بەڕێوبەری چاکسازی پێشوازی لە فەرماندەی هێزەکانی ئیتاڵیا کرد

رۆژی یەکشەممە ۲٤ی کانونی یەکەمی۲٠۲۳، لیوا نەبەز سەلاح سدیق، بەڕێوبەری چاکسازی پێشوازی لە کۆڵۆنێڵ فرانسێسکۆ ئەنتۆنیۆ، فەرماندەی هێزەکانی ئیتاڵیا لە هەرێمی کوردستان و شاندێکی یاوەری کرد.

لە میانەی کۆبۆنەویەکدا، کە جێگری بەرێوەبەری چاکسازی و بەرپرسی بەشی توێژینەوە و پەرەپێدانی پرۆژەکانی چاکسازی ئامادەی بوون، بەڕێوبەری چاکسازی پوختەیەکی کار و پرۆژەکانی تیمەکانی خستەڕوو، پاشان خۆشحاڵی خۆی دەربڕی بە پەیوەندی بەهێزی ئیتاڵیا بە گروپی ڕاوێژکارانی فرەنەتەویی هێزەکانی هاوپەیمان ناسراو بە (MNAG)کە پاڵپشتی وەزارەتی کاروباری پێشمەرگە دەکەن و ڕاوێژی پێویست پێشکەش بە وەزارەت و تیمی پڕۆژەکانی چاکسازی دەکەن.

لە لایەن خۆیەوە کۆڵۆنێڵ فرانسیسکۆ ئەنتۆنیۆ، ئامادەیی وڵاتی ئیتاڵیای نیشاندا بۆ پاڵپشتی بەڕێوەبەرایەتی چاکسازی و تیمەکانی شان بە شانی وڵاتانی دیکەی هاوپەیمان و هەروەها نیازی وڵاتەکەی بۆ بیرۆکەی گرنگیدان بە فێربوونی زمانی ئیتاڵی لەسەنتەری زمان بۆ پێشمەرگە خستەڕوو بۆ ئەوەی لە داهاتوودا هاوشانی زمانی ئینگلیزی و ئەڵمانی کاری لەسەر بکرێت.