ڕیفۆرم لە پۆلیسی کوردستان دەکرێت

دوای نیوەڕۆی چوارشەممە 22ـی تشرینی یەکەمی 2025، ڕێبەر ئەحمەد، وەزیری ناوخۆ، پێشوازی لە یەکێک لەو ليژنانە كرد، کە بۆ پێداچوونەوە بە ئەرک و پەیکەر و شێوازی مامەڵە و ڕاهێنان و پەرەپێدانی توانای جەستەیی و هزری پۆلیسی کوردستان ڕاسپێردراون.

وەزیری ناوخۆ لە سەرەتای کۆبوونەوە خۆشحاڵی خۆی دەربڕی بۆ ئەو دیدارە و پوختەیەکی لەسەر دونیابینی کابینەی نۆیەمی حکومەتی هەرێمی کوردستان بە سەرۆکایەتيی مه‌سرور بارزانی، بۆ شێوازی مامەڵەکردنی حکومەت بە دامەزراوە و فەرمانبەرەکانی لەگەڵ هاووڵاتیيان خستەڕوو کە بریتییە لە پەیڕەوکردنی میتۆدی بەسەنتەرکردنی هاووڵاتی لە خزمەتگوزارییەکان. هەروەها باسی لە پێویستيی پێداچوونەوەی جددی بە کەرتی پۆلیس کرد بە هەموو ئەرک و سێکتەر و بەرنامەکانەوە، بە جۆرێک کە لەگەڵ پێداویستییەکانی سەردەم و تێڕوانین و چاوەڕوانيی هاووڵاتیيانی کوردستان بگونجێت.

بۆ ئەم مەبەستە ئەکادیمیای سەرکردایەتی و بەڕێوەبردن لە دیوانی وەزارەتی ناوخۆ و بەڕێوەبەرایەتيی گشتيی پۆلیس هاوشان لەگەڵ ليژنەیەکی دیکەی باڵا، کە بۆ ئەرکی ئامادەکردن و نووسینەوەی ڕێبەری کاری پۆلیسی لە کوردستان پێکهاتووە، بۆ ئەو ئەرکە ڕاسپێردراون.

وەزیری ناوخۆ ليژنەی ڕاسپارد کە بیرۆکە و وردەکاريی ئەو پرۆژەیە لەگەڵ کارمەند و ئەفسەران، لەسەر ئاستی کوردستان لە ڕێی ئەنجامدانی کۆبوونەوە و وۆرکشۆپ بەش بکرێت و سەرنج و بۆچوونەکانیان بۆ دەوڵەمەندکردنی بەهەند وەربگیرێن. هەروەها سوود لە ئەزموونی وڵاتانی پێشکەوتوو بە گونجاندنی لەگەڵ سروشت و ژینگەی کۆمەڵگەی کوردستان و پاڵپشتيی ئاژانس و دامەزراوە نێودەوڵەتییەکان وەربگیرێت.

لە لایەکی دیکەوه‌ ڕێبه‌ر ئه‌حمه‌د جەختی لە پێویستيی ئامادەکردن و ڕاهێنانی بەردەوامی جەستەیی و هزری بۆ کارمەندان و ئەفسەران کرد و ئەکادیمیای سەرکردایەتی و بەڕێوەبردن، بەڕێوەبەرایەتییەکانی مەشق و شیاندن، بەڕێوەبەرایەتی و بەشەکانی ئاراستەکردن و ڕابەریکردنی مەعنەوی و بەڕێوەبەرایەتيی پۆلیسی کۆمەڵگەیی ڕاسپارد بۆ ڕێکخستنی خول و ڕاهێنانی بەردەوام. پێداچوونەوە بە پەیکەری گشتيی پۆلیس، ئەرکەکان، بنکەکانی پۆلیس وەکوو یەکەی بنەڕەتيی کاری پۆلیس، سوودوەرگرتن لە تەکنۆلۆجیای مۆدێرن بۆ ئاسانکردنی ئەرکەکان، پەروەردەکردنی سەرکردە و دابەشکردن و شۆڕکردنەوەی ئەرکەکان و چەندین تەوەری دیکە بە وردی گفتوگۆیان لەسەر کرا.