەبا پێشوازیی لە نوێنەرانی گردبوونەوەی دانیشتووانی ستییەکان کرد کە لەبەردەم وەزارەتی کارەبا بۆ دەربڕینی ناڕەزایەتی لەسەر نرخی کارەباکەیان گرد بووبوونەوە.

نوێنەرانی خۆپیشاندەران هیچ گلەییەکیان لەسەر خودی سیستەمی پێوەری زیرەک و پریپەید نەبوو، بەڵکوو بە پڕۆژەیەکی گرنگ بۆ وەرگرتنی کارەبایەکی ٢٤ کاتژمێری وەسف کرد و گلەییەکەیان تەنیا لەسەر بەرزی نرخی کارەبای ٢٤ کاتژمێری ستییەکان بوو، هەربۆیە داوای پێداچوونەوە بە نرخەکەیان کرد.
وەزیری کارەبا بەڵێنی پێدان لەگەڵ تیمی وەزارەت بەدواداچوونی جددی بۆ ئەم بابەتە دەکات و لێژنەیەک سەردانی ستییەکان دەکات و لە نزیکەوە بەدواداچوون دەکەن و پێشنیاز و بۆچوونی لێژنەکە بۆ وەزیر بەرز دەکاتەوە و بڕیاری پێویستی لە بارەوە دەدرێت.