هاوپەیمانان: لە مانگى نیسان ٢٩ ئۆپەراسیۆنمان دژى تیرۆریستان لە عێراق ئەنجام داوە

هەولێر، هەرێمی کوردستان، عێراق (GOV.KRD) ـ کۆڵۆنێڵ وەین مۆڕۆتۆ، وتەبێژی هێزەکانی هاوپەیمانان لە تویتێکدا ئاشکرای کرد کە لە ماوەی مانگی نیسانی ئەمساڵ بە هەماهەنگی لەگەڵ هاوبەشەکانیان، ژمارەیەک ئۆپەراسیۆنیان دژی چەکدارە تیرۆریستەکانی داعش لە عێراق و سوریا ئەنجام داوە.

 

وتەبێژی هێزەکانی هاوپەیمانان باسى لە ئەنجامى ئەم ئۆپەراسیۆنانە کرد کە بووەتە هۆى ڕێگری لە چەندین کردەوەی تیرۆریستی. کۆڵۆنێڵ وەین مۆڕۆتۆ گوتى: لە مانگی نیسانی ئەمساڵ، ٢٩ ئۆپەڕاسیۆنمان لەگەڵ هاوبەشەکانمان دژى تیرۆریستەکانى داعش ئەنجام داوە و بەمەش ڕێگریمان کردووە لە ٣٦ کردەوەی تیرۆرستی.

گوتەبێژەکەی هاوپەیمانان باسى هەماهەنگى خۆیان و هاوبەشەکانیان و هاووڵاتیان کرد بۆ لەناوبردنی چەکدارانی داعش و زانیاری دەربارەیان تا جۆرێک لە هەماهەنگی زیاتر هەبێت و بتوانن ئۆپەراسیۆنەکانیان بە سەرکەوتووییەوە ئەنجام بدەن.