بە گوژمەی سێ ملیار دینار پرۆژەیەکی ستراتیژیی کارەبا لە پیرەمەگرون جێبەجێ دەکرێت
وەزارەتی کارەبای حکومەتی هەرێمی کوردستان پرۆژەیەکی ستراتیژی لە ناحیەی پیرەمەگرونی سەر بە پارێزگای سلێمانی جێبەجێ دەکات کە گوژمەکەی نزیکەی سێ ملیار دینار دەبێت.
لەو پرۆژەیەدا زیادکردنی سێکشنێک بۆ وێستگەی کارەبای پیرەمەگرون دەبێت لەگەڵ گۆڕەرێک بە توانای ٣١،٥ مێگاوات کارەبا کە لە جێبەجێکردن دایە، هەروەها پڕۆژەکە ٢٥ مێگاوات کارەبای دیکە بۆ سنووری وێستگەکە دابین دەکات کە توانایی پێدانی کارەبای لە ڕێگەی ٦ فیدەرەوە هەیە.
لە هەمان کاتدا پرۆژەکە کێشەی بارزۆریی بەشێکی زۆر لە وێستگەی پیرەمەگرون چارەسەر دەکات وتا ئێستاش لە ٨٠%ی کارەکانی تەواو بوو و بڕیارە لە ماوەی ساڵێکدا تەواو بکرێت.
