سەرۆکی هەرێمی كوردستان پێشوازی لە سەرۆکی ئەرکانی سوپای بەریتانیا کرد
ڕۆژی پێنجشەممە ١٢ی کانوونی یەکەمی ٢٠٢٤، نێچیرڤان بارزانی، سەرۆکی هەرێمی کوردستان، پێشوازی لە ئەدمیراڵ سێر ئه‌نتۆنی ڕاداکين، سوپاسالاری بەریتانیا و شاندێکی پایەبەرزی سەربازی و دیپلۆماسیی شانشینی یەکگرتوو و شاندێکی یاوەری کرد.
لەو دیدارەدا، کە جه‌عفه‌ر شێخ مسته‌فا، جێگرى سه‌رۆكی هەرێم و شۆڕش ئیسماعیل، وه‌زيرى پێشمه‌رگه و فەریق روکن عیسا عوزێر، سەرۆکی ئەرکان و باڵیۆزی بەریتانیا لە عێراق ئامادەی بوون، دۆخی ئێستای عێراق و هەرێمی کوردستان و پێشهاته خێراکانى ناوچەکە، به تايبه‌تى له سووريا و ئەرکی هاوپەیمانيى نێودەوڵەتی لە بەرەنگاربوونەوەی داعش تاووتوێ کرا، هەروەها پەیوەندییەکانی به‌ريتانيا له‌گەڵ عێراق و هەرێمی کوردستان، خرايه به‌ر باس.
نێچیرڤان بارزانی ستایشی ڕۆڵ و پشتیوانیی بەردەوامی به‌ريتانياى لە عێراق و هەرێمی کوردستان کرد. هەروەها سوپاس و پێزانينی بۆ هێزەکانی بەریتانیا دووپات كرده‌وه، كه يارمه‌تيى هەرێمی کوردستان ده‌ده‌ن لە پرۆسه‌ى چاكسازى له وەزارەتی كاروبارى پێشمەرگە و یەکخستنەوەی پێشمەرگە.
لای خۆیەوە، سوپاسالاری بەریتانیا پابەندیی وڵاتەکەی بۆ پشتیوانیی زیاتر و بەهێزکردنی هاریکاریی هاوبەشی لەگەڵ عێراق و هەرێمی کوردستان دووپات کردەوە، هەروەها ئاماژەی بە گرنگیی بەردەوامیی هاريكارى و هەماهەنگی کرد بۆ دڵنیابوون لە بەرەنگاربوونەوەی سەرکەوتووانەی مەترسییەکانی تیرۆر و پاراستنى سه‌قامگيرى له ناوچه‌كه.
