کۆڵۆنێڵ گاجێڕۆ بۆ وەزیری پێشمەرگە: ئیدارەی واشنتۆن دڵخۆشن بە گەڕانەوەت بۆ ئەرکەکەت
هەریەک لە بەرپرسی راوێژکارانی باڵای سەربازی هاوپەیمانان لەهەرێم و بەرپرسی ئۆفیسی هەماهەنگی ئاسایشی ئەمریکا لە کونسوڵخانەی ئەو ووڵاتە لە هەولێر، ستایشی گەڕانەوەی وەزیری پێشمەرگە دەکەن و ڕاشیدەگەینن:" بۆ بەردەوامیدان بە پڕۆسەی چاکسازی پێشمەرگە و دروستکردنی هێزیکی نیشتمانیی تۆکمە هیوای زۆریان بە وەزیری کاروباری پێشمەرگە هەیە.'' و لەمڕووەشەوە، پاڵپشتیی و هاوکارییەکانی خۆیان بۆ وەزارەتی کاروباری پێشمەرگە دووپاتکردەوە.
رۆژی ٢٨ی تشرینی دووەمی ٢٠٢٣، شۆڕش ئیسماعیل، وەزیری کاروباری پێشمەرگەی حکومەتی هەرێمی کوردستان پێشوازی لە جەنەڕاڵ مەکنێنزی، بەرپرسی تیمی ڕاوێژکارانی باڵای سەربازی هاوپەیمانان و کۆڵۆنێل مایکڵ گاجیرۆ، بەرپرسی ئۆفیسی هەماهەنگی ئاسایشی کونسوڵخانەی ئەمریکا لە هەرێمی کوردستان کرد.
رۆژی ٢٨ی تشرینی دووەمی ٢٠٢٣، شۆڕش ئیسماعیل، وەزیری کاروباری پێشمەرگەی حکومەتی هەرێمی کوردستان پێشوازی لە جەنەڕاڵ مەکنێنزی، بەرپرسی تیمی ڕاوێژکارانی باڵای سەربازی هاوپەیمانان و کۆڵۆنێل مایکڵ گاجیرۆ، بەرپرسی ئۆفیسی هەماهەنگی ئاسایشی کونسوڵخانەی ئەمریکا لە هەرێمی کوردستان کرد.
لەو کۆبوونەوەیەدا وەزیری کاروباری پێشمەرگە ستایشی هەوڵەکانی هاوپەیمانان و ئەمریکای کرد لە بەرامبەر پاڵپشتی و پشتیوانییەکانیان بۆ وەزارەتی کاروباری پێشمەرگە لە پێناو سەرخستنی پڕۆسەی چاکسازی و ڕێکخستنەوە و یەکخستنەوەی هێزی پێشمەرگە لە چوارچێوەی وەزارەتی کاروباری پێشمەرگە.
وەزیری شۆڕش ئیسماعیل، ڕایگەیاند:'' هیواخوازم پەیوەندییەکانمان بەرە و باشتر هەنگاو بنێن، دۆخی ئێستای ناوچەکە پێویستی بەکاری پێکەوەیی هەیە، بۆ رووبەڕوبونەوەی پێشهات و مەترسییەکان.''
لە بەشێکی تری کۆبوونەوەکەدا، جەنەڕاڵ مەکێنزی، هیوای خواست قۆناغێکی نوێی کارکردنی هاوبەشی دوور مەودا لە وەزارەتی کاروباری پێشمەرگە بێتە ئاراوە، کە هەمووان پێکەوە بتوانن پڕۆسەی چاکسازی زیاتر پەرە پێبدەن و ستایشی هەوڵەکانی ڕابردووی وەزیری کاروباری پێشمەرگەی کرد لە پڕۆسەی ڕێکخستنەوە و یەکخستنەوەی هێزی پێشمەرگە.
لەلای خۆیەوە کۆڵٶنێل گاجیرۆ، بەرپرسی ئۆفیسی هەماهەنگی ئاسایش لە کونسوڵخانەی ئەمریکا لە هەولێر دڵخۆشی واشنتۆنی لە گەڕانەوەی وەزیری کاروباری پێشمەرگە بۆ ئەرکەکەی راگەیاند و وتیشی :'' ئومێد دەخوازین وەزارەتی کاروباری پێشمەرگە هەنگاوی گەورە و گرنگ بنێت لە پڕۆسەی چاکسازی و جێبەجێکردنی ناوەڕۆکی (کارنامەی لێکتێگەیشتن)ی نێوان وەزارەتی بەرگری ئەمریکا و وەزارەتی کاروباری پێشمەرگە.
