سەرۆکی ئەرکان پێشوازیی لە بەرپرسی ئۆفیسی هەماهەنگیی ئاسایشی ئەمریکا لە هەرێم کرد
![](/media/20389/img_8394.jpeg?anchor=center&mode=crop&width=1200&height=630&rnd=133310242370000000)
ڕۆژی ١١ی حوزەیرانی ٢٠٢٣، فەریق روکن عیسا عوزێر، سەرۆکی ئەرکانی وەزارەتی پێشمەرگە، بە ئامادەبوونی لیوا روکن هۆشمەند حەیدەر رەشید، جێگری سەرۆکی ئەرکان بۆ ئیدارە و میرە، پێشوازیی لە کۆڵۆنێڵ سان بۆرن بەرپرسی ئۆفیسی هەماهەنگیی ئاسایشی ئەمریکا لە هەرێمی کوردستان کرد.
لە کۆبوونەوەیەکدا کە تایبەت بوو بە ماڵئاواییکردنی کۆڵۆنێڵ سان بۆرن، سەرۆکی ئەرکان سوپاسی هەوڵ و ماندووبوونەکانی ناوبراوی کرد، کە لە ماوەی ڕابردوودا خزمەتێکی باشی هێزەکانی پێشمەرگەی کردووە، بەتایبەت لە بواری چاکسازی و مەشقە پیشەییەکان و لۆجستیدا.
هەر لە کۆبوونەوەکەدا باسیان لە قۆناغەکانی چاکسازی و بەڕێوەچوونی کارەکانی گواستنەوەی هێزەکانی پێشمەرگە لە یەکەکانی ٧٠ و ٨٠ بۆ سەر وەزارەتی پێشمەرگە و دروستکردنی فیرقەی نوێ کرد.
سەرۆکی ئەرکان هیوای خواست کارنامەی پلان بۆ داڕژراو، وەک خۆی جێبەجێ بکرێت و ڕۆڵی هاوپەیمانانی لە هاوکاریکردن بۆ سەرخستنی پلانەکان بەرز نرخاند.
لە کۆتاییی دیدارەکەدا سەرۆکی ئەرکان هیوای خواست کە کۆڵۆنێڵ سان بۆرن لە کاری داهاتوودا سەرکەوتوو بێت و هەروەک دۆستێکی نزیکی کورد بمێنێتەوە.