پلانی مەشقی ساڵی نوێی هێزەکانی پێشمەرگە گفتوگۆی لەبارەوە کرا
رۆژی سێشەممە ١٩ی کانوونی یەکەمی ٢٠٢٣، لیوا روکن نەجمەدین عومەر، جێگری سەرۆکی ئەرکان بۆ مەشق و ئۆپەراسیۆنەکان، لە دیوانی وەزارەت، پێشوازی لە تیمێکی سەربازیی هاوپەیمانان بەسەرۆکایەتی کۆڵۆنێڵ ڕۆب و شاندی یاوەری کرد.
لە دیدارێکدا کە تایبەت بوو بە پلانی مەشقی هێزەکانی پێشمەرگە بۆ ساڵی نوێ وهاوکارییەکانی هێزی هاوپەیمانان لە ڕووی پێداویستیە لۆجستییەکان و مەشق و ڕاهێنان بە هێزەکانی پێشمەرگەی کوردستان گفتوگۆی لەبارەوە کرا.
هێزەکانی هاپەیمانان دووپاتیان کردەوە لە جێبەجێکردنی پلانی مەشقی ساڵانە تاکو هێزەکانی پێشمەرگە بە زانستی سەردەمیانەی سەربازیی ئاشنابن و هێزێکی تۆکمەی نیشتمانی لە چوارچێوەی وەزارەتی کاروباری پێشمەرگە رێکبخرێت.
جێگری سەرۆکی ئەرکان ستایشی هێزەکانی هاوپەیمانانی کرد لەپای ماندووبوون و یارمەتیدانی هێزەکانی پێشمەرگە و ڕێزلێنانی تایبەتی پێشکەشکردن و هیوای خواست لە هاوکاری کردن و دابینکردنی پێداویستیە لۆجیستیەکان یارمەتی زیاتر پێشکەش بە وەزارەتی کاروباری پێشمەرگە بکەن.
