سەرۆکی ئەرکان پێشوازی لە فەرماندەی دەستەی ڕاوێژکارانی هاوپەیمانان لە عێراق کرد
![](/media/19136/9795b389-a8ca-4083-b0ea-3077bc5c0ed0.jpeg?anchor=center&mode=crop&width=1200&height=630&rnd=133246337860000000)
ڕۆژى ٢٩ی ئاداری ٢٠٢٣، فەریق ڕوکن عیسا عوزێر، سەرۆکی ئەرکانی وەزارەتی پێشمەرگە لە دیوانی وەزارەت پێشوازی لە جەنەڕاڵ پیتەرس، فەرماندەی دەستەی ڕاوێژکارانی هاوپەیمانان لە عێراق و شاندێکی یاوەری کرد.
لە دیدارێکدا کە لیوا ڕوکن هۆشمەند حەیدەر ڕەشید، جێگری سەرۆکی ئەرکان بۆ ئیدارە و میرە، کۆڵۆنێڵ سۆریا، جێگری فەرماندەی دەستەی ڕاوێژکارانی هاوپەیمانان لە عێراق بۆ کاروباری هەرێمی کوردستان و عەمید روکن محەمەد سەعید، بەڕێوبەری هەماهەنگی و پەیوەندییەکانی وەزارەت ئامادەی بوون، برەودان بە زیاترکردنی هەماهەنگیی نێوان هێزی پێشمەرگە و هاوپەیمانان و برەودان بە باشترکردنی پەیوەندییەکانی نێوان هێزی پێشمەرگە و هێزەکانی سوپای عێراق لە ناوچە ئەمنییە هاوبەشەکان لەنێوان هێزەکان لەسەر زەوی و ئۆپەراسیۆنی هاوبەش لەگەڵ سوپای عێراق و هێزە عێراقییەکان لە کاتی پێویست بۆ نەهێشتنی مەترسیی گرووپە تیرۆرستییەکان لە ناوچەکە باس کران.
لە تەوەرەیەکی دیکەی ئەو دیدارەدا، دوایین پێشهاتەکانی عێراق و هەرێمی کوردستان خرایە بەر باس و هەردوولا بە گرنگییەوە تیشکیان خستە سەر پەیوەندییەکانی نێوان هێزی پێشمەرگە و هاوپەیمانیی نێودەوڵەتی بۆ ئەنجامگەیاندنی بەرنامە و پلانی هاوبەش بۆ لەناوبردنی هزری توندڕەویی داعش و گرووپە تیرۆرستییەکان لە عێراق، هاوکات جەنەڕاڵ پیتەرس، خۆشحاڵیی خۆی نیشان دا بە هەوڵ و هەنگاوەکانی وەزارەتی پێشمەرگە لە پڕۆسەی چاکسازیی هێزەکان و ئاماژەی بەوە دا هاوپەیمانان گەشبینین بە ئەنجامی پڕۆژەیاسای چاکسازی لە وەزارەتی پێشمەرگە.
بەردەوامبوونی پەیوەندییەکان لەسەر زەوی لەگەڵ هێزە عێراقییەکان و ئۆپەڕاسیۆنی هاوبەش و پێشهاتە ئەمنییەکانی عێراق و ناوچەکە تەوەرەیەکی دیکەی دیداری نێوان سەرۆکی ئەرکانی وەزارەتی پێشمەرگە و جەنەراڵ پیتەرس، فەرماندەی دەستەی ڕاوێژکارانی هاوپەیمانان لە عێراق بوو.