وەزارەتی تەندروستی نەخۆشخانەیەکی تایبەت و دوو لە کارمەندەکانی سزا دەدات
![](/media/7039/untitled-wwww.jpg?center=0.49367088607594939,0.49367088607594939&mode=crop&width=1200&height=630&rnd=133433190230000000)
پاش بڵاوبوونەوەی گرتەیەکی ڤیدیۆیی دوو کارمەندی نەخۆشخانەیەکی تایبەت لە هەولێر کە ''ئازار''ـی منداڵێکی تازە لەدایکبوو دەدەن، وەزارەتی تەندروستی بڕیاریدا لیژنەیەک بۆ لێکۆڵینەوە لەو بابەتە پێکبهێنێت.
لیژنەکە سەردانی نەخۆشخانە تایبەتەکەیان کرد و پاش لێکۆڵینەوە حەوت بڕیاریان دا:
یەکەم: دوورخستنەوەی هەردوو كارمەندی نەخۆشخانە تایبەتەکە، سەرەڕای نەبوونی ڕێگەپێدانی كاركردنی ئەم دوو كارمەندە لە لیستی نەخۆشخانەکە.
دووەم: سڕكردن و لەكار ڕاگرتنی هەردوو كارمەند لە كاركردن، لەبواری پزیشكی و تەندروستی بۆ ماوەی شەش مانگ.
سێیەم: داخستنی بەشی منداڵە ناكامەكان لە نەخۆشخانە تایبەتەکە بەهۆی نەبوونی مەرجی تەندروستی تا ڕێكخستنەوە و پەیڕەوكردنی مەرج و ڕێنماییەكانی تەندروستی.
چوارەم: داخستن و ڕاگرتنی نەشتەرگەری منداڵبوون تا بڕیاری خاڵی سێیەم جێبەجێ دەکرێت.
پێنجەم: بەڕێوبەر و نەخۆشخانەکە بە پێبژاردن سزا دەدرێن.
شەشەم: سزای ئاگاداركردنەوەی بەڕێوبەری نەخۆشخانە بۆ كاركردنی پزیشكان و كارمەندان و فەرمانبەرانی نەخۆشخانە، بەپێی لیستی ڕێگەپێدراو.
حەوتەم: هەواڵەکردنی دۆسیەی سەرپێچیکردن و پێشێلکردنی مافی نەخۆش بۆ دادگای تایبەتمەند.