وەزیری كارەبا سەردانی وێستگەی بەرهەمهێنانی كارەبای بازیانی لە پارێزگای سلێمانی كرد
ڕۆژى دووشه‌ممه ٢٨ی نیسانی ٢٠٢٥، لە چوارچێوەی سەردانەكەی بۆ پارێزگه‌ی سلێمانی، كەمال محەمەد ساڵح، وەزیری كارەبا و شاندی یاوەری سەردانی وێستگەی بەرهەمهێنانی كارەبای بازیانیان لە پارێزگه‌ی سلێمانی كرد، لەلایەن شێخ سەعد تەیب، سەرۆكی جێبەجێكار و دامەزرێنەری كۆمپانیای تۆرەس پێشوازی لێ كرا.
لەكۆبوونەوەیەكدا هەنگاوەكانی بەرەوپێشچوونی وێستگەكە و پلان و بەرنامەی كۆمپانیاكە دوای واژۆكردنی گرێبەستی لەگەڵ گەورە كۆمپانیای وزە جی ئی ڤێرنۆڤا بۆ پەرەپێدان و پێشخستنی وێستگەكە تاووتوێكرا، وەزیری كارەبا دەستخۆشی لەتیمی وێستگەكە كرد كە بەشێوەیەكی پێشكەوتوو وێڕای بەرهەمهێنانی كارەبا، پابەندی لایەنی پاراستنی ژینگەیی بوون. لەلایەن خۆشیەوە شێخ سەعد تەیب سوپاسی پاڵپشتی و هاوكاریی وەزارەتی كارەبا و سامانە سروشتییەكانی كرد، كە ڕۆڵی گەورەیان لە بنيادنانی وێستگەكە و دابینكردنی سوتەمەنی و بەردەوامی ئیشپێكردن و فراوانكردنی وێستگەكه هەبووە.
وێستگەی بەرهەمهێنانی كارەبای بازیان لە كابینەی نۆیەمی حكومەتی هەرێمی كوردستان بنیاتنرا و لە ماوەیەكی كەمدا دەستی بە بەرهەمهێنانی كارەبا كردووە، ئاستی بەرهەمهێنانی كارەبای گەیشتووه‌تە ١٢٥٠ مێگاوات.
