چەند یەکەیەکی مەشقی هێزەکانی پێشمەرگە کۆتایی پێهات
![](/media/16118/8e957616-dfde-4ba1-a3e3-b43e38e7775d.jpeg?anchor=center&mode=crop&width=1200&height=630&rnd=133113516470000000)
هەولێر، هەرێمی کوردستان (GOV.KRD)-ئەمرۆ پێنجشەممە، ٢٧ی تشرینی یەکەمی ٢٠٢٢، لە هەرسێک بنکەی مەشقی پیادەی کەرکوک، سلێمانی، دهۆک، چەند یەکەیەکی مەشقی تایبەت بە سریەکانی ئەسناد و کۆماندۆی لیواکانی ٢، ٦، ٨ی پیادە کۆتایی پێهات.
لەم یەکە مەشقییانەدا، پێشمەرگە لەسەر چۆنیەتیی باشترکردنی تواناکان و بەرزکردنەوەی ئاستی ڕاهێنان و مەشق لە مەیداندا ڕاهێنراون.
شایانی باسە، لە بنکەکانی مەشقی پیادەی وەزارەتی پێشمەرگە، بەردەوام خولی جۆراوجۆر بۆ یەکەکانی هێزی پێشمەرگە دەکرێنەوە. لەو خولانەدا ئاستی جەستەیی پێشمەرگە و توانا تەکنەلۆژییەکان و تاقیکردنەوەی چەک و شارەزابوون لە تەکنیکەکانی شەڕ لەبەرچاو دەگیرێن.
وەزارەتی پێشمەرگە و هاوپەیمانان، لە هەماهەنگی و هاوکاریی پتەودا، لە جێبەجێکردنی ئەو بنەما و ڕێکارانەی کە سوپای پێشمەرگە بکرێتە سوپایەکی پێشکەوتووی لێهاتوو، بەردەوامن.