وەزارەتی ناوخۆ سوپاسی بەدەنگەوەهاتنی خەڵكی كوردستان بۆ كۆمەكی لێقەوماوانی بوومەلەرزە دەكات

 

دوای فەرمانی سەرۆکی حکومەتی هەرێمی کوردستان، مەسرور بارزانی، بۆ بەهاناوەچوونی لێقەوماوانی بوومەلەرزە لە تورکیا و سوریا و بڕیاری ئەنجومەنی وەزیران بۆ ڕاسپاردنی پارێزگا و ئیدارە سەربەخۆکان بۆ سەرپەرشتیکردنی کەمپەینی كۆكردنەوەی كۆمەك لەلایەن هاونیشتیمانیانی کوردستانەوە، سوپاس و پێزانینی زۆرمان بۆ کوردستانیانی ئازیز هەیە کە وەکوو هەمیشە بەشدارییەکی کارایان لەو کەمپەینەدا کردووە و ماڵ و کەلوپەل و سامانیان لەگەڵ لێقەوماواندا بەش کردووە.
ئەو کۆمەکانەی کۆکراونەتەوە، لەلایەن تیمەکانی پارێزگا و ئیدارە سەربەخۆکان و خۆبەخشەکان پۆلێن و ئامادە دەکرێن و ڕۆژانە بۆ هاوکاریی لێقەوماوان، ڕەوانەی تورکیا و سوریا دەکرێن؛ ئەم کەمپەینە تاكوو ئێوارەی هەینی، ١٧ی شوباتی ٢٠٢٣ بەردەوام دەبێت.

وەزارەتی ناوخۆ