وەزارەتی تەندروستی ڕوونکردنەوەیەکی لەسەر پڕوپاگەندەیەک بڵاو کردەوە

وەزارەتی تەندروستیی حکومەتی هەرێمی کوردستان لە ڕوونکردنەوەکیدا لەسەر پڕوپاگەندەی کەناڵێکی تەلەفزیۆنی کە گوایە "بەرپرسانی هەرێم دەرمان لە بەغدا وەرناگرن" ڕوونکردنەوەی داوە و تێیدا هاتووە: "ئەم قسەیە ڕاست نییە و هیچ بنەمایەکی نییە."

لە ڕوونکردنەوەکەی وەزارەتی تەندروستی کە لەلایەن د. سەرکار سورچی، گوتەبێژی وەزارەتی تەندروستییەوە ڕاگەیەنراوە، هاتووە: "کەناڵی NRT لە بەرنامەیەکیدا لەسەر لێدوانی پزیشکێک بە ناوی فایەق گوڵپی، بابەتێکی بڵاو کردووەتەوە گوایە بەرپرسانی ھەرێم دەرمان لە بەغدا وەرناگرن، ئەم قسەیە لە ڕاستی دوورە و ھیچ بنامەیەکی نییە؛ قسەیەکی چەواشەکارانەیە و خۆڵکردنە چاوی خەڵکە."

دەشڵێت: "لە ڕێگەی دامەزراوەی کیمادیا لە عێراق بەشەدەرمان و پێداویستیی پزیشکیی ھەرێم، ڕاستەوخۆ بۆ کۆگای بەڕێوەبەرایەتییە گشتییەکانی تەندروستیی ھەولێر، سلێمانی و دھۆک ڕەوانە دەکرێت، وەکوو ڕۆتینی ڕۆژانە، بەبێ گەڕانەوە بۆ وەرگرتنی ڕەزامەندیی ھیچ بەرپرسێکی تەندروستیی ھەرێم، ھەر چەندە بڕەبەشی ھاتوو لە بەغدا ماف و شایستەی ھەرێمە لە بوجەی حاکیمە لە عێراقدا کە تەنیا بەشێکی پێداویستییەکانی ھەرێم فەراھەم دەکات؛ حکومەتی ھەرێمی کوردستان بۆ پڕکردنەوەی کورتھێنان لە پێداویستییەکان و دابینکردنی بەشی سەرەکیی دەرمان و پێداویستیی پزیشکی بۆ نەخۆشخانەکانی ھەرێم، لە ڕێگەی تەرخانکردنی بودجەی تایبەت بۆ سەرجەم بەڕێوەبەرایەتییە گشتییەکانی تەندروستی، مانگانە دەرمان دابین دەکات."