بە ئامادەبوونی جێگری سەرۆکی ئەرکان چەند خولێکی جۆراوجۆر کۆتایی هاتن

ڕۆژى چوارشەممە، ٢٦ی نیسانی ٢٠٢٣، بە ئامادەبوونی لیوا ڕوکن هۆشمەند حەیدەر ڕەشید، جێگری سەرۆکی ئەرکان بۆ ئیدارە و میرە و کۆڵۆنێڵ ستیفانۆ سلڤادۆری فەرماندەی هێزەکانی ئیتاڵیا لە هەرێمی کوردستان، ڕێوڕەسمی کۆتاییهاتنی چەند خولێکی جۆراوجۆری وەک نیشانەشکێنی و شەڕی کۆڵانان و دانانی خاڵی پشکنین بەڕێوە چوو.

لیوا ڕوکن هۆشمەند حەیدەر ڕەشید، جێگری سەرۆکی ئەرکان بۆ ئیدارە و میرە لە گوتەیەکدا سوپاس و پێزانینی وەزارەتی پێشمەرگەی بە فەرماندەی هێزەکانی ئیتاڵیا و ڕاوێژکاران و ستافی ڕاهێنەرانی مەشقی سەربازیی ئەو وڵاتەی لە هەرێمی کوردستان گەیاند و کردنەوەی ئەو جۆرە خولانەی بە بنەمایەک بۆ دروستکردنی هێزێکی مەشقپێکراو و ڕاهێنراو به زانستی سەربازی بۆ ئایندەی هێزی پێشمەرگە بە پێویست زانی، هاوکات داوای فراوانکردنی بازنەی هەماهەنگی و هاوکاریی زیاتری لەنێوان وەزارەتی پێشمەرگە و فەرماندەیی زێرەڤانی کرد، بەتایبەت لە پرسی مەشق و ڕاهێنان.

ژمارەیەک لە پێشمەرگەکانی لیواکانی پیادەی سەر بە وەزارەتی پێشمەرگە و هێزەکانی زێرەڤانی بۆ ماوەی نریکەی مانگێک مەشق و ڕاهێنانیان لەسەر چەکی نیشانەشکێن پێ کرا، هاوکات بە شێوەی پراکتیکییش ئاشنای شەڕی کۆڵان بە کۆڵان و دانانی خاڵی پشکنین کران.